អភិបាលខេត្តបាត់ដំបង ក្រើនរម្លឹកដល់ម្ចាស់រោងចក្រត្រូវពង្រឹងការគ្រប់គ្រងសំណល់រាវឱ្យបានល្អ

លោក សុខ លូ អភិបាលខេត្តបាត់ដំបង បានក្រើនរំលឹកដល់ម្ចាស់រោងចក្រត្រូវពង្រឹងការគ្រប់គ្រងសំណល់រាវឱ្យបានល្អ ប្រសិនបើមានករណីលួចបង្ហូរសំណល់រាវចូលប្រភពទឹកនឹងត្រូវប្រឈមនឹងបិទរោងចក្រដោយគ្មានការលើកលែង ឬផាកពិន័យនោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានក្រើនរម្លឹកបែបនេះ នាឱកាសអញ្ជើញជាគណៈអធិបតីក្នុងពិធីអបអរសាទរខួបអនុស្សាវរីយ៍លើកទី១៣៩ នៃទិវាពលកម្មអន្ដរជាតិ ១ ឧសភា ឆ្នាំ២០២៥ ក្រោមប្រធានបទ ” រួមគា្នដើម្បីការងារសមរម្យ និងកំណើនប្រកបដោយចីរភាព និងភាពធន់” ដែលពិធីនេះធ្វើឡើងនៅបរិវេណក្រុមហ៊ុន ហ៊្វីនិក អ៊ិនដាស្ទ្រៀល ឯ.ក ស្ថិតក្នុងស្រុករតនមណ្ឌល នាព្រឹកថ្ងៃទី១២ ខែឧសភា ឆ្នាំ២០២៥។

មានប្រសាសន៍ ក្នុងឱកាសនោះ លោក សុខ លូ បានថ្លែងអំណរគុណដល់ម្ចាស់រោងចក្រដែលបានផ្ដល់ការងារដល់កម្មករនិយោជិតនិងណែនាំដល់ម្ចាស់រោងចក្រត្រូវគិតគូរខ្ពស់លើបញ្ហាបរិស្ថាន មិនត្រូវធ្វើឱ្យលេចធ្លាយ ឬលួចបង្ហូរទឹកកខ្វក់ចូលស្ទឹងដែលនាំឱ្យមានការបំពុលប្រភពទឹកនោះឡើយ។ ព្រមទាំងបានក្រើនរំលឹកដល់ម្ចាស់រោងចក្រត្រូវពង្រឹងការគ្រប់គ្រងសំណល់រាវឱ្យបានល្អ ប្រសិនបើមានករណីលួចបង្ហូរសំណល់រាវចូលប្រភពទឹកនឹងត្រូវប្រឈមនឹងបិទរោងចក្រដោយគ្មានការលើកលែង ឬផាកពិន័យនោះឡើយ។

បន្ថែមពីនេះ លោកអភិបាលខេត្ត បានជំរុញឱ្យរោងចក្រសហគ្រាសត្រូវយកចិត្តទុកដាក់ក្នុងការលើកកម្ពស់អនាម័យបរិស្ថាននៅក្នុងរោងចក្រដើម្បីសុខមាលភាពកម្មករនិយោជិត និងបានណែនាំដល់កម្មករនិយោជិតត្រូវខិតខំបំពេញការងារ យកចិត្តទុកដាក់ថែរក្សាសុខភាព ចៀសឆ្ងាយពីគ្រឿងញៀន និងចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន។

ការរៀបចំពិធីអបអរសាទរទិវាពលកម្មអន្តរជាតិ១ ឧសភា គឺជាព្រឹត្តិការណ៍ប្រវត្តិសាស្ត្ររបស់កម្មករ និយោជិត ដែលត្រូវបានរាជរដ្ឋាភិបាលកម្ពុជាប្រារព្ធធ្វើជារៀងរាល់ឆ្នាំចាប់តាំងពីក្រោយថ្ងៃរំដោះ ៧មករា ឆ្នាំ១៩៧៩ មក។ សម្រាប់ឆ្នាំនេះ ក៏ដូចឆ្នាំមុនៗផងដែរ គឺរាជរដ្ឋាភិបាលរាប់ចាប់តាំងពីអាណត្តិក្រោមការដឹកនាំរបស់សម្ដេចតេជោ និងអាណត្តិទី៧នេះ បានចេញសារាចរណ៍ណែនាំ និងសារលិខិត ដើម្បីបំផុសទឹកចិត្តគ្រប់ក្រសួងស្ថាប័នពាក់ព័ន្ធ រដ្ឋបាលរាជធានី ខេត្ត សហគ្រាស គ្រឹះស្ថាននានារៀបចំពិធីអបអរសាទរខួបអនុស្សាវរីយ៍លើកទី១៣៩ ទិវាពលកម្មអន្តរជាតិ ១ ឧសភា ដែលមានកម្មវិធីសំណេះសំណាល កម្មវិធីកម្សាន្ត សប្បាយផ្សេងៗ ដើម្បីបង្កបរិយាកាសសាមគ្គីភាព ភាតរភាព រវាងកម្មករនិយោជិត។

រាជរដ្ឋាភិបាលបានបន្តដាក់ចេញនូវអនុសាសន៍ស្តីពី “រួមគា្នដើម្បីការងារសមរម្យ និងកំណើនប្រកបដោយចីរភាព និងភាពធន់” ដែលជាការបង្ហាញឱ្យឃើញកាន់តែច្បាស់នូវការប្តេជ្ញាចិត្តរបស់រាជរដ្ឋាភិបាលក្នុងការចូលរួមសម្រេចឱ្យបាននូវគោលដៅសូចនាករគន្លឹះដែលបានកំណត់ក្នុងកម្មវិធី នយោបាយរបស់រាជរដ្ឋាភិបាលនីតិកាលទី៧ នៃរដ្ឋសភា យុទ្ធសាស្ត្របញ្ចកោណ ដំណាក់កាលទី១ ដើម្បី កំណើន ការងារ សមធម៌ ប្រសិទ្ធភាព និងចីរភាព៕