GBC ថ្នាក់ក្រុមលេខាធិការកំពុងបន្តកិច្ចប្រជុំនៅម៉ាឡេស៊ី ចំពេលភាពតានតឹងកើនឡើងជាថ្មីនៅព្រំដែន

នៅថ្ងៃទី៥ ខែសីហា ឆ្នាំ២០២៥នេះ ក្រុមលេខាធិការនៃគណៈកម្មាធិការព្រំដែនទូទៅ (GBC) របស់កម្ពុជា បានបន្តកិច្ចប្រជុំផ្ទៃក្នុងនៅប្រទេសម៉ាឡេស៊ី ចំពេលភាពតានតឹងកើនឡើងជាថ្មីនៅតំបន់ព្រំដែនប្រទេសទាំងពីរ។

អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា បានថ្លែងឱ្យដឹងនៅវេលាថ្ងៃត្រង់នេះ ថា ក្រុមលេខាធិការគណៈកម្មាធិការព្រំដែនទូទៅ (GBC) ដឹកនាំដោយលោកឧត្តមសេនីយ៍ទោ ស៊ិន សុខា ប្រធានក្រុមលេខាធិការ GBC កម្ពុជា បានបន្តកិច្ចប្រជុំផ្ទៃក្នុង ដើម្បីពិភាក្សាបន្ថែមទៀតក្នុងការជំរុញប្រសិទ្ធភាព និងភាពជឿជាក់ទៅលើការអនុវត្តកិច្ចព្រមព្រៀងឈប់បាញ់ និងការកសាងទំនុកចិត្តគ្នាជាមួយភាគីថៃ។  

ជាការគូសបញ្ជាក់ថា កិច្ចប្រជុំក្រុមលេខាធិការគណៈកម្មាធិការព្រំដែនទូទៅកម្ពុជា-ថៃ (GBC) បានចាប់ផ្ដើមតាំងពីថ្ងៃទី៤ ខែសីហា ហើយនឹងបន្តដល់ថ្ងៃទី៦ ខែសីហា មុនឈានដល់កិច្ចប្រជុំកំពូលវិសាមញ្ញគណៈកម្មាធិការព្រំដែនទូទៅ ដែលនឹងប្រព្រឹត្តទៅនាថ្ងៃទី៧ ខែសីហា ឆ្នាំ២០២៥ខាងមុខ។ កិច្ចប្រជុំនាថ្ងៃទី៧ នឹងមានវត្តមានថ្នាក់ដឹកនាំក្រសួងការពារជាតិប្រទេសទាំងពីរ ដោយភាគីកម្ពុជា គឺរដ្ឋមន្ត្រីក្រសួងការពារជាតិ លោកនាយឧត្តមសេនីយ៍ ទៀ សីហា និងភាគីថៃ ដឹកនាំដោយរដ្ឋមន្ត្រីស្តីទីក្រសួងការពារជាតិថៃ លោក ណាត់ថាក់ផុន ណាកផានិច។  

តាមការព្រមព្រៀងគ្នារវាងភាគីទាំងពីរ ក្នុងកិច្ចប្រជុំជាវិសាមញ្ញ GBC នេះ ក៏បានអនុញ្ញាតឱ្យមានអ្នកសង្កេតការណ៍អន្តរជាតិពីប្រធានអាស៊ាន គឺម៉ាឡេស៊ី និងតំណាងសហរដ្ឋអាមេរិក និងប្រទេសចិនផងដែរ។

កិច្ចប្រជុំនេះ បានប្រព្រឹត្តទៅក្នុងកាលៈទេសៈដែលសភាពការណ៍ហាក់តានតឹងកើនឡើងជាថ្មីនៅព្រំដែន ដោយថៃ បានបំពានកិច្ចព្រមព្រៀងនៃបទឈប់បាញ់ ក្រោមរូបភាពបញ្ជូនកម្លាំងយោធាបន្ថែម និងគ្រឿងចក្រ ចល័តចូលក្នុងតំបន់អានសេះ ដែលជាដែនអធិបតេយ្យរបស់កម្ពុជា ហើយថែមទាំងបានរាយបន្លាលួស។

តាមការអះអាងរបស់អ្នកនាំពាក្យក្រសួងការពារជាតិកម្ពុជា គិតមកដល់ថ្ងៃទី៥ ខែសីហានេះ យោធាថៃមិនទាន់បានដកគ្រឿងចក្រ និងរើលួសបន្លាចេញពីតំបន់អានសេះ ក្នុងដែនអធិបតេយ្យកម្ពុជានៅឡើយទេ៕

ដោយ៖ ធឿន វ៉ាន់សុង