ក្រសួងអប់រំ គ្រោងជ្រើសរើសសាលារៀនគំរូ​១៣០ បន្ថែមទៀត សម្រាប់សន្និបាតអប់រំឆ្នាំ២០២៥

ក្រសួងអប់រំ យុវជន និងកីឡា គ្រោងនឹងជ្រើសរើសសាលារៀនគំរូ១៣០បន្ថែមទៀតសម្រាប់សន្និបាតអប់រំ
ឆ្នាំ២០២៥ នាខែកុម្ភៈ ឆ្នាំ២០២៥ ខាងមុខ។ កាលពីសន្និបាតអប់រំខែមេសា ឆ្នាំ២០២៤ ក្រសួងអប់រំបានវាយតម្លៃ
និងទទួលស្គាល់សាលាគំរូចំនួន ១២០ ក្នុងនោះរួមមានមត្តេយ្យសិក្សា ១០ បឋមសិក្សា ៤០ អនុវិទ្យាល័យ ១៥ និងវិទ្យាល័យ ៥៥។

ជាមួយគ្នានេះដែរក្រសួងបានបន្តកំណត់សាលាគោលដៅចំនួន ៣៦៦ ក្នុងនោះមានសាលាមត្តេយ្យសិក្សា ៣៩ សាលាបឋមសិក្សា ១៧៥ និងសាលាមធ្យមសិក្សា ១៥២ ដើម្បីជាប់ស្តង់ដាសាលាគំរូសម្រាប់សន្និបាតអប់រំ ខែកុម្ភៈ ឆ្នាំ២០២៥ ខាងមុខ ចំនួន ១៣០សាលារៀនថែមទៀត។

នៅក្នុងកិច្ចប្រជុំស្តីពី ការពិនិត្យ និងវាយតម្លៃជ្រើសរើសសាលារៀនគំរូសម្រាប់សន្និបាតអប់រំឆ្នាំ២០២៥ កាលពីថ្មីៗនេះ
លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា បានណែនាំដល់ថ្នាក់ដឹកនាំក្រសួងត្រូវប្រជុំក្រុមការងារជំនាញវាយតម្លៃលើឯកសារជាមុនដើម្បីឱ្យច្បាស់លើគោលការណ៍ និងទិន្នន័យ ហើយរៀបចំក្រុមការងារ និងយន្តការចុះទៅមើលតាមសាលាដោយផ្ទាល់ ដោយត្រូវមានឯកសារយោងឱ្យច្បាស់លាស់ និងពេញលេញភ្ជាប់ជាមួយនូវព្រឹត្តិប័ត្រព័ត៌មាន និងរូបថតសាលារៀន និងត្រូវពិនិត្យវិភាគលើរបាយការណ៍នៃការវាយតម្លៃសាលានីមួយៗ និងត្រូវរៀបចំជារបាយការណ៍លម្អិតដើម្បីលើកកម្ពស់សុក្រឹតភាពមុនធ្វើការអនុម័តសម្រេច។

គួរបញ្ជាក់ថា ក្នុងគោលដៅគាំទ្រការអនុវត្តស្តង់ដាសាលាគំរូទាំងបីកម្រិត ក្រសួងបានចេញសេចក្តីណែនាំស្តីពីការអនុវត្តស្តង់ដាសាលារៀនគំរូ, ប្រកាសស្តីពីការដាក់ឱ្យអនុវត្តស្តង់ដាសាលារៀនគំរូ, បង្កើតគណៈកម្មការដឹកនាំ និងគណៈកម្មការ​បច្ចេកទេសអនុវត្តស្តង់ដាសាលារៀនគំរូទាំងបីកម្រិត, ក្រុមការងារចុះជួយគាំទ្រតាមតំបន់ទាំង៥ ដែលមានសមាសភាពចម្រុះពីថ្នាក់ជាតិថ្នាក់រាជធានី ខេត្ត គ្រូប្រឹក្សាគរុកោសល្យ គ្រូឧទ្ទេស នាយកល្អ គ្រូបង្រៀនល្អ ព្រមទាំងអ្នកឯកទេសនានា។

ក្រសួងក៏បានអភិវឌ្ឍឯកសារ និងឧបករណ៍គាំទ្រនានាក្នុងការអនុវត្តសាលាគំរូដើម្បីផ្តល់ជូនសាលារៀន និងអ្នកពាក់ព័ន្ធតាមគ្រប់ទិដ្ឋភាព។ ក្រុមការងារគាំទ្រសាលារៀន និងសាលាគោលដៅ ក៏បានកំណត់បញ្ហារួមគ្នាដើម្បីរៀបចំផែនការសកម្មភាពជាក់លាក់ចុះជួយគាំទ្រសាលារៀនដោយប្រើប្រាស់កម្លាំងសរុប និងធនធានសរុបតាមរយៈការគាំទ្រពីគ្រប់ប្រភពមានដូចជា គម្រោង USESDP-2, STEP UP,GEIP, ថវិកាកម្មវិធីជាដើម៕

អត្ថបទ៖​ សំអឿន