នាវា២គ្រឿង នាំយកភ្ញៀវទេសចរជាង២ពាន់នាក់ចូលចតនៅកំពង់ផែព្រះសីហនុ

តាមសេចក្ដីរាយការណ៍ បានឱ្យដឹងថា នាវាទេសចរណ៍ចំនួន២ គ្រឿង បាននាំយកភ្ញៀវទេសចរជាង២ពាន់នាក់ចូលសំចតនៅកំពង់ផែស្វយ័តក្រុងព្រះសីហនុ ក្នុងខេត្តព្រះសីហនុ ភាគនិរតី នៃកម្ពុជា នាព្រឹកថ្ងៃទី០៦ ខែកុម្ភៈ ឆ្នាំ២០២៥ នេះ។  

ប្រភព បានឱ្យដឹងថា នៅវេលាម៉ោង៧៖៣០នាទី នាវាទេសចរណ៍ទី១ ដែលមានឈ្មោះថា នាវាឈ្មោះ Noor Dam មានបណ្តោយ២៣៨,៤៣ ម៉ែត្រ  ទទឹង ៣២.២៥ ម៉ែត្រ ផ្ទុកមាននាវឹកចំនួន ៧៨៥នាក់  បានចូលសំចតនៅកំពង់ផែស្វយ័តក្រុងព្រះសីហនុ ដោយនាំយកភ្ញៀវទេសចរចំនួន ១៩០៩នាក់ ក្នុងស្រីចំនួន៩៨៣នាក់  មកពី៤២សញ្ជាតិ។ នាវានេះ បានចូលចតនៅប្រទេសថៃ មុនចូលចតនៅក្នុងដែនសមុទ្រកម្ពុជា នៅព្រឹកនេះ រួចហើយនៅម៉ោង ៨ យប់នេះ នាវានេះ នឹងចាកចេញពីកម្ពុជា ត្រឡប់ទៅប្រទេសវៀតណាមបន្ត។

ប្រភពដដែលបានឱ្យដឹងទៀតថា  នៅវេលាម៉ោង០៩៖០០នាទី មាននាវាទេសចរណ៍មួយគ្រឿងទៀត ដែលមានឈ្មោះថា នាវាឈ្មោះ ZHAO SHANG YI DUN បណ្តោយ២៣៨. ៣០ ម៉ែត្រ  ទទឹង ២៨.៨០ ម៉ែត្រ ផ្ទុកមាននាវឹកចំនួន ៣៨០នាក់  បានចូលសំចតនៅកំពង់ផែស្វយ័តក្រុងព្រះសីហនុដោយជោគជ័យ  ដោយបាននាំយកភ្ញៀវទេសចរចំនួន ២៦៣នាក់ ក្នុងស្រីចំនួន១៤៣នាក់  មកពី២១សញ្ជាតិ។ នាវានេះ បានចូលចតនៅប្រទេសថៃ មុនចូលចតនៅក្នុងដែនសមុទ្រកម្ពុជា នៅព្រឹកនេះ។ បន្ទាប់ពីចូលចតនៅក្នុងដែនសមុទ្រកម្ពុជារយៈពេលជាង១២ម៉ោង ពោលគឺនៅម៉ោង ១០ យប់នេះ នាវានេះ នឹងចាកចេញពីកម្ពុជា ត្រឡប់ទៅប្រទេសវៀតណាមបន្តទៀត។

សូមជម្រាបបន្តិចថា ក្នុងឆ្នាំ២០២៤ កន្លងទៅ យ៉ាងហោចណាស់ មានភ្ញៀវទេសចរលើសពី៦ម៉ឺននាក់បានធ្វើដំណើរតាមផ្លូវទឹកចូលមកក្នុងប្រទេសកម្ពុជា។

គួរឱ្យដឹងថា ពេញ១ឆ្នាំ២០២៤ កម្ពុជា ទទួលបា​នភ្ញៀវទេសចរណ៍អន្តរជាតិជាង ៦,៧ លាននាក់ ​ដោយកើន​ឡើង ២២,៩ ភាគរយ បើធៀបនឹងឆ្នាំ ២០២៣ ដែលមានចំនួន ៥,៤៥ លាននាក់។ ភ្ញៀវទេស​ចរ​បរទេសមកលេងកម្ពុជា​​ច្រើនជាងគេរួមាន ភ្ញៀវទេសចរថៃ វៀតណាម ចិន ឡាវ និងអាមេរិក។ ការណ៍នេះ នាំឱ្យកម្ពុជារកចំណូលបានជាង ៣,៦៣ ពាន់លានដុល្លារ ពីភ្ញៀវទេសចរអន្តរជាតិ៕

អត្ថបទ៖ ស៊ុយ​ ចាន់ធា