ព័ត៌មានជាតិ

ផ្លូវពីរខ្សែប្របតាមមាត់ទន្លេក្នុងខេត្តក្រចេះ ប្រវែងជាង ៤៩ គីឡូម៉ែត្រ អ៊ុតកៅស៊ូបញ្ចប់ ១០០%

បានផុស

១ year មុន

នៅ

ថ្ងៃអង្គារ ៦ ឧសភា ២០២៥

ដោយ

ផ្លូវខេត្តចំនួនពីរខ្សែក្នុងខេត្តក្រចេះគឺផ្លូវខេត្តលេខ ៣៧៧ និងផ្លូវខេត្តលេខ ៣៧៧A បានស្ថាបនាបញ្ចប់ ១០០%។ នេះបើតាមការបញ្ជាក់ឲ្យដឹងរបស់មន្ទីរសាធារណៈការ និងដឹកជញ្ជូនខេត្តក្រចេះ។

ផ្លូវខេត្តលេខ ៣៧៧ មានប្រវែង ៣៥.៥ គីឡូម៉ែត្រ តភ្ជាប់ចាប់ពីរង្វង់មូលព្រាបសក្នុងក្រុងក្រចេះឆ្ពោះទៅស្រុកសំបូរ និងផ្លូវខេត្តលេខ ៣៧៧A មានប្រវែង ១៣,៦ គីឡូម៉ែត្រ ចាប់ពីផ្សារសណ្តាន់ ឃុំសណ្តាន់ តភ្ជាប់ទៅភូមិសង្គម ឃុំសណ្តាន់ នៃស្រុកសំបូរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវខេត្តទាំង ២ ខ្សែនេះ បានសម្ពោធបើកការដ្ឋានសាងសង់កាលពីថ្ងៃទី ៤ ខែមេសា ឆ្នាំ២០២៣ ដោយត្រូវស្តារពង្រីក និងលើកកម្រិតគុណភាពជាប្រភេទផ្លូវក្រាលបេតុងកៅស៊ូ AC រួមទាំងត្រូវសាងសង់ស្ពានថ្មីចំនួន ៩ កន្លែងថែមទៀត។

លោក ភុំ សោភណ្ឌ ជាប្រជាពលរដ្ឋរស់នៅសង្កាត់ក្រគរ ក្រុងក្រចេះបានឲ្យដឹងថា លោកមានការត្រេកអរជាខ្លាំង នៅពេលដែលមានផ្លូវស្អាត ការធ្វើដំណើរក៏ងាយស្រួល ខណៈដែលការលក់ដូរក៏ដាច់ច្រើនជាងមុន ដោយសារមានភ្ញៀវទេសចរទៅមកច្រើន។

ពលរដ្ឋរូបនេះបន្តថា កាលមិនទាន់មានផ្លូវស្អាតល្អ អ្នកដំណើរច្រើនតែជិះតាមដងផ្លូវជាតិលេខ ៧ ប៉ុន្តែឥឡូវនេះបានត្រឡប់មកធ្វើដំណើរតាមផ្លូវមាត់ទន្លេ ឬផ្លូវខេត្តលេខ ៣៧៧ វិញ ដោយសារមានផ្លូវស្អាត ហើយដែលតាមផ្លូវមានម្លប់ដើមឈើអមត្រជាក់ ជាពិសេសបានធ្វើដំណើរឆ្លងកាត់តំបន់រមណីយដ្ឋានទេសចរល្បីៗរបស់ខេត្តក្រចេះថែមទៀតផង៕

អត្ថបទ៖ ប្រុញ វិធិន