រដ្ឋបាលស្រុកភ្នំក្រវាញ ចាប់ផ្តើមផាកពិន័យ ២ម៉ឺនរៀល ដល់៤សែនរៀល ចំពោះអ្នកចោលសំរាមផ្តេសផ្តាស

រដ្ឋបាលស្រុកភ្នំក្រវាញ ខេត្តពោធិ៍សាត់ ប្រកាសនៅថ្ងៃទី១០ ខែកុម្ភៈ ឆ្នាំ២០២៥ថា នឹងចាប់ផ្តើមអនុវត្តវិធានការផាកពិន័យ តាមមាត្រា៤២ ចំពោះបុគ្គលណាដែលចោលសំរាមតាមទីកន្លែងសាធារណៈពាសវាលពាសកាល ចាប់ពី២ម៉ឺនរៀល ដល់៤សែនរៀល តាមស្ថានភាពដែលរដ្ឋបាលស្រុកបានចែង។

បើតាមរដ្ឋបាលស្រុក បុគ្គលណាដែលបោះចោលសំរាម សំណល់រឹងទីប្រជុំជននៅលើទីសាធារណៈ តាមដងផ្លូវ ទីវាល ដីកម្មសិទ្ធិ ឬទីកន្លែងដែលរដ្ឋបាលរាជធានី ក្រុង ស្រុក ខណ្ឌ បានហាមឃាត់ ត្រូវផាកពិន័យដូចជា ផាកពិន័យ ២ម៉ឺនរៀល ចំពោះអ្នកដំណើរ ឬអ្នកទេសចរ ដែលមិនសម្អាត និងប្រមូលទៅដាក់ក្នុងធុងសំរាមសាធារណៈ។ ផាកពិន័យចំនួន ៥ម៉ឺនរៀល ចំពោះអ្នកលក់ដូរតាមដងផ្លូវ លើសាធារណៈ និងត្រូវប្រមូលវេចខ្ចប់យកទៅដាក់នៅទីតាំងដែលអាជ្ញាធរបានកំណត់។ ផាកពិន័យចំនួន ១សែន ៥ម៉ឺនរៀល ចំពោះអ្នកលក់ដូរតាមភោជនីយដ្ឋាន លក់ដូរតាមផ្ទះ ទីកន្លែងកម្សាន្ត និងត្រូវប្រមូលសំរាមយកទៅដាក់ទីតាំងដែលអាជ្ញាធរបានកំណត់។ ចំពោះអាជីវករតាមទីផ្សារ សេវាកម្ម អាជីវកម្ម សិប្បកម្ម ត្រូវផាកពិន័យ ២សែនរៀល ហើយត្រូវទទួលខុសត្រូវលើការប្រមូល សំអាត និងដឹកសំរាមយកទៅទីលាន។ ផាកពិន័យ ៤សែនរៀល ចំពោះរោងចក្រ សហគ្រាស ក្រុមហ៊ុន និងត្រូវទទួលខុសត្រូវលើការសំអាត និងប្រមូលសំរាមទៅទីលានដូចគ្នា។

សូមជម្រាបថា ការដាក់ចេញនូវវិធានការបែបនេះ បន្ទាប់ពីរដ្ឋបាលស្រុកភ្នំក្រវាញសង្កេតឃើញថា ទោះបីជាមានការអប់រំ ណែនាំ ផ្សព្វផ្សាយជាញឹកញាប់ស្តីពីការចោលសំរាម អនាម័យបរិស្ថានយ៉ាងណា ក៏នៅតែឃើញមានប្រជាពលរដ្ឋ និងម្ចាស់អាជីវកម្មមួយចំនួន យកសំរាមទៅចោលពាសវាលពាសកាលតាមដងផ្លូវ ដែលនាំឱ្យប៉ះពាល់ដល់បរិស្ថាន សុខភាពពលរដ្ឋ និងសោភណភាពស្រុកផងដែរ។

ក្នុងករណីដែលមិនរាងចាល ត្រូវទទួលការពិន័យអន្តរការណ៍ជាទឹកប្រាក់ទ្វេដងនៃការពិន័យលើកមុន។ ហេតុនេះ រដ្ឋបាលស្រុក សង្ឃឹមថា ពលរដ្ឋគ្រប់រូបចូលរួមអនុវត្តតាមសេចក្តីប្រកាសនេះ និងរួមគ្នារក្សាសណ្តាប់ធ្នាប់ អនាម័យ សោភណភាពស្រុកភ្នំក្រវាញឱ្យកាន់តែល្អប្រសើរ៕