អាជ្ញាធរណែនាំឱ្យក្រុមហ៊ុនម៉ៅការកែលម្អស្ទឹងសៀមរាបកាត់បន្ថយការរំខានដល់ប្រជាពលរដ្ឋ

អភិបាលរងខេត្តសៀមរាបលោក លី សារី បានណែនាំដល់ក្រុមហ៊ុនម៉ៅការ នៃគម្រោងស្ដារស្ទឹងចាប់ពីស្ពានគង់ម៉ុច ទៅដល់ចុងភូមិអារញ្ញ សង្កាត់សៀមរាប ធ្វើយ៉ាងកាត់បន្ថយការរំខានដល់ការរស់នៅរបស់ប្រជាពលរដ្ឋនៅក្បែរនោះ ជាពិសេសអ្នកធ្វើដំណើរជាមួយបញ្ហាដីហុយ។

លោក លី សាវី បាន​ចុះពិនិត្យគម្រោងកែលម្អស្ទឹងសៀមរាបកាលពីរសៀលថ្ងៃទី៣០ ខែមករា ឆ្នាំ២០២៥ ដោយបានណែនាំដល់ក្រុមហ៊ុនម៉ៅការ និងសំណូមពរដល់ប្រជាពលរដ្ឋដែលរស់នៅតំបន់ជុំវិញការដ្ឋាននៃគម្រោងកែលម្អស្ទឹងសៀមរាប សូមមានការយោគយល់អាធ្យាស្រ័យចំពោះបញ្ហារំខានមួយចំនួន ព្រោះនៅពេលដំណើរការសាងសង់តែងតែមានការរំខានមួយចំនួនដល់អ្នករស់នៅជុំវិញ និងធ្វើដំណើរឆ្លងកាត់ តែយ៉ាងណាយ៉ាងនឹងល្អប្រសើរឡើងវិញនូវពេលសមិទ្ធផលថ្មីរបស់ខេត្តសៀមរាបមួយនេះបានរួចរាល់។

លោកអភិបាលរងខេត្តបង្ហាញថា នាពេលខាងមុខគម្រោងកែលម្អស្ទឹងសៀមរាប នឹងក្លាយជាចំណែកធំមួយថ្មីជួយលើកកម្ពស់សោភ័ណភាពស្ទឹងសៀមរាប ហើយស្ទឹងនេះក៏ក្លាយជាប្រព័ន្ធធារាសាស្ត្រមួយដ៏សំខាន់ ក្នុងការបញ្ចៀសក្រុងសៀមរាប ពីការលិចដោយសារជំនន់ទឹកភ្លៀង។ បន្ថែមពីនោះគម្រោងនេះក៏មានការសាងសង់ផ្លូវបេតុង និងស្ពានថ្មី សម្រាប់សម្រួលនៅក្នុងការធ្វើដំណើររបស់បងប្អូនប្រជាពលរដ្ឋក្នុងមូលដ្ឋាន និងភ្ញៀវទេសចរផងដែរ។

សូមជម្រាបថា គម្រោងកែលម្អស្ទឹងសៀមរាប ដំណាក់កាលទី២ មានប្រវែង ៤.៦០០ម៉ែត្រ ដោយបានចាប់ផ្តើមការដ្ឋានជួសជុលកាលពីខែឧសភា ឆ្នាំ២០២២ ក្រោមជំនួយរបស់ប្រទេសកូរ៉េ ហើយបច្ចុប្បន្នគម្រោងនេះសម្រេចបានប្រមាណ ៨៧ភាគរយហើយ និងគ្រោងបញ្ចប់នៅខែឧសភា ឆ្នាំ២០២៥ខាងមុខនេះ៕

ដោយ គឿនវេត