ព័ត៌មានជាតិ

នាយករដ្ឋមន្រ្តីកម្ពុជា បញ្ជាក់ពីការដាក់ពន្ធអាមេរិកលើទំនិញកម្ពុជា និងដំណោះស្រាយចរចាជាមួយអាមេរិក

បានផុស

១ year មុន

នៅ

ថ្ងៃអាទិត្យ ២៧ មេសា ២០២៥

ដោយ

សម្តេចធិបតីនាយករដ្ឋមន្រ្តីកម្ពុជាបានថ្លែងបញ្ជាក់ពីការដាក់ពន្ធរបស់អាមេរិកលើទំនិញកម្ពុជាដល់ ៤៩% ខណៈដែលមានការបកស្រាយខុសៗគ្នាពីការគិតពន្ធខ្ពស់នេះលើប្រទេសកម្ពុជា។

សម្ដេចធិបតី ហ៊ុន ម៉ាណែត បានពន្យល់ថា ការដាក់ពន្ធរហូតដល់ ៤៩% នេះ គឺដោយសារកម្ពុជាបាននាំចេញទំនិញទៅអាមេរិកជាង ១៣ ពាន់លានដុល្លារ ខណៈទំនិញអាមេរិកនាំចូលមកកម្ពុជាមានប្រមាណ ៣០០ លានដុល្លារប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងពិធីជួប “សំណេះសំណាលជាមួយថ្នាក់ដឹកនាំអង្គការវិជ្ជាជីវៈ ក្នុងឱកាសខួបអនុស្សាវរីយ៍លើកទី១៣៩ ទិវាពលកម្មអន្តរជាតិ ១ ឧសភា” នៅព្រឹកមិញនេះ សម្តេចធិបតីបានអះអាងថា ដោយសារឧនភាពសេដ្ឋកិច្ចរវាងអាមេរិកនេះ ទើបមានការកំណត់ពន្ធរហូតដល់ ៤៩% លើការនាំចេញទំនិញពីកម្ពុជាទៅអាមេរិក។

សម្ដេចធិបតីបានពន្យល់ថា កម្ពុជាមិនអាចធ្វើពាណិជ្ជកម្មស្មើភាពជាមួយអាមេរិកបានទេ ដោយសារអំណាចទិញរបស់អាមេរិកធំជាងកម្ពុជា។ សម្តេចបានអះអាងថា កម្ពុជាបានគិតពន្ធខ្ពស់លើទំនិញអាមេរិកមួយចំនួនដូចជាស្រាដល់ ៣៥% ខណៈទំនិញខ្លះគិតពន្ធសូន្យភាគរយក៏មានដែរ។

ជាមធ្យមកម្ពុជាដាក់ពន្ធលើទំនិញអាមេរិកប្រហែល ២៩% ខណៈដែលអាមេរិកដាក់ពន្ធលើទំនិញកម្ពុជាជាមធ្យមប្រមាណ ១០%។ សម្តេចបានបញ្ជាក់ថា ការដាក់ពន្ធលើផលិតផលអាមេរិកខ្ពស់ ដោយសារទំនិញនាំចូលរបស់អាមេរិកមួយៗមានតម្លៃខ្ពស់ដូចជាត្រាក់ទ័រ គោយន្តអីជាដើម។

កម្ពុជាអនុវត្តតាមច្បាប់ តាមគោលការណ៍របស់អង្គការពាណិជ្ជកម្មពិភពលោក។ បើតាមប្រមុខរដ្ឋាភិបាល កម្ពុជាគ្មានជម្រើសទេ មានតែខិតខំការពារផលប្រយោជន៍ជាតិនិងប្រយោជន៍ឆ្នាំងបាយរបស់កម្មករ។

ការសម្រេចចិត្តនេះជាសិទ្ធិរបស់អាមេរិក។ សម្តេចបានអះអាងថា ក្រោយ ៣៧ ម៉ោង ដែលអាមេរិកប្រកាសដាក់ពន្ធ កម្ពុជាបានបង្ហាញឆន្ទៈក្នុងការចូលរួមដោះស្រាយ។ នៅថ្ងៃ ១៦ មេសា រដ្ឋាភិបាលបានចាត់តំណាងចូលជួបមន្ត្រីអាមេរិក ដើម្បីចរចាដោយឈរលើគោលការណ៍ស្មើភាពគ្នា និងគិតគូរផលប្រយោជន៍គ្នាទៅវិញទៅមក។

បើទោះបីជាការដំឡើងពន្ធរបស់អាមេរិកនឹងវិវឌ្ឍន៍បែបណាក៏ដោយ បើតាមមេដឹកនាំកម្ពុជា រដ្ឋាភិបាលនឹងប្រឹងប្រែងដើម្បីការពារផលប្រយោជន៍ប្រជាជនកម្ពុជា ខណៈសម្តេចមើលឃើញថាការជម្នះបានបញ្ហាពាណិជ្ជកម្មនាពេលនេះ នឹងធ្វើឱ្យកម្ពុជាកាន់តែរឹងមាំ៕

Related Topics:សម្ដេចធិបតី ហ៊ុន ម៉ាណែត