UN អនុម័តសម្រាប់ការចាកចេញរបស់កម្ពុជាពីក្រុមប្រទេសអភិវឌ្ឍន៍តិចតួច

មហាសន្និបាតនៃអង្គការសហប្រជាជាតិ បានអនុម័តសេចក្តីសម្រេច A/៧៩/L.៤៩ សម្រាប់ការចាកចេញរបស់ប្រទេសកម្ពុជាពីក្រុមប្រទេសអភិវឌ្ឍតិចតួច (LDC) ហើយការចាកចេញពីក្រុមប្រទេសអភិវឌ្ឍន៍តិចតួចជាផ្លូវការគឺនៅរយៈពេល៥ឆ្នាំទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយលើគេហទំព័រអង្គការសហប្រជាជាតិ កម្ពុជា ជាមួយនឹងប្រទេស ហ្សេណេហ្គាល់ នឹងត្រូវដកចេញពីក្រុមប្រទេសអភិវឌ្ឍន៍តិចតួចជាផ្លូវការនៅថ្ងៃទី១៩ ខែធ្នូ ឆ្នាំ២០២៩។ ការរង់ចាំ៥ឆ្នាំទៀតនេះគឺដើម្បីបន្តតាមដានថាប្រទេសទាំងពីរនេះអាចរៀបចំខ្លួនប្រកបដោយប្រសិទ្ធភាព និងប្រាកដថាចាកចេញមានភាពរលូនមិនត្រលប់មកក្នុងបញ្ជីវិញ។

ហ្វេសបុកផេករបស់ UN ប្រចាំកម្ពុជាបានអបអរសារទរចំពោះលទ្ធផលដែលកម្ពុជាសម្រេចបាននេះដោយថា «នេះ គឺជាការជំហានដ៏សំខាន់ឆ្ពោះទៅរកវឌ្ឍនភាព និងវិបុលភាពនាពេលអនាគត»។

មានប្រទេស៤៤ត្រូវអង្គការសហប្រជាជាតិដាក់ចូលជាប្រទេសមានការអភិវឌ្ឍតិចតួច។ ប្រទេសកម្ពុជាត្រូវបានដាក់បញ្ចូលក្នុងក្រុមប្រទេសទាំងនេះក្នុងឆ្នាំ១៩៩១។ ការដាក់បញ្ចូលក្នុងប្រទេសអភិវឌ្ឍន៍តិចតួចដោយពិនិត្យទៅលើចំណូលប្រចាំឆ្នាំរបស់មនុស្សម្នាក់ៗ សន្ទស្សន៍នៃការអប់រំនិងសុខភាពសាធារណៈ និងសន្ទស្សន៍ងាយរងគ្រោះផ្នែកសេដ្ឋកិច្ចនិងបរិស្ថានក្នុងប្រទេសនោះ៕

ដោយ ហ៊ុន សិរីវឌ្ឍន៍