ព័ត៌មានជាតិ

រដ្ឋមន្ត្រីការបរទេសតូហ្គោ បញ្ជាក់ពីបំណងពង្រីកការតភ្ជាប់ពាណិជ្ជកម្មជាមួយកម្ពុជា

បានផុស

១ សប្តាហ៍ មុន

នៅ

ថ្ងៃសុក្រ ២១ មីនា ២០២៥

ដោយ

តូហ្គោ បានបញ្ជាក់ពីបំណងស្វែងរកឱកាសពង្រីកកិច្ចសហប្រតិបត្តិការជាមួយកម្ពុជា ជាពិសេសលើវិស័យសេដ្ឋកិច្ច ពាណិជ្ជកម្ម ខណៈពេលដែលកម្ពុជា បាននិងកំពុងបន្តការអភិវឌ្ឍរីកចម្រើនយ៉ាងឆាប់លើគ្រប់វិស័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនូវបំណងនេះ គឺធ្វើឡើងតាមរយៈលោក Robert DUSSEY រដ្ឋមន្ត្រីការបរទេស សមារណកម្មតំបន់ និងប្រជាជនតូហ្គោនៅបរទេសនៃសាធារណរដ្ឋតូហ្គោ ក្នុងពេលចូលជួបសម្តែងការគួរសម និងពិភាក្សាការងារជាមួយសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅវិមានសន្តិភាព កាលពីរសៀលថ្ងៃទី២០ ខែមីនា ឆ្នាំ២០២៥។

លោករដ្ឋមន្ត្រី Robert DUSSEY បានសម្ដែងនូវការអបអរសាទរចំពោះការអភិវឌ្ឍរីកចម្រើនយ៉ាងឆាប់រហ័សលើគ្រប់វិស័យរបស់កម្ពុជា និងបានអបអរសាទរចំពោះកម្ពុជាដែលនឹងធ្វេីម្ចាស់ផ្ទះនៃកិច្ចប្រជុំកំពូលហ្រ្វង់កូហ្វូនីលេីកទី២០ នៅឆ្នាំ២០២៦ ហើយលោកបានបញ្ជាក់ពីការគាំទ្រដល់កម្ពុជាក្នុងការរៀបចំកិច្ចប្រជុំកំពូលនេះឱ្យទទួលបានជោគជ័យ។

រដ្ឋមន្ត្រីការបរទេសតូហ្គោ ក៏បានជម្រាបសម្ដេចធិបតី ពីសមិទ្ធផលនៃកិច្ចសហប្រតិបត្តិការរវាងក្រសួងការបរទេសតូហ្គោ និងក្រសួងការបរទេសកម្ពុជា ព្រមទាំងអំពីលទ្ធផលប្រកបដោយផ្លែផ្កានៃជំនួបរវាងក្រសួង-ស្ថាប័នពាក់ព័ន្ធរបស់កម្ពុជា ដេីម្បីសិក្សា និងស្វែងរកនូវកាលានុវត្តភាពក្នុងការពង្រីកកិច្ចសហប្រតិបត្តិការ ក៏ដូចជាការផ្សារភ្ជាប់នូវទំនាក់ទំនងរវាងសភាពាណិជ្ជកម្មនៃប្រទេសទាំងពីរ។

ជាការឆ្លើយតប សម្ដេចធិបតី ហ៊ុន ម៉ាណែត បានអរគុណចំពោះរដ្ឋាភិបាលតូហ្គោ ដែលបានគាំទ្រកម្ពុជានៅក្នុងការធ្វើជាម្ចាស់ផ្ទះនៃការរៀបចំកិច្ចប្រជុំកំពូលហ្រ្វង់កូហ្វូនី លេីកទី២០ នៅឆ្នាំ២០២៦ ហើយសម្ដេច បានគូសបញ្ជាក់ពីទំនាក់ទំនងការទូតរវាងកម្ពុជា និងតូហ្គោ ក្នុងរយៈពេល១៥ឆ្នាំកន្លងមកនេះ គឺកំពុងតែមានភាពសកម្មឡើង ដែលសម្រេចបាននូវលទ្ធផលដ៏ល្អនៃកិច្ចសហប្រតិបត្តិការរបស់ក្រសួងការបរទេសទាំងពីរ។

សម្តេចធិបតីនាយករដ្ឋមន្ត្រី ក៏បានគូសបញ្ជាក់ទៅកាន់ប្រតិភូតូហ្គោផងដែរថា កម្ពុជា និងតូហ្គោ មានវិស័យសក្ដានុពលជាច្រើនទៀត ក្នុងពង្រីកកិច្ចសហប្រតិបត្តិការជាមួយគ្នា ទាំងក្នុងក្របខណ្ឌរាជរដ្ឋាភិបាល និងរដ្ឋាភិបាល វិស័យឯកជន និងឯកជន ក៏ដូចជាការតភ្ជាប់រវាងប្រជាជន និងប្រជាជន។

ត្រង់ចំណុចនេះ សម្ដេចធិបតី និងរដ្ឋមន្ត្រីតូហ្គោ ក៏បានពិភាក្សាស្វែងយល់ និងចែករំលែកនូវបទពិសោធក្នុងការអភិវឌ្ឍប្រទេសទៅលើវិស័យសំខាន់ៗមួយចំនួន ជាអាទិ៍៖ សេដ្ឋកិច្ច ពាណិជ្ជកម្ម វិនិយោគ, កសិកម្ម, ថាមពលស្អាត និងអប់រំ ជាដើម។

ជាការកត់សម្គាល់ ដំណើរទស្សនកិច្ចផ្លូវការរបស់លោក Robert DUSSEY រដ្ឋមន្ត្រីការបរទេសតូហ្គោ នៅកម្ពុជា គឺតបតាមការអញ្ជើញរបស់រដ្ឋមន្ត្រីការបរទេសកម្ពុជា លោក ប្រាក់ សុខុន។ ក្នុងដំណើរទស្សនកិច្ចនៅកម្ពុជា ក្រៅពីជួបជាមួយសម្ដេចធិបតី ហ៊ុន ម៉ាណែត និងសមភាគី គឺលោក ប្រាក់ សុខុន, លោក Robert DUSSEY ក៏បានចូលជួបជាមួយថ្នាក់ដឹកនាំក្រសងស្ថាប័នមួយចំនួនទៀត ជាអាទិ៍ រដ្ឋមន្ត្រីពាណិជ្ជកម្ម រដ្ឋមន្រ្តីឧស្សាហកម្ម ក្នុងគោលបំណងជជែកគ្នាពីការស្វែងរកការពង្រឹងពង្រីកទំនាក់ទំនងជាមិត្តភាពរវាងប្រទេសទាំងពីរ កម្ពុជា និងតូហ្គោ៕