ភរិយាកងទ័ពជួរមុខ បង្ហាញមោទនភាពដែលមានស្វាមីចេញទៅសមរភូមិការពារទឹកដី ទោះគ្រួសារមិនសូវធូរធា

សមាជិកកងទ័ពជួរមុខមួយរូបនៅខេត្តមណ្ឌលគិរី ដែលមានប្តីជាយោធិនកំពុងឈរជើងយ៉ាងអង់អាចក្លាហាន ស្ថិតនៅទិសខេត្តព្រះវិហារ បានបង្ហាញចំណាប់អារម្មណ៍ដោយមានមោទនភាពជាខ្លាំងដែលមានប្ដីជាកងទ័ព អង់អាចក្លាហាន ការពារបូរណភាពទឹកដីកម្ពុជាអំឡុងពេលមានសត្រូវឈ្លានពាន។

អ្នកស្រី ស៊ុម រី អាយុ៣៦ឆ្នាំ មានទីលំនៅបច្ចុប្បន្ន ភូមិចំការតែ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរីបានប្រាប់«កម្ពុជាថ្មី»ឲ្យដឹងថា សព្វថ្ងៃគាត់មានស្វាមីជាយោធិនកងទ័ព មានឈ្មោះ ស្រើយ ងិត អាយុ ៣៤ឆ្នាំ ជាជនជាតិដើមភាគតិចព្នង មានកូនប្រុសស្រីចំនួន៥នាក់ ក្នុងនោះកំពុងសិក្សា សិក្សា៣នាក់។ អ្នកស្រីបានរៀបរាប់ថា បទពិសោធប្តីគាត់បានចូលបម្រើការជាយោធិនចាប់តាំងពីឆ្នាំ២០១៧មកទល់បច្ចុប្បន្ននេះចំនួន៨ឆ្នាំកន្លងមកហើយ បច្ចុប្បន្នប្ដីរបស់គាត់កំពុងតែឈរជើងនៅឯ សមរភូមិមុខខេត្តព្រះវិហារ។

បន្ទាប់ពីមានហេតុការណ៍ផ្ទុះអាវុធពីសំណាក់ភាគីថៃឈ្លានពានមកលើកម្ពុជាគាត់បានខកខានទំនាក់ទំនងជាមួយប្តីរបស់គាត់មួយរយៈ បានសម្តែងការព្រួយបារម្ភជាខ្លាំង។ ប៉ុន្តែជាសំណាងល្អ នៅថ្ងៃទី៨ខែសីហានេះ អ្នកស្រីបានទទួលដំណឹងមកថាប្តីរបស់គាត់មានសុខសុវត្ថិភាព។

ក្នុងនាមអ្នកស្រីជាភរិយា ដែលមានស្វាមីជាកងទ័ព ការពារបូរណភាពទឹកដី បានបង្ហាញពីចំណាប់៖«ទោះស្ថានភាពគ្រួសារលំបាក ប៉ុន្តែខ្ញុំមានមោទនភាពខ្លាំងដែលមានប្ដីជាកងទ័ព អង់អាចក្លាហាន ការពារបូរណភាពទឹកដីកម្ពុជាពីការឈ្លានពានរបស់ប្រទេសជិតខាង។

អំឡុងពេលថៃឈ្លានពានកម្ពុជា ស្វាមីរបស់គាត់នៅបន្តឈរជើងនៅជួរមុខមិនទាន់ត្រឡប់មកជួបប្រពន្ធកូននោះទេ ដែលធ្វើឱ្យជីវភាពគ្រួសារជួបការលំបាក។ ទន្ទឹមនឹងជួបការខ្វះខាត​ អ្នកស្រីអំពាវនាវដល់សប្បុរសជនមេត្តាជួយជាគ្រឿងឧបភោគបរិភោគ ឬសម្ភារៈដែលអាចជួយទ្រទ្រង់ដោះស្រាយជីវភាពគ្រួសារប្រចាំថ្ងៃបានមួយរយៈ។

អ្នកស្រីរៀបរាប់ថា៖«បច្ចុប្បន្ន ខ្ញុំមិនមានមុខរបរអ្វីធំដុំទេក្រៅពីប្តីធ្វើទាហាន ក្រៅពីរៀបចំទុកដាក់ចង្រ្កានជើងឆ្នាំង បញ្ជូនកូនទៅរៀន ពេលទំនេរដើររកបន្លែព្រៃ ឬជីកទំពាំង ព្រោះត្រូវមានបន្ទុកចិញ្ចឹមកូន៥នាក់»។ អ្នកស្រី និងកូនចំនួន ៥នាក់ រួមជាមួយម្តាយចាស់ជរា កំពុងរស់នៅផ្ទះដ៏តូចមួយ ទន្ទឹងរង់ចាំស្វាមីត្រឡប់មកពីធ្វើសង្គ្រាម៕

អត្ថបទ ៖រៀម សុខហេង