ព័ត៌មានជាតិ

សហគមន៍តំបន់ការពារធម្មជាតិចំនួន ៣០ ក្នុងតំបន់ជួរភ្នំក្រវាញ ចូលអនុវត្តយុទ្ធសាស្រ្តចក្រាវិស័យបរិស្ថាន

បានផុស

១ year មុន

នៅ

ថ្ងៃព្រហស្បតិ៍ ២០ កុម្ភៈ ២០២៥

ដោយ

សហគមន៍តំបន់ការពារធម្មជាតិចំនួន ៣០ ដែលស្ថិតក្នុងតំបន់ទេសភាពជួរភ្នំក្រវាញ បាននិងកំពុងចូលរួមជាមួយក្រសួងបរិស្ថាន ក្នុងការអនុវត្តយុទ្ធសាស្ត្រចក្រាវិស័យបរិស្ថាន (២០២៣-២០២៨)។

សហគមន៍តំបន់ការពារធម្មជាតិទាំង ៣០ នោះ ស្ថិតក្នុងខេត្តកំពង់ឆ្នាំង, ពោធិ៍សាត់, បាត់ដំបង, សៀមរាប, កំពង់ស្ពឺ, និងខេត្តកោះកុង បានចូលរួមអនុវត្តយុទ្ធសាស្រ្តចក្រាវិស័យបរិស្ថាន ដើម្បីធានបាននូវ «ភាពស្អាត ភាពបៃតង និងចីរភាព» ក្រោមការគាំទ្ររបស់គម្រោង «និរន្តរភាពតំបន់ទេសភាព និងទេសចរណ៍ធម្មជាតិកម្ពជា-CSLEP»។ ក្រៅពីនេះ ក៏បានកំពុងចូលរួមក្នុងយុទ្ធនាការ «កម្ពុជាស្អាត ខ្មែរធ្វើបាន» យុទ្ធនាការ «ដាំដើមឈើឡើងវិញ» យុទ្ធនាការ«ថ្ងៃនេះ ខ្ញុំមិនប្រើថង់ប្លាស្ទិកទេ» និងការចូលរួមល្បាត ការពារព្រៃ រៀបចំផ្លូវភ្លើង ការពារភ្លើងឆេះព្រៃ ការៀបចំគោលដៅលំហែបៃតង និងជម្រើសមុខរបរនានា ដែលមានមេត្រីជាមួយនឹងការអភិរក្ស។

លោក ឃិន ម៉េងឃាង ប្រធាននាយកដ្ឋានទេសចរណ៍ធម្មជាតិ និងជាប្រធានគ្រប់គ្រងគម្រោង CSLEP បានលើកឡើងថា គម្រោង CSLEP បានចូលរួមពង្រឹងការគ្រប់គ្រងតំបន់ការពារធម្មជាតិ និងការពង្រឹងនូវឱកាសក្នុងការអភិវឌ្ឍទេសចរណ៍ធម្មជាតិ និងខ្សែច្រវាក់អនុផលព្រៃឈើ នៅក្នុងតំបន់ការពារធម្មជាតិចំនួន ៧ នៅតំបន់ទេសភាពជួរភ្នំក្រវាញ និងតំបន់បឹងទន្លេសាប ដោយបានគាំទ្រយ៉ាងសកម្មលើការអនុវត្តយុទ្ធសាស្រ្តចក្រាវិស័យបរិស្ថាន ២០២៣-២០២៨។

ជាក់ស្តែងនៅឆ្នាំ២០២៥ គម្រោងបានគាំទ្រនូវការសាងសង់ផ្លូវប្រវែង ៩០ គីឡូម៉ែត្រ ក្នុងដំណាក់កាលទី១ រៀបចំប្រព័ន្ធទឹកប្រើប្រាស់សម្រាប់សហគមន៍តំបន់ការពារធម្មជាតិចំនួន ១ កំពុងចូលរួមសាងសង់ថ្នាលបណ្តុះកូនឈើថ្នាក់តំបន់ ១ទីតាំងនៅឧទ្យានជាតិព្រះជ័យវរ្ម័ន នរោត្តម «ភ្នំគូលែន» ការសាងសង់ហេដ្ឋារចនាសម្ព័ន្ធ និងសម្បទាទេសចរណ៍នៅសហគមន៍តំបន់ការពារធម្មជាតិ ចំនួន ១១ ទីតាំង និងការពង្រឹងការគ្រប់គ្រងតំបន់ការពារធម្មជាតិ។ គម្រោងបាន និងកំពុងគាំទ្រការដាំស្តារព្រៃឈើ ចំនួន ១០០០ ហិកតា នៅដែនជម្រកសត្វព្រៃភ្នំឱរ៉ាល់ និងភ្នំសំកុស រួមនឹងការការពារភ្លើងឆេះព្រៃ ការល្បាត និងពង្រឹងការអនុវត្តច្បាប់។

បច្ចុប្បន្ន មានសហគមន៍ចំនួន ១១ កំពុងទទួលបាននូវការគាំទ្រការអភិវឌ្ឍន៍ហេដ្ឋារចនាសម្ព័ន្ធតភ្ជាប់ទៅតំបន់គោលដៅលំហែបៃតង សម្បទាទេសចរណ៍ធម្មជាតិ ទឹកស្អាតអនាម័យ ការកែច្នៃឫស្សី និងអនុផលព្រៃឈើផ្សេងទៀត៕