ព័ត៌មានជាតិ

សមត្ថកិច្ច បន្តបង្ក្រាបបានករណីគ្រឿងញៀនជាច្រើនបន្តបន្ទាប់ នៅតាមមូលដ្ឋាន តាមរយៈ App NoDrug

បានផុស

២ years មុន

នៅ

ថ្ងៃចន្ទ ១៣ មករា ២០២៥

ដោយ

តាមរយៈ App NoDrug សមត្ថកិច្ចបង្ក្រាបបានករណីគ្រឿងញៀនជាបន្តបន្ទាប់ នៅតាមតំបន់ភូមិឋាន ឬ មូលដ្ឋាននានា របស់ប្រជាពលរដ្ឋ ដែលជួបប្រទះលើបញ្ហាគ្រឿងញៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

App នេះ ត្រូវបានអាជ្ញាធរជាតិប្រយុទ្ធប្រឆាំងគ្រឿងញៀន បង្កើតឡើងសម្រាប់ឱ្យប្រជាពលរដ្ឋទូទៅទាំងអស់នៅក្នុងប្រទេស អាចរាយការណ៍មកកាន់សមត្ថកិច្ច ស្ដីពីការចរាចរគ្រឿងញៀន ការសេពគ្រឿងញៀន ឬក៏ប្រទះឃើញជនដែលមានពាក់ព័ន្ធនឹងគ្រឿងញៀន ដើម្បីអាចឱ្យសមត្ថកិច្ចចុះទៅអន្តរាគមន៍បង្ក្រាបទាន់ពេលវេលា។

យោងតាមផេកផ្លូវការរបស់អាជ្ញាធរជាតិប្រយុទ្ធប្រឆាំងគ្រឿងញៀន បានបង្ហាញពីការបង្ក្រាបគ្រឿងញៀនជាច្រើន ដែលជាការបង្ក្រាបដោយទទួលព័ត៌មានបានពីសេចក្ដីរាយការណ៍របស់ប្រជាពលរដ្ឋនៅតាមមូលដ្ឋាន ដែលបានដឹង និងជួបប្រទះពីបញ្ហាគ្រឿងញៀន មានអ្នកជួញដូរ ក៏ដូចជាជនប្រើប្រាស់ជាដើម។

ប្រជាពលរដ្ឋ បានបង្ហាញការគាំទ្រចំពោះការដាក់ឱ្យប្រើប្រាស់ App NoDrug ដែលវាអាចឱ្យពួកគាត់ធ្វើការផ្តល់ព័ត៌មានជូនសមត្ថកិច្ចបានទាន់ពេល និងលឿនរហ័ស នៅពេលជួបប្រទះពីសកម្មភាពប្រើប្រាស់ និងការជួញដូរគ្រឿងញៀន តាមតំបន់នានា ពិសេសក្នុងតំបន់ភូមិឋានរស់នៅអចិន្ត្រៃយ៍របស់ពួកគាត់ទាំងអស់គ្នា។

សូមបញ្ជាក់ថា អាជ្ញាធរជាតិប្រយុទ្ធប្រឆាំងគ្រឿងញៀន បានបង្កើត App NoDrug នេះឡើងមកអស់រយៈពេល ១ ឆ្នាំ កន្លងមកហើយ ដែលបានផ្តល់ឱកាសឲ្យពលរដ្ឋអាចរាយការណ៍បានដោយស៊េរី និងគ្រប់ពេលវេលាអំពីបញ្ហាគ្រឿងញៀនដែលពួកគាត់បានជួបប្រទះ។

ក្នុងអាណត្តិ រាជរដ្ឋាភិបាលនីតិកាលទី ៧ នេះ រាជរដ្ឋាភិបាលបានចាត់ទុកបញ្ហាគ្រឿងញៀនគឺជាកិច្ចការងារអាទិភាពចម្បងទី ៤ ដែលចាំបាច់ត្រូវយកចិត្តទុកដាក់គិតគូរ ក្នុងការទប់ស្កាត់ និងបង្ក្រាបឱ្យមានប្រសិទ្ធភាពខ្ពស់បំផុត៕

អត្ថបទ ៖ សុភា