ព័ត៌មានជាតិ

កម្លាំងចម្រុះ នៃស្នងការរាជធានី បន្តដាក់គោលដៅត្រួតពិនិត្យជាតិស្រវឹង នៅលើកំណាត់ផ្លូវ ៦០ ម៉ែត្រ

បានផុស

១ year មុន

នៅ

ថ្ងៃព្រហស្បតិ៍ ២៣ មករា ២០២៥

ដោយ

កម្លាំងចម្រុះ នៃស្នងការដ្ឋាននគរបាលរាជធានីភ្នំពេញ បានបន្តដាក់គោលដៅត្រួតពិនិត្យជាតិស្រវឹង នៅលើបណ្ដោយមហាវិថី សម្តេចតេជោ ហៅផ្លូវ ៦០ ម៉ែត្រ ស្ថិតក្នុងខណ្ឌដង្កោ រាជធានីភ្នំពេញ កាលពីយប់ថ្ងៃទី ២២ ខែមករា ឆ្នាំ ២០២៥ ម្សិលមិញ។

មន្ត្រីនគរបាលជំនាញចុះអនុវត្ត បានឲ្យដឹងថា ដោយអនុវត្តតាមបទបញ្ជារបស់ លោកនាយឧត្ដមសេនីយ៍ ស ថេត អគ្គស្នងការនគរបាលជាតិ និង លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កម្លាំងចម្រុះ បានសហការបន្តចុះដាក់គោលដៅអនុវត្តច្បាប់ចរាចរណ៍ផ្លូវគោក ជាពិសេសត្រួតពិនិត្យលើអ្នកបើកបរយានយន្តដែលមានជាតិស្រវឹងតាមបណ្ដោយមហាវិថី សម្តេចតេជោ ហៅផ្លូវ ៦០ ម៉ែត្រ ត្រង់ចំណុចមុខបុរីជីបម៉ុង ភូមិស្រុកចេក សង្កាត់ជើងឯក ខណ្ឌដង្កោ រាជធានីភ្នំពេញ។

ក្នុងប្រតិបត្តិការចុះអនុវត្តច្បាប់ និងត្រួតពិនិត្យជាតិស្រវឹងនេះ ដឹកនាំដោយលោកឧត្ដមសេនីយ៍ទោ ចាន់ គ្រឹស្នា ស្នងការរង នៃស្នងការដ្ឋាននគរបាលរាជធានីភ្នំពេញ ដែលមានកងកម្លាំងចម្រុះ ៧៧ នាក់។

លទ្ធផល នៃកិច្ចសហប្រតិបត្តិការមានយានយន្តឆ្លងកាត់ចំនួន ៨៥ គ្រឿង យានយន្តល្មើសជាតិអាល់កុលចំនួន ០៤ គ្រឿង (រថយន្ត ០១ គ្រឿង ម៉ូតូចំនួន ០៣ គ្រឿង) កម្រិតចាប់ពី ០.២៥ ដល់ ០.៣៩mg/L មានចំនួន ០១ គ្រឿង អ្នកបើកបរម៉ូតូ ០១ នាក់។ កម្រិតចាប់ពី ០.៤០ ឡើង សរុបចំនួន ០៣ គ្រឿង អ្នកបើកបរម៉ូតូ ០២ នាក់ និងបើកបររថយន្ត ០១ នាក់។

សូមបញ្ជាក់ថា ចំពោះរថយន្ត និងម៉ូតូ ដែលល្មើសច្បាប់ ហើយម្ចាស់បើកបរក្នុងស្ថានភាពមានជាតិស្រវឹងនោះ ត្រូវនាំយកមករក្សាទុកនៅអធិការដ្ឋាននគរបាលខណ្ឌដង្កោ ដើម្បីតម្រូវឲ្យម្ចាស់យានយន្តទាំងនោះ ចូលខ្លួនដោះស្រាយ និងបង់ផាកពិន័យតាមច្បាប់៕

អត្ថបទ ៖ សុភា