នាយករដ្ឋមន្ត្រី៖ ក្ដីស្រលាញ់និងការគោរពគ្នាទៅវិញទៅមក គឺគ្មានឋានៈតួនាទីទេ

នាយករដ្ឋមន្ត្រីបានបង្ហោះរូបភាពមួយសន្លឹកមួយសន្លឹក ដែលធ្វើឱ្យមនុស្សស្ទើគ្រប់គ្នាមានអារម្មណ៍កក់ក្ដៅ និងរីករាយនៅថ្ងៃសៅរ៍ចុងសប្ដាហ៍នេះ អមជាមួយនឹងសំណេរថា «សេចក្តីស្រឡាញ់និងការគោរពគ្នាទៅវិញទៅមក គឺគ្មានឋានៈឬតួនាទីទេ»។

រូបភាពដែលសម្ដេចធិបតី ហ៊ុន ម៉ាណែត បង្ហោះនៅព្រឹកថ្ងៃទី១៥ ខែមីនានេះ គឺរូបសម្ដេចអោបជាមួយស្ដ្រីម្នាក់ដែលទឹកមុខអ្នកទាំងពីរពោពេញដោយភាពរីករាយ។ ហើយអ្វីដែលនៅពីក្រោយរូបភាពមួយសន្លឹកនេះសម្ដេចបានសរសេរថា៖ «អ៊ំស្រីគាត់សួរថា ខ្ញុំអនាម័យអាចអោបបានអត់? ខ្លាចមានក្លិនមិនល្អលើក្មួយ។ ចម្លើយរបស់ខ្ញុំគឺដូចក្នុងរូបមួយសន្លឹកនេះ»។

សម្ដេចធិបតី ហ៊ុន ម៉ាណែត បានក្លាយជានាយករដ្ឋមន្ត្រីកម្ពុជានៅថ្ងៃទី២២ ខែសីហា ឆ្នាំ២០២៣។ ភាពជោគជ័យរបស់សម្ដេចធិបតីគឺជាកិច្ចខិតខំប្រឹងប្រែងនៃការបង្ហាត់ប​ង្រៀនរបស់សម្ដេចតេជោធ្វើឱ្យកូនមានទាំងចំណេះដឹង និងសីលធម៌ក្នុងសង្គម។

សម្ដេចតេជោ ហ៊ុន សែន បានបង្ហោះលើបណ្ដាញសង្គមរបស់សម្ដេចកាលពីថ្ងៃទី១៣ ខែមីនា ថាភាពជោគជ័យរបស់កូនៗសម្ដេចគឺជាជោគជ័យនៃការអប់រំបណ្តុះបណ្តាលកូនៗដែលសម្ដេច និងសម្ដេចកិត្តិព្រឹទ្ធបណ្ឌិតប្រើពេលជាង៤០ឆ្នាំ។ សម្ដេចតេជោបានរម្លឹកថាទោះបីជាកូននាយករដ្ឋមន្ត្រីក៏ដោយតែកូនៗត្រូវស្គាល់ជីវភាពរបស់ប្រជាជនធម្មតា មានវិន័យ គុណធម៌ ចរិយាធម៍ សិលធម៌ចេះជួយអ្នកក្រីក្រ ទន់ខ្សោយ គោរពចាស់ទុំ សុភាពរាបសារ មិនឆ្មើងឆ្មៃ៕

អត្ថបទដោយ ហ៊ុន សិរីវឌ្ឍន៍