មិនពិបាករកផលិតផលខ្មែរឡើយ ព្រោះផ្សារពាណិជ្ជកម្ម “CambodiaTrade” មានលក់ផលិតផលក្នុងស្រុក ១០០%

ស្របពេលកម្ពុជាកំពុងជំរុញលើការគាំទ្រផលិតផលក្នុងស្រុក និងពហិការមិនចង់ប្រើផលិតផលពីបច្ចាមិត្ត កម្ពុជាថ្មី សូមណែនាំ ផ្សារពាណិជ្ជកម្មតាមប្រព័ន្ធអេឡិចត្រូនិកថ្នាក់ជាតិ របស់ក្រសួងពាណិជ្ជកម្មមួយឈ្មោះ CambodiaTrade ដែលដំណើរការតាំងពីចុងខែមីនា ឆ្នាំ២០២២មកម្ល៉េះ ក្នុងការលក់ផលិតផលខ្មែរ ហើយអាចចុះឈ្មោះលក់ និងទិញផងដែរ។

គិតមកដល់ពេលនេះ CambodiaTrade បានដំណើរការជាង ៣ឆ្នាំហើយ ក្នុងបេសកកម្មដ៏សំខាន់របស់ក្រសួងពាណិជ្ជកម្ម ដែលធ្វើយ៉ាងណាឱ្យសហគ្រាសធុនតូច និងមធ្យមនៅកម្ពុជា ទទួលបានអត្ថប្រយោជន៍​ពីពាណិជ្ជកម្មតាមប្រព័ន្ធអេឡិចត្រូនិក។ ពិសេស គឺជំរុញសក្តានុពលនៃការលក់ផលិតផលខ្មែរ ឱ្យបានដល់អតិថិជនទាំងក្នុង និងក្រៅស្រុក តាមរយៈពាណិជ្ជកម្មអេឡិចត្រូនិក នៃសេដ្ឋកិច្ចឌីជីថល។

CambodiaTrade ជាផ្សារពាណិជ្ជកម្មតាមប្រព័ន្ធអេឡិចត្រូនិកថ្នាក់ជាតិដំបូងគេ (e-commerce marketplace) ដែលប្រតិបត្តិការតាមរយៈគេហទំព័រ CambodiaTrade.com ក្រោមការគ្រប់គ្រងរបស់ក្រសួងពាណិជ្ជកម្ម។ ផ្សារនេះ បង្កើត​ឡើងក្នុងគោលបំណង​ជួយដល់​សហគ្រាសធុនតូច និងមធ្យមនៅកម្ពុជា ក្នុងការលក់ផលិតផល (Enhanced Intergrated Framework) ក្រោមគម្រោងអភិវឌ្ឍពាណិជ្ជកម្ម Go4eCAM ។

បច្ចុប្បន្ន មានផលិតផលខ្មែរជាច្រើនប្រភេទបានដាក់លក់លើផ្សារពាណិជ្ជកម្មនេះ ដែលផ្តល់ភាពងាយស្រួលសម្រាប់ពលរដ្ឋខ្មែរដែលរស់នៅក្រៅប្រទេស ក្នុងការស្វែងរកទំនិញដែលខ្លួនត្រូវការ។ សូមចុចចូលតាមរយៈលីងនេះ https://cambodiatrade.com/auth/login ។

បើតាមក្រសួងពាណិជ្ជកម្ម ដើម្បីមានសិទ្ធិប្រើប្រាស់ ផ្សារខេមបូឌាត្រេដ (Cambodia Trade) សហគ្រាសធុនតូច​និងមធ្យម ត្រូវតែជាក្រុមហ៊ុន ឬសហគ្រាស ដែលបាន​ចុះឈ្មោះ​ជាផ្លូវការជាមួយ​ក្រសួងពាណិជ្ជកម្ម ឬមាន​លិខិតអនុញ្ញាត​​ប្រកប​អាជីវកម្ម។ ជាមួយគ្នានេះ ត្រូវមានវិញ្ញាបនបត្រ​ពន្ធប៉ាតង់ (Patent Certificate) និងលេខអត្តសញ្ញាណ​សារពើពន្ធ (VAT Certificate) ដែលមានសុពលភាព និងលក់បានតែផលិតផល​ដែលផលិតនៅ​ក្នុងប្រទេសកម្ពុជា។

ធ្វើម៉េចទើបអាចចុះឈ្មោះលក់ផលិតផលខ្លួន​ លើគេហទំព័រ​ក្រសួងពាណិជ្ជកម្មបាន?

គួររំលេចដែរថា ផលិតផលដែលធ្វើដោយដៃ អាចនឹងមានតម្លៃខ្ពស់ខុសពីចេញពីរោងចក្រដែលពលរដ្ឋខ្មែរធ្លាប់ប្រើកន្លងមក តែបើនិយាយពីអត្ថប្រយោជន៍នៃផលិតផលក្នុងស្រុក គឺមានសុវត្ថិភាពសម្រាប់សុខភាពបំផុត ព្រោះទូទៅផ្សំឡើងដោយវត្ថុធាតុដើមពីធម្មជាតិ មិនបារម្ភពីសារធាតុរក្សាទុកក្នុងផលិតផលជាដើម។ល។

ទាក់ទងនឹងការគាំទ្រផលិតផលក្នុងស្រុកនេះដែរ អ្នកមានឥទ្ធិពលលើប្រព័ន្ធផ្សព្វផ្សាយ ពិសេសអ្នកស្ថិតក្នុងវិស័យជំនួញ ក៏ធ្លាប់បានលើកឡើងដូចគ្នាដែរថា ទោះជាកម្ពុជាស្ថិតនៅដំណាក់កាលនៃការចាប់ផ្តើមងាកមកពង្រីកការផលិតផលិតផលក្នុងស្រុក ប៉ុន្តែបើខ្មែររួមគ្នាគាំទ្រផលិតផលជាតិឱ្យផុសផុល រយៈពេលយូរទៅ ជឿថា អាចពីសិប្បកម្មធនតូច និងមធ្យម ប្រែក្លាយជារោងចក្រ សហគ្រាសសម្រាប់នាំចេញជាក់ជាមិនខាន៕ អត្ថបទ៖ សុធាវី