ព័ត៌មានជាតិ

អាជ្ញាធរខណ្ឌ ៧ មករា បន្តទទួលអំណោយរបស់សប្បុរសជនសម្រាប់ចែកជូនពលរដ្ឋភៀសសឹក និងកងទ័ពជួរមុខ តាមរយៈសាលារាជធានីភ្នំពេញ

បានផុស

២២ វិនាទី មុន

នៅ

ថ្ងៃអង្គារ ២៩ កក្កដា ២០២៥

ដោយ

រដ្ឋបាលខណ្ឌ ៧ មករា បន្តទទួលយកអំណោយសប្បុរសជនចូលរួមបរិច្ចាគជាថវិកា ស្បៀងអាហារ គ្រឿងឧបភោគបរិភោគ សម្ភារៈប្រើប្រាស់ផ្សេងៗ សម្រាប់ចែកជូនពលរដ្ឋភៀសសឹក និងកងទ័ពជួរមុខ តាមរយៈសាលារាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅថ្ងៃទី ២៩ ខែកក្កដា ឆ្នាំ ២០២៥ នេះ លោក ថេង សុថុល អភិបាល នៃគណៈអភិបាលខណ្ឌ ៧ មករា បានទទួលអំណោយពីសប្បុរសជនក្នុងមូលដ្ឋាន និង រដ្ឋបាលសង្កាត់ទាំង ៨ ក្នុងមូលដ្ឋានខណ្ឌ បានទទួលយកអំណោយដែលសប្បុរសជនជួយបរិច្ចាគជាថវិកា ស្បៀងអាហារ សម្ភារៈ ដើម្បីយកទៅចែកជូនដល់វីរកងទ័ពជួរមុខ និង ជនភៀសសឹក បន្ទាប់ពីមានជម្លោះប្រដាប់អាវុធបង្កឡើងដោយទាហានថៃឈ្លានពានមកលើដែនអធិបតេយ្យភាពរបស់កម្ពុជា។

លោកអភិបាល បានបញ្ជាក់ថា ប្រជាពលរដ្ឋទាំងអស់រស់នៅក្នុងមូលដ្ឋានខណ្ឌ អាចយកសម្ភារៈអំណោយទាំងអស់នេះទៅដាក់នៅសាលាសង្កាត់ ឬ សាលាខណ្ឌ ដែលនៅជិតលោកអ្នក ងាយស្រួលក្នុងការរៀបចំទុកដាក់ និងធ្វើការបញ្ជូនយកទៅតាមរយៈសាលារាជធានីភ្នំពេញ។

សូមបញ្ជាក់ផងដែរថា កាលពីថ្ងៃទី ២៨ ខែកក្កដា ឆ្នាំ ២០២៥ រដ្ឋបាលខណ្ឌ ៧ មករា អំពាវនាវដល់ឯកឧត្តម លោកអ្នកឧកញ៉ា អ្នកឧកញ៉ា ឧកញ៉ា លោកជំទាវ អស់លោក លោកស្រី ជាពាណិជ្ជករ សិប្បករ វិនិយោគិន និងសប្បុរសជន ព្រមទាំងប្រជាពលរដ្ឋទាំងអស់ មេត្តាចូលរួមបរិច្ចាគអំណោយជាថវិកា ស្បៀងអាហារ គ្រឿងឧបភោគបរិភោគ សម្ភារៈប្រើប្រាស់ផ្សេងៗ ឬថ្នាំពេទ្យ តាមលទ្ធភាព និងសទ្ធាជ្រះថ្លារៀងៗ ខ្លួន ដើម្បីចូលរួមគាំទ្រ និងលើកទឹកចិត្តដល់វីរកងទ័ពជួរមុខកម្ពុជា ដែលបាននិងកំពុងប្រយុទ្ធយ៉ាងអង់អាចក្លាហាន ដើម្បីការពារបូរណភាពទឹកដី តតាំងជាមួយសត្រូវឈ្លានពានមកលើដែនអធិបតេយ្យភាពរបស់កម្ពុជា ព្រមទាំងជួយដល់ប្រជាពលរដ្ឋដែលត្រូវបានជម្លៀសខ្លួនមកកាន់មណ្ឌលសុវត្ថិភាពនានា នៅតាមបណ្ដាខេត្តជាប់ព្រំដែនកម្ពុជា-ថៃ។ ចំពោះសម្ភារៈដែលប្រជាពលរដ្ឋបរិច្ចាគនេះ រដ្ឋបាលខណ្ឌ ៧ មករា បានរៀបចំប្រគល់ជូនរដ្ឋបាលរាជធានីភ្នំពេញ ដើម្បីដឹកយកទៅជូនតាមទីតាំងកន្លែងជនភៀសសឹកស្នាក់នៅតាមព្រំដែន។

ក្នុងនាមរដ្ឋបាលខណ្ឌ ៧ មករា សូមថ្លែងអំណរគុណយ៉ាងជ្រាលជ្រៅចំពោះសប្បុរសជនដែលមានចិត្តសប្បុរសក្នុងស្មារតីខ្មែរជួយខ្មែរដោយចូលរួមឧបត្ថម្ភគាំទ្រនូវធនធានផ្ទាល់ខ្លួនដល់ប្រជាពលរដ្ឋដែលបានជម្លៀសខ្លួនមកកាន់ខេត្តសៀមរាបរកទីតាំងសុវត្ថិភាព៕

អត្ថបទ ៖ ម៉េង