មន្ត្រីសង្គមកិច្ច បន្តចុះផ្តល់សេវាសង្គមកិច្ចដល់កុមារតាមជំរុំភៀសសឹក ដែលមិនទាន់អាចវិលទៅលំនៅឋានវិញ​បាន

នៅថ្ងៃទី​១ ខែមករា ឆ្នាំ២០២៦ មន្ត្រីសង្គមកិច្ច​ជួរមុខនៃមន្ទីរសង្គមកិច្ច​ អតីតយុទ្ធជន​ និងយុវនីតិសម្បទា​ ខេត្តបន្ទាយមានជ័យ​​ ព្រះវិហារ​ ឧត្តរមានជ័យ​ ពោធិសាត់​ និងខេត្តសៀមរាប​ បានបន្តចុះផ្តល់សេវាសង្គមកិច្ច និងលេងកម្សាន្តជាមួយកុមារ នៅតាមស្តង់​កុមារមេត្រី​ (Child Friendly Space)​ តាមជំរុំភៀសសឹក​ ដែលពួកគេមិនទាន់អាចត្រឡប់ទៅលំនៅឋានវិញ​បាន។

បើតាមទំព័រហ្វេរប៊ុករបស់ ក្រសួងសង្គមកិច្ច អតីតយុទ្ធជន និងយុវនីតិសប្បទា បានឱ្យដឹងថា មន្ត្រីសង្គមកិច្ច​ នៅតែអនុវត្តសកម្មភាពជាប្រចាំរបស់ខ្លួនតាមកម្មវិធី​ រួមមាន ការប្រឹក្សាផ្លូវចិត្តបឋម​ ដល់ពលរដ្ឋនិងកុមារ នាំកុមារលេងល្បែងកម្សាន្ត​ (Play game) បង្រៀនអក្សរ​ និងលេខដល់កុមារ ណែនាំកុមារគូរូប​ និងផាត់ពណ៌ និទានរឿងកុមារស្តាប់កម្សាន្ត​ និងសកម្មភាពអប់រំផ្សេងៗទៀត។ ក្រៅពីសកម្មភាពទាំងនេះក៏មានផ្តល់អាហារសម្រន់ជូនដល់កុមារផងដែរ។

ក្រសួងបានបញ្ជាក់ថា «ដោយសារស្ថានភាពបានធូរស្រាល​នៃការអនុវត្តបទឈប់បាញ់​ ប្រជាពលរដ្ឋជាច្រើនបានត្រឡប់ទៅផ្ទះនៅភូមិឋានពួកគាត់វិញ​ ដូច្នេះ​ បច្ចុប្បន្ន​ស្តង់កុមារមេត្រី​ នៅដំណើការផ្តល់សេវាដល់កុមារ​ នៅក្នុងខេត្តចំនួន៥​ដោយឡែកខេត្តបាត់ដំបង​ និងខេត្តកោះកុង​ ស្តង់កុមារមេត្រី​ បានផ្អាកសកម្មភាពបណ្តោះអាសន្ន»។

ជាមួយគ្នាំនោះ ក្រសួងសង្គមកិច្ច ក៏បានថ្លែងអំណរគុណដល់ អង្គការដៃគូពាក់ព័ន្ធ​ ព្រមទាំងសប្បុរសជន​ ដែលចូលរួមឧបត្ថម្ភគាំទ្រសម្ភារៈសិក្សា​ សម្ភារៈ​លេងកម្សាន្ត​ អាហារសម្រន់​ និងសម្ភារៈចាំបាច់ផ្សេងទៀត​ សម្រាប់ចែកជូនដល់កុមារ​នៅតាមស្តង់កុមារមេត្រី៕