នៅពេលឈប់ធ្វើការ តើសាមីខ្លួនអាចបង់ភាគទាន ប.ស.ស. ដោយខ្លួនឯងបានទេ?

នៅពេលឈប់ធ្វើការ តើបុគ្គលនោះ អាចបន្តបង់ភាគទាន ប.ស.ស. ដោយខ្លួនឯងបានទេ? បេឡាជាតិសន្តិសុខសង្គម (ប.ស.ស.) បញ្ជាក់ថា នៅពេលដែលបុគ្គលិកឈប់ពីការងារ ក៏អាចបន្តបង់ភាគទានទៅកាន់ ប.ស.ស. (បុគ្គលស្វ័យនិយោជន៍) បានដែរ ប្រសិនជាត្រូវតាមលក្ខខណ្ឌដែល ប​​.ស.ស. កំណត់។ នេះ បើតាមការផុសលើបណ្តាញសង្គមរបស់បេឡាសន្តិសុខសង្គម នាថ្ងៃទី៣ ខែកក្កដា ឆ្នាំ២០២៥។

មូលហេតុដែល ប.ស.ស. បញ្ជាក់នេះ ដោយសារមានសំណួរសួរច្រើនជាងគេតាមរយៈបណ្តាញសង្គមរបស់ ប.ស.ស. ថា៖ “ពេលខ្ញុំឈប់ធ្វើការ តើខ្ញុំអាចបន្តបង់ភាគទានមក ប.ស.ស. (បុគ្គលស្វ័យនិយោជន៍) ដោយខ្លួនឯងបានដែរឬទេ? បើបាន តើត្រូវធ្វើដូចម្តេច?”។

ជុំវិញសំណួរទាំងអស់នេះ ប.ស.ស. បញ្ជាក់ថា អាចបង់បាន ដោយត្រូវគោរពតាមលក្ខខណ្ឌដូចជា៖ មានអាយុក្រោម ៦០ឆ្នាំ គិតត្រឹមកាលបរិច្ឆេទស្នើសុំចុះបញ្ជី, មានមុខរបររកចំណូលផ្ទាល់ខ្លួន ដោយមិនពាក់ព័ន្ធនឹងប្រាក់ឈ្នួល ឬប្រាក់បៀវត្ស, និងមិនមានប្រើប្រាស់បុគ្គលិកក្នុងសកម្មភាពមុខរបររបស់ខ្លួន។

សម្រាប់ឯកសារដែលត្រូវភ្ជាប់មានដូចជា អត្តសញ្ញាណបណ្ណសញ្ជាតិខ្មែរច្បាប់ដើមដែលមានសុពលភាព និងវិញ្ញាបនបត្រចុះឈ្មោះអ្នកសេដ្ឋកិច្ចក្រៅប្រព័ន្ធ។ ព័ត៌មានបន្ថែម អាចទាក់ទងបានតាមរយៈលេខទូរសព្ទ ១២៨៦ ឬ ១២៩៧៕