អ្នកភូមិទៀមលើ ខេត្តរតនគិរី ស្នើរដ្ឋធ្វើផ្លូវលំបីខ្សែ ដើម្បីងាយស្រួលដឹកជញ្ជូនដំណាំទៅកាន់ទីផ្សារ

អ្នកភូមិទៀមលើ ឃុំកាចូន ស្រុកវើនសៃ ខេត្តរតនគិរី សំណូមពរដល់រាជរដ្ឋាភិបាល ធ្វើផ្លូវលំបីខ្សែ ដើម្បីបង្កលក្ខណៈងាយស្រួលដល់ការធ្វើដំណើរ ពិសេសដឹកជញ្ជូនដំណាំកសិផលទៅកាន់ទីផ្សារ ខណៈបច្ចុប្បន្នផ្លូវទាំងនោះរងការខូចខាត និងពិបាកធ្វើដំណើរពេលរដូវវស្សា។ លើសពីនេះ ដោយសារតែរដ្ឋពុំទាន់មានការកាត់ឆ្វៀលធ្វើផ្លូវច្បាស់លាស់ ម្ចាស់ចម្ការមួយចំនួនបានរំលោភចិញ្ចឹមផ្លូវយកមកធ្វើជាកម្មសិទ្ធ បង្កទៅជាជម្លោះញឹកញាប់។

លោក ស្វែង បាន មេភូមិទៀមលើ បានឱ្យដឹងថា ផ្លូវទាំង ៣ខ្សែនេះ ដោយផ្លូវនីមួយៗមានប្រវែង ២ គីឡូម៉ែត្រ សរុប ៦ គីឡូ ។ ទីតាំងផ្លូវ ខ្សែទី១ ចាប់ពីចំណុចស្ពានអូរកាឆ្ពោះទៅទន្លេសេសាន និង ២ ខ្សែទៀត ជាផ្លូវធ្វើដំណើរទៅស្រែចម្ការ។ ក្នុងនាមជាមេភូមិរបស់ជនជាតិដើមភាគតិច លោក ស្វែង ក៏បាន សំណូមដល់ប្រមុខរាជរដ្ឋាភិបាលកម្ពុជា និងសប្បុរសជន មេត្តាជួយកសាងសង់ពង្រីកផ្លូវភូមិជូនពួកគាត់ផង ដើម្បីបានធ្វើដំណើរទៅកាប់ព្រៃ ចម្ការ ដាំដំណាំចិញ្ចឹមជីវិត និងដឹកដំឡូងទៅលក់នៅលើទីផ្សារ ពិសេសបញ្ចប់ជម្លោះគ្នាដោយសារផ្លូវ ។

បើតាមលោកមេភូមិ ផ្លូវក្នុងភូមិទាំងបីខ្សែនេះ បានបង្កទៅជាជម្លោះដោះស្រាយមិនចេះចប់ពីមួយឆ្នាំទៅមួយឆ្នាំ រវាងជនជាតិដើមភាគតិច ដែលមានទីលំនៅនៅត្រង់កន្លែងនោះ ។ ជម្លោះនេះកើតឡើយដោយសារ អ្នករស់នៅជាប់ផ្លូវលំនោះ យកកសិផលរបស់ខ្លួនមកដាក់ហាលលើផ្លូវ លុះពេលអ្នកដំណើរឆ្លងកាត់បានកិនធ្វើឱ្យខូចក៏បង្កទៅជាជម្លោះ។

ចំណែកលោក ខាំ កាប៊ីន ជាមេឃុំកាចូន បានប្រាប់ថា កញ្ចប់ថវិកាដែលទទួលបានពីរដ្ឋក្នុងឆ្នាំ ២០២៥ បានយកទៅអភិវឌ្ឍដ្ឋារចនាសម្ព័ន្ធ រួមមានផ្លូវ ស្ពាន តាមភូមិនីមួយៗជិតអស់ហើយ នៅសល់តែបន្តិចបន្តួចពុំគ្រប់គ្រាន់សម្រាប់ធ្វើផ្លូវខាងលើនោះទេ។  លោកថា៖«ដូច្នេះថវិកាឃុំនៅសល់បន្តិចបន្តួច មិនអាចដេញថ្លៃធ្វើផ្លូវគ្រួសក្រហម ឬស្ពាន បានទៀតទេ ថវិកាដែលនៅសល់បូកយោងបន្តទៅឆ្នាំ២០២៦» ។

ក្នុងន័យនេះ លោកបញ្ជាក់ថាការធ្វើផ្លូវទាំងនោះអាចនឹងរង់ចាំរហូតដល់ការអនុម័តកញ្ចប់ថវិកាថ្មី។ បើតាមលោក ខាំ កាប៊ីន មុនពេលធ្វើផ្លូវនានា ឃុំតែងដាក់ឱ្យក្រុមហ៊ុនឯកជនធ្វើការដេញថ្លៃ ដើម្បីបង្ហាញពីតម្លាភាព និងទទួលបានផ្លូវដែលមានគុណភាពល្អ៕

អត្ថបទ៖ ខៀវ ចាប