អាជ្ញាធរខេត្តកណ្ដាលប្រាប់ពលរដ្ឋឃុំព្រៃពួច ស្រុកអង្គស្នួល មកផ្ទៀងផ្ទាត់ឯកសារវិនិច្ឆ័យក្បាលដី

រដ្ឋបាលខេត្តកណ្ដាល ប្រកាសឱ្យប្រជាពលរដ្ឋដែលមានក្បាលដី នៅភូមិចំនួន៩ នៃឃុំព្រៃពួច ស្រុកអង្គស្នួល មកផ្ទៀងផ្ទាត់ទិន្នន័យនៃឯកសារវិនិច្ឆ័យក្បាលដី ចាប់ពីថ្ងៃទី២៤ ខែមករា ឆ្នាំ២០២៥ រហូតដល់ថ្ងៃទី០៧ ខែកុម្ភៈ ឆ្នាំ២០២៥ ជាកំណត់។

ការប្រកាសនេះ បានធ្វើឡើងដោយអភិបាលខេត្តកណ្ដាល លោក គួច ចំរើន ខណៈពេលដែលលោកអញ្ជើញជាអធិបតីក្នុងពិធីបិទផ្សាយជាសាធារណៈឯកសារវិនិច្ឆ័យការចុះបញ្ជីដីធ្លីលក្ខណៈជាប្រព័ន្ធនៅចំនួន៩ភូមិ ក្នុងឃុំព្រៃពួច ស្រុកអង្គស្នួល ខេត្តកណ្ដាល កាលពីរសៀលថ្ងៃទី២៤ ខែមករា ឆ្នាំ២០២៥ ដែលលោកបានអំពាវនាវដល់អ្នកកាន់កាប់ដី និងអ្នកពាក់ព័ន្ធទាំងឡាយ ដែលមានក្បាលដីស្ថិតនៅភូមិសាស្រ្តខាងលើ មកផ្ទៀងផ្ទាត់លើទិន្នន័យឯកសារវិនិច្ឆ័យដែលដាក់បិទផ្សាយ ហើយក្នុងករណីមានការខុសឈ្មោះ អក្ខរាវិរុទ្ធ ទំហំដី ត្រូវជំទាស់តវ៉ាលើទិន្នន័យដែលមាននៅក្នុងឯកសារវិនិច្ឆ័យ ដើម្បីធ្វើការកែសម្រួលឱ្យត្រឹមត្រូវឡើងវិញ។

ការបិទផ្សាយជាសាធារណៈឯកសារវិនិច្ឆ័យការចុះបញ្ជីដីធ្លីលក្ខណៈជាប្រព័ន្ធសម្រាប់ភូមិទាំង៩ រួមមាន ភូមិទួលលៀប ភូមិសល់ដី ភូមិត្រើយបឹង ភូមិប្របវត្ដ ភូមិទន្លាប់ ភូមិចំការស្លែង ភូមិចំបក់ទន្សាយ ភូមិក្រាំងលាវ និងនៅភូមិត្រពាំងរាំង ដែលមានចំនួន ៦ ៦៨៤ក្បាលដី។ តាមការលើកឡើងរបស់លោក គួច ចំរើន អភិបាលខេត្តកណ្ដាល ការបិទផ្សាយជាសាធារណៈនេះ គឺដើម្បីធានាបានទិន្នន័យឱ្យមានលក្ខណៈត្រឹមត្រូវ ស្របតាមច្បាប់ដោយទុកឱកាសឱ្យប្រជាពលរដ្ឋជាអ្នកកាន់កាប់ដីធ្វើការជំទាស់តវ៉ាលើទិន្នន័យដែលមាននៅក្នុងឯកសារវិនិច្ឆ័យ រួមមាន ប្លង់សុរិយោដី និងបញ្ជីឈ្មោះអ្នកកាន់កាប់ដី។

លោក បញ្ជាក់ថា ការជំទាស់តវ៉ាអាចធ្វើបានរយៈពេល១៥ថ្ងៃ ចាប់ពីថ្ងៃទី២៤ ខែមករា ឆ្នាំ២០២៥ រហូតដល់ថ្ងៃទី៧ ខែកុម្ភៈ ឆ្នាំ២០២៥ ហើយរយៈពេល គណៈកម្មការរដ្ឋបាល និងមន្ត្រីសុរិយោដី នឹងនៅប្រចាំការរាល់ថ្ងៃទាំងថ្ងៃឈប់សម្រាក និងថ្ងៃបុណ្យផ្សេងៗ ដើម្បីរង់ចាំពន្យល់ទិន្នន័យទាំងឡាយ ទទួលពាក្យបណ្តឹង ដោះស្រាយការតវ៉ា និងវិវាទផ្សេងៗ តាមការព្រមព្រៀង។ បន្ទាប់ពីលទ្ធផលនៃការបិទផ្សាយរយៈពេល១៥ថ្ងៃ ជំនាញនឹងទទួលបាននូវទិន្នន័យត្រឹមត្រូវសម្រាប់ការចេញវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋ។

លោកអភិបាលខេត្ត បន្ថែមថា រាជរដ្ឋាភិបាល ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានយកចិត្តទុកដាក់ខ្ពស់ពាក់ព័ន្ធនឹងវិស័យដីធ្លី និងជំរុញការងារចុះបញ្ជីដីធ្លីឱ្យបានចប់សព្វគ្រប់ជូនប្រជាពលរដ្ឋ។

អភិបាលខេត្តកណ្ដាល អះអាងថា ការបិទផ្សាយជាសាធារណៈឯកសារនៃការវិនិច្ឆ័យនៅពេលនេះ គឺសំដៅបំពេញនីតិវិធីឈានដល់ការចេញប័ណ្ណកម្មសិទ្ធដីធ្លី ស្របច្បាប់ជូនប្រជាពលរដ្ឋ ដើម្បីលើកកម្ពស់ជីវភាព សុខុមាលភាព និងការកាត់បន្ថយភាពក្រីក្រ ព្រមទាំងរួមចំណែកដល់ការពង្រឹងយុត្តិធម៌ និងស្ថេរភាពសង្គម គោលនយោបាយ និងយុទ្ធសាស្ត្រនានា ដើម្បីអភិវឌ្ឍសមត្ថភាពរបស់ប្រជាកសិករ និងអភិវឌ្ឍវិស័យកសិកម្ម។

ម្យ៉ាងផ្តោតលើការផ្តល់សេវាគាំទ្រនានា ព្រមទាំងគោលនយោបាយអភិវឌ្ឍជនបទ សំដៅបង្កើតឱកាសកាន់តែប្រសើរជូនប្រជាពលរដ្ឋ ក្នុងការបង្កើនចំណូលប្រចាំគ្រួសារ។ ដូច្នេះ ការបិទផ្សាយពេលនេះ គឺពិតជាបានរួមចំណែកជំរុញ និងលើកទឹកចិត្តឱ្យប្រជាពលរដ្ឋខិតខំបង្កើនផលិតភាព ក៏ដូចជាការវិនិយោគក្នុងវិស័យកសិកម្មឱ្យកាន់តែកើនឡើងថែមទៀត៕