វិមានឈ្នះឈ្នះ និងសួនតេជោសន្តិភាព នឹងកើតមានឡើងនៅលើទឹកដីខេត្តបាត់ដំបង

នៅពេលខាងមុខនេះ សួនតេជោសន្តិភាព និងវិមានឈ្នះឈ្នះ តាមបែបខ្នាតបង្រួមនឹងកើតមានឡើងនៅលើទឹកដីខេត្តបាត់ដំបង ដែលការងារនេះ គឺរដ្ឋបាលខេត្តជាអ្នកគ្រោងផ្ដួចផ្ដើមឡើង នៅលើផ្ទៃដីជាង ១.០០០ ម៉ែត្រក្រឡា ប្របតាមបណ្ដោយដងស្ទឹងសង្កែ។

ថ្មីៗនេះរដ្ឋបាលខេត្តបាត់ដំបងបានចេញសេចក្តីជូនដំណឹង ស្ដីពីការរៀបចំសួនតេជោសន្តិភាព នៅចំពីមុខវត្តកណ្ដាល ដោយសួននេះ ត្រូវរៀបចំចាប់ពីក្បាលស្ពានសម្ដេចក្រឡាហោម ទៅទល់នឹងស្ពានថ្មថ្មីក្រៅខាងកើត ដែលមានប្រវែង ៩៩៤ ម៉ែត្រ និងមានផ្ទៃក្រឡាសរុបចំនួន ១៦.០៧៤ ម៉ែត្រក្រឡា ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ។

រដ្ឋបាលខេត្តបានបញ្ជាក់ថា ការសាងសង់វិមានឈ្នះឈ្នះខ្នាតបង្រួម និងរៀបចំជាសួនតេជោសន្តិភាពនេះ ក្នុងគោលបំណងដ៏ធំបំផុតដើម្បីពន្យល់ និងរំលេចពីគុណតម្លៃនយោបាយឈ្នះ ឈ្នះ របស់សម្ដេចអគ្គមហាសេនាបតីតេជោ ហ៊ុន សែន ដែលបាននាំមកនូវសន្តិភាព ស្ថេរភាព ការឯកភាពជាតិពេញលេញ និងការអភិវឌ្ឍន៍លើគ្រប់វិស័យ ដែលសួននេះ និងក្លាយជាសំណង់ស្ថាបត្យកម្មថ្មីមួយ ដែលជាមែក ធាង ចង្កោមយុទ្ធសាស្ត្រ នយោបាយឈ្នះ ឈ្នះ ដែលបង្រួមសមល្មមទៅនឹងទំហំដើមនៃវិមានឈ្នះ ឈ្នះ ប្រកបដោយអត្ថន័យស៊ីជម្រៅ។

រដ្ឋបាលខេត្តបានសង្កត់ធ្ងន់ថា គម្រោងសំណង់នេះ គឺបម្រើឲ្យប្រយោជន៍សាធារណៈ និងប្រជាពលរដ្ឋទូទៅក្នុងសម័យតេជោសន្តិភាព ហើយការសាងសង់នេះក៏ស្ថិតនៅលើដីរដ្ឋដោយមិនមែនលើដីឯកជនណាមួយឡើយ។ ទន្ទឹមនេះរដ្ឋបាលខេត្ត នឹងគិតគូរពីសុខមាលភាពរបស់ប្រជាពលរដ្ឋក្រោមកម្មវិធីនយោបាយយុទ្ធសាស្ត្របញ្ចកោណដំណាក់កាលទី១ ក្រោមការដឹកនាំដ៏ខ្ពង់ខ្ពស់ និងឆ្លាតវៃ របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ហើយសួនដ៏វែងអន្លាយនេះ នឹងត្រូវរៀបចំឲ្យមានផ្លូវសម្រាប់ដើរហាត់ប្រាណ ផ្លូវសម្រាប់​ជិះកង់ និងទីតាំងសម្រាប់អង្គុយលំហែកម្សាន្តស្រូបយកខ្យល់អាកាសដ៏បរិសុទ្ធ ព្រមទាំងប្រែក្លាយឲ្យទៅជាទីក្រុងស៊ីវីល័យ៕

អត្ថបទ៖ សោ និយមរ័ត្ន