ក្រសួងអប់រំ រៀបចំសេចក្ដីណែនាំពិសោធន៍វិទ្យាសាស្ត្រលើកកម្ពស់ការរៀន និងបង្រៀនវិទ្យាសាស្ត្រ និងស្ទែម

ក្រសួងអប់រំ យុវជន និងកីឡា បានរៀបចំ “សេចក្ដីណែនាំពិសោធន៍វិទ្យាសាស្ត្រ សៀវភៅគ្រប់គ្រងបន្ទប់ពិសោធន៍វិទ្យាសាស្ត្រ និងវីដេអូពិសោធន៍វិទ្យាសាស្ត្រ (Science Lab Protocol) លើ៤មុខវិជ្ជា រូបវិទ្យា គីមីវិទ្យា ជីវវិទ្យា
និងផែនដីវិទ្យា”ដើម្បីលើកកម្ពស់ការរៀន និងបង្រៀនវិទ្យាសាស្ត្រ និងការអប់រំស្ទែម។

ថ្លែងក្នុងសិក្ខាសាលាកែលម្អស្ដីពី “សេចក្ដីណែនាំពិសោធន៍វិទ្យាសាស្ត្រ សៀវភៅគ្រប់គ្រងបន្ទប់ពិសោធន៍វិទ្យាសាស្ត្រ និងវីដេអូពិសោធន៍វិទ្យាសាស្ត្រ (Science Lab Protocol) លើ៤មុខវិជ្ជា រូបវិទ្យា គីមីវិទ្យា ជីវវិទ្យា និងផែនដីវិទ្យា”សម្រាប់ការរៀន និងបង្រៀននៅមធ្យមសិក្សាទុតិយភូមិ ពីថ្ងៃទី២៤-២៦ ខែធ្នូ ឆ្នាំ២០២៤ លោកបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា និងជាប្រធានគម្រោង STEP-UP បានឱ្យដឹងថា សិក្ខាសាលាកែលម្អនេះមានគោលបំណងដើម្បីកសាងសេចក្ដីណែនាំ និងវីដេអូពិសោធន៍វិទ្យាសាស្ត្រសម្រាប់គាំទ្រដល់ការរៀន និងបង្រៀននៅមធ្យមសិក្សាទុតិយភូមិ និងលើកកម្ពស់ការរៀន និងបង្រៀនវិទ្យាសាស្ត្រ និងការអប់រំស្ទែម។

លោករដ្ឋលេខាធិការបានបន្តថា ការរៀបចំសេចក្ដីណែនាំ និងវីដេអូពិសោធន៍វិទ្យាសាស្ត្រនេះ នឹងផ្ដល់ផលជះដល់សិស្សានុសិស្សតាមរយៈការផ្សារភ្ជាប់ទ្រឹស្ដីទៅនឹងការអនុវត្តជាក់ស្ដែងក្នុងបន្ទប់ពិសោធន៍ និងជាស្តង់ដាជាតិមួយ សម្រាប់ការអនុវត្តក្នុងកម្រិតសាលារៀន។ ជាងនេះទៅទៀត លោករដ្ឋលេខាធិការបានបន្ថែមទៀតថា គុណភាពអប់រំគឺអាស្រ័យទៅលើគុណភាពរបស់នាយកសាលា និងគ្រូបង្រៀនក្នុងការជំរុញការអនុវត្តពិសោធន៍ ដើម្បីឱ្យសិស្សមានជំនាញស្ទែម និងវិទ្យាសាស្ត្រឆ្លើយតបទៅនឹងគោលនយោបាយរបស់រដ្ឋាភិបាល៕

អត្ថបទ៖ សំអឿន