លក់កាហ្វេ ភេសជ្ជៈតាម​ដង​ផ្លូវ​មួយ​ថ្ងៃ​បាន​ ៥០ ទៅ ៩០ កែវ រក​ចំណូល​បាន​ពី 20 ម៉ឺនរៀល ទៅ ៣០ ម៉ឺនរៀល ​ផ្គត់ផ្គង់គ្រួសារ

មុខរបរលក់កាហ្វេភេសជ្ជៈតាមដងផ្លូវ លក្ខណៈសាមញ្ញ តែអាចរកចំណូលសមរម្យ។

មុខរបរលក់ កាហ្វេ ភេសជ្ជៈ តាមតូបនៅតាមដងផ្លូវ ទោះបីជាមានលក្ខណៈសាមញ្ញ ប៉ុន្តែមានការគាំទ្រច្រើនពីសំណាក់បងប្អូនប្រជាពលរដ្ឋ អ្នករត់ម៉ូតូឌុប និងមន្ត្រីរាជការ។ នេះបើ​តាមការឲ្យដឹងពីលោក ស៊្រន សីហា អាយុ ៣៥ឆ្នាំ ម្ចាស់តូបកាហ្វេមួយកន្លែង ស្ថិតនៅចំនុចជាប់របងការ៉ាសប្រេងតេឡា TELA ផ្ដុំរង្វង់មូលព្រាបសរ ក្នុងសង្កាត់ក្រចេះ ក្រុងក្រចេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊្រន សីហា បានឲ្យដឹងបន្តថា លោក​បាន​ចាប់យកមុខរបរលក់ការហ្វេ និងភេសជ្ជៈគ្រប់មុខ​តាម​ដង​ផ្លូវ​នេះ អស់រយៈពេលជាង ២ឆ្នាំងមកហើយ។ ការ​​ចាប់ផ្តើមបើកលក់ដំបូង ជាមួយដើមទុកជាង ៤ ពាន់ដុល្លារ សម្រាប់ការចំណាយទូទៅ ទៅលើសម្ភារៈម៉ាស៊ីនឆុងកាហ្វេ តូប តុក និងកៅអីអង្គុយលេង ជាដើម ។

ទោះបីជាទីតាំងតូបកាហ្វេរបស់លោក លក់នៅតាមដងផ្លូវក៏ពិតមែន ប៉ុន្តែមានកន្លែងអង្គុយ មានកន្លែងទុកដាក់ម៉ូតូ និងរថយន្តសមរម្យ។

បើ​តាម​បុរស​វ័យ​ជាង ៣០ ឆ្នាំ​រូបនេះ ក្នុងមួយថ្ងៃលោក​អាចលក់កាហ្វេ ភេសជ្ជៈ ជាមធ្យមបានចន្លោះពី ៥០ កែវទៅ ៩០ កែវ និងអាចរកប្រាក់ចំណូល​ពី 20 ម៉ឺនរៀល ទៅ ៣០ ម៉ឺនរៀល ដោយក្នុង១កែវ តម្លៃ ៤ ពាន់រៀល ដែលអាចផ្គត់ផ្គង់ដល់​សេដ្ឋកិច្ចគ្រួសារប្រចាំថ្ងៃ។

នាពេលអនាគត លោក ស៊្រន សីហា មានគម្រោងនឹងពង្រីកបន្ថែមលើមុខរបរមួយនេះ ដើម្បីលើកស្ទួយជីវភាពគ្រួសារ និងអនាគតកូនៗរបស់លោកផងដែរ៕

អត្ថបទ៖ ប្រុញ វិធិន