ព័ត៌មានជាតិ

ក្រសួងការងារ និងមន្ទីរពេទ្យព្រះអង្គឌួង រួមគ្នាដោះស្រាយបញ្ហាកកស្ទះខ្លាំង នៃការចូលប្រើសេវាសមាជិក ប.ស.ស

បានផុស

៤ ខែ មុន

នៅ

ថ្ងៃចន្ទ ១០ មីនា ២០២៥

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ និងមន្ទីរពេទ្យព្រះអង្គឌួង បានរួមគ្នាដោះស្រាយការកកស្ទះខ្លាំង នៃការចូលប្រើប្រាស់សេវារបស់សមាជិក ប.ស.ស នៅមន្ទីរពេទ្យ ដើម្បីធ្វើយ៉ាងណាផ្តល់សេវាឱ្យបានទាន់ពេលវេលា និងមានគុណភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រជុំដោះស្រាយនេះបានធ្វើឡើងបន្ទាប់ពីមានការកើនឡើងយ៉ាងគំហុក នៃការចូលទៅប្រើប្រាស់សេវារបស់សមាជិក ប.ស.ស ដែលបង្កឱ្យមានការកកស្ទះខ្លាំង និងធ្វើឱ្យមានភាពយឺតយ៉ាវក្នុងការផ្តល់សេវា។

ដើម្បីដោះស្រាយបញ្ហាការកកស្ទះខ្លាំង សមាជិក ប.ស.ស ទៅទទួលសេវានៅពេទ្យព្រះអង្គឌួងនេះ កាលពីព្រឹកថ្ងៃទី ១០ ខែមីនា ឆ្នាំ ២០២៥ ថ្នាក់ដឹកនាំក្រសួងការងារ និងបណ្ដុះបណ្ដាលវិជ្ជាជីវៈ ដឹកនាំដោយលោក គួច សុមាន រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ និងលោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស បានជួបពិភាក្សាការងារជាមួយ ថ្នាក់ដឹកនាំមន្ទីរពេទ្យព្រះអង្គឌួង ដឹកនាំដោយ លោកសាស្ត្រាចារ្យរង លូ លីឃាង នាយកមន្ទីរពេទ្យព្រះអង្គឌួង ដើម្បីពិនិត្យ និងពិភាក្សារកដំណោះស្រាយលើបញ្ហាប្រឈមមួយចំនួនពាក់ព័ន្ធនឹងការផ្តល់សេវាជូនសមាជិក ប.ស.ស នៅមន្ទីរពេទ្យរដ្ឋដ៏ធំមួយនេះ។

ជំនួបពិភាក្សារវាងថ្នាក់ដឹកនាំក្រសួងការងារ និងបណ្ដុះបណ្ដាលវិជ្ជាជីវៈ និងថ្នាក់ដឹកនាំមន្ទីរពេទ្យព្រះអង្គឌួងនេះ ដើម្បីជំរុញការផ្តល់សេវាជូនសមាជិក ប.ស.ស ឱ្យបានទាន់ពេលវេលា និងមានគុណភាព។

ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ និងមន្ទីរពេទ្យព្រះអង្គឌួង នឹងបន្តកិច្ចសហការជាមួយគ្នាបន្ថែមទៀត ធ្វើយ៉ាងណាសម្រួលដល់ការផ្តល់សេវាជូនសមាជិក ប.ស.ស ឱ្យបានគ្រប់ៗ គ្នា និងទាន់ពេលវេលា បើទោះបីជាមានប្រជាពលរដ្ឋដែលជាសមាជិក ប.ស.ស មកទទួលសេវាមានការកើនឡើងច្រើនយ៉ាងណាក៏ដោយ។

គួរបញ្ជាក់ថា កិច្ចពិភាក្សាខាងលើនេះ ប្រព្រឹត្តទៅដោយផ្ទាល់នៅមន្ទីរពេទ្យព្រះអង្គឌួង ដោយមានការអញ្ជើញចូលរួមពីថ្នាក់ដឹកនាំក្រសួងការងារ និងបណ្ដុះបណ្ដាលវិជ្ជាជីវៈ ថ្នាក់ដឹកនាំ ប.ស.ស និងថ្នាក់ដឹកនាំមន្ទីរពេទ្យសរុបប្រមាណជាង ១០ រូប៕

អត្ថបទ ៖ សំអឿន