ក្រសួងមុខងារសាធារណៈ ប្រកាសរើសអ្នកសង្កេតការណ៍ស្ម័គ្រចិត្ត៣០នាក់ ក្នុងការប្រឡងរើសមន្ត្រីពន្ធដារខាងមុខ

ក្រសួងមុខងារសាធារណៈ បានប្រកាសតាមទំព័រហ្វេសប៊ុកផ្លូវការ នៅថ្ងៃទី១ ខែមករា ឆ្នាំ២០២៥ ពីការរើសសាធារណជនចុះឈ្មោះជាអ្នកសង្កេតការណ៍ស្ម័គ្រចិត្ត ចំនួន៣០នាក់ ក្នុងដំណើរការប្រឡងប្រជែងជ្រើសរើសមន្ត្រីរាជការ ឱ្យចូលបម្រើការងារនៅអគ្គនាយកដ្ឋានពន្ធដារ ក្នុងក្របខណ្ឌក្រសួងសេដ្ឋកិច្ច និងហិរញ្ញវត្ថុ (វិញ្ញាសាសរសេរលើកទី២)។

ការប្រឡងប្រជែង ឱ្យចូលបម្រើការងារនៅអគ្គនាយកដ្ឋានពន្ធដារ ក្នុងក្របខណ្ឌក្រសួងសេដ្ឋកិច្ច និងហិរញ្ញវត្ថុ (វិញ្ញាសាសរសេរលើកទី២) ធ្វើឡើងនៅថ្ងៃសៅរ៍ ទី១១ ខែមករា ឆ្នាំ២០២៥ នៅមណ្ឌលប្រឡងសាលាភូមិន្ទរដ្ឋបាល និងថ្ងៃបន្តបន្ទាប់រហូតដល់ដំណើរការប្រឡងប្រជែងត្រូវបានបិទបញ្ចប់។ ហេតុដូចនេះ ក្រសួងបានរើសសាធារណជនស្ម័គ្រចិត្តចំនួន ៣០នាក់ ដើម្បីចូលរួមសង្កេតការណ៍ នៃការប្រឡងប្រជែងនេះ។ សម្រាប់សាធារណជនដែលមានចំណាប់អារម្មណ៍ អាចចុះឈ្មោះ តាមរយៈតំណភ្ជាប់៖ https://forms.gle/1ZMm7D2PEnTtfAX58 ចាប់ពីថ្ងៃផ្សាយដំណឹង ដល់ថ្ងៃទី៦ ខែមករា ឆ្នាំ២០២៥ ត្រឹមម៉ោង ១៧៖០០នាទី។

បើតាមក្រសួងមុខងារសាធារណៈ ការរើសសាធារណជនស្ម័គ្រចិត្តសង្កេតការណ៍នេះ ដើម្បីជាការបញ្ជាក់ថា ការប្រឡងប្រជែងជ្រើសរើសមន្ត្រីរាជការ ឱ្យចូលបម្រើការងារនៅអគ្គនាយកដ្ឋានពន្ធដារ ក្នុងក្របខណ្ឌក្រសួងសេដ្ឋកិច្ច និងហិរញ្ញវត្ថុ (វិញ្ញាសាសរសេរលើកទី២) ប្រព្រឹត្តទៅដោយឈរលើគោលការណ៍ គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។ ហេតុនេះ ទើបគណៈកម្មការរៀបចំការប្រឡងប្រជែងបានអនុញ្ញាតឱ្យសាធារណជនស្ម័គ្រចិត្តចំនួន ៣០នាក់ ដាក់ពាក្យស្នើសុំចូលរួមសង្កេតការណ៍ដោយផ្ទាល់នៅមណ្ឌលប្រឡង តាមកាលបរិច្ឆេទដូចបានបញ្ជាក់ជូនខាងលើ។

ក្រសួងក៏បញ្ជាក់ទៀតថា អ្នកដែលបានដាក់ពាក្យចំនួន ៣០នាក់ដំបូង ដែលបានបំពេញព័ត៌មានគ្រប់គ្រាន់ និងច្បាស់លាស់ នឹងត្រូវបានជ្រើសរើសជាអ្នកសង្កេតការណ៍តំណាងសាធារណជន។

សូមជម្រាបថា ការប្រឡងប្រជែងជ្រើសរើសមន្ត្រីរាជការចូលបម្រើការងារ នៅអគ្គនាយកដ្ឋានពន្ធដារ ក្នុងក្របខណ្ឌក្រសួងសេដ្ឋកិច្ចនិងហិរញ្ញវត្ថុ លើវិញ្ញាសាសរសេរលើកទី១ ប្រព្រឹត្តទៅកាលពីថ្ងៃទី២៨ ខែធ្នូ ឆ្នាំ២០២៤ នៅមណ្ឌលប្រឡងសាកលវិទ្យាល័យភូមិន្ទភ្នំពេញ។ ជាមួយគ្នានេះ ការប្រឡងលើវិញ្ញាសារសរសេរលើកទី១ មានបេក្ខជនដាក់ពាក្យចូលប្រឡងចំនួន ៥៦៩៤នាក់ ក្នុងនោះគឺជ្រើសរើសយកតែ ២៥៧នាក់ ប៉ុណ្ណោះ៕