មន្ត្រីជាន់ខ្ពស់នគរបាលជាតិ ទទូចឱ្យពលរដ្ឋប្រុងប្រយ័ត្នល្បិចបោក កុំផ្ទេរលុយមុនអីវ៉ាន់មកដល់ដៃ

ជាថ្មីម្ដងទៀត មន្ត្រីជាន់ខ្ពស់នគរបាលជាតិ បានទទូច និងក្រើនរម្លឹកដល់ប្រជាពលរដ្ឋដែលនិយមបញ្ជាការទិញឥវ៉ាន់តាមអនឡាញ ឱ្យប្រុងប្រយ័ត្នល្បិចបោករបស់ជនខិលខូច ពោលគឺកុំផ្ទេរលុយលឿនពេកមុនអីវ៉ាន់មកដល់ដៃ។

ការក្រើនរម្លឹករបស់មន្ត្រីជាន់ខ្ពស់នគរបាលជាតិ គឺបានធ្វើឡើងក្រោយទទួលបានព័ត៌មានថា នៅតែមានប្រជាពលរដ្ឋបន្តបន្ទាប់បានបន្តចាញ់បោកជនបោកប្រាស់លើបណ្តាញសង្គមអនឡាញ ដែលតម្រូវឱ្យការកម្មង់ទិញអីវ៉ាន់ត្រូវបង់លុយមុន ប៉ុន្តែមិនទទួលបានឥវ៉ាន់ តាមការបញ្ជាទិញឡើយ។

ប្រធាននាយកដ្ឋាននគរបាលទេសចរណ៍ នៃអគ្គស្នងការដ្ឋាននគរបាលជាតិ ឧត្តមសេនីយ៍ឯក រុន រ័ត្នវាសនា បញ្ជាក់ថា «ការផ្ទេរប្រាក់ ជាពិសេសទំនិញដែលមិនទាន់មកដល់ដៃយើង ឬក៏មិនទាន់មានទំនិញឱ្យនេះ យើងមិនគួរផ្ទេរប្រាក់មុនទេ»។

លោកឧត្តមសេនីយ៍ឯក រុន រ័ត្នវាសនា ចាត់ទុកថា នេះជាល្បិចឆបោករបស់ជនខិលខូចប៉ុណ្ណោះ ហើយករណីបែបនេះ ក៏មិនមែនជារឿងថ្មីទើបនឹងកើតមានឡើងទេ តែជាករណីឆបោកបានកើតឡើងយូរមកហើយ។ ក្នុងន័យនេះ តាមរយៈឃ្លីបវីដេអូប្រមាណ២នាទី លោកឧត្តមសេនីយ៍ឯក ប្រធាននាយកដ្ឋាននគរបាលទេសចរណ៍ បានប្រាប់ទៅកាន់ពលរដ្ឋឱ្យគិតពិចារណាឡើងវិញ កុំជឿជាក់ និងផ្ទេរប្រាក់លឿនពេក បើមិនដូច្នេះនឹងធ្វើឱ្យខាតបង់ប្រាក់ និងធ្លាក់ទៅក្នុងល្បិចឆបោករបស់ជនបន្លំទាំងនោះ។

កន្លងទៅ ដោយសង្កេតឃើញករណីកើតមានច្រើន លោកឧត្តមសេនីយ៍ឯក រុន រ័ត្នវាសនា ក៏បានលើកចិត្តឱ្យពលរដ្ឋដាក់ពាក្យបណ្តឹងមកកាន់នាយកដ្ឋាននគរបាលទេសចរណ៍ ក្នុងករណីចាញ់បោកជនខិលខូចលើបណ្តាញសង្គមអនឡាញ ដែលបញ្ជាទិញអីវ៉ាន់ ប៉ុន្តែមិនទទួលបានអីវ៉ាន់នោះ៕