សហជីពស្នើភាគីពាក់ព័ន្ធពិចារណាតម្លើងប្រាក់ឈ្នួលជូនកម្មករនិយោជិតឱ្យបានល្អប្រសើរ

លោកសំសឿនប្រធានក្រុមប្រឹក្សាជាតិសហជីព បានស្នើដល់ភាគីពាក់ព័ន្ធគួរតែពិចារណាក្នុងការតម្លើងប្រាក់ឈ្នួលជូនកម្មករនិយោជិតសម្រាប់ឆ្នាំ២០២៦ឱ្យបានល្អប្រសើរជាងឆ្នាំនេះដើម្បីលើកកម្ពស់ជីវភាពបងប្អូនកម្មករក៏ដូចជាពលករទើបវិលត្រលប់មកពីប្រទេសថៃឱ្យបានកាន់តែល្អប្រសើរបន្ថែមទៀត។

ការស្នើសុំនេះបានធ្វើឡើងក្នុងកំឡុងពេលដែលក្រុមប្រឹក្សាជាតិប្រាក់ឈ្នួលអប្បបរមា អាណត្ដិទី៤ បានបើកកិ្ចប្រជុំលើកទី១ ស្ដីពី ការកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតផលស្បែកជើង និងផលិតផលធ្វើដំណើរនិងកាបូប សម្រាប់ឆ្នាំ២០២៦នៅរសៀលថ្ងៃទី២០ខែសីហាក្រោមអធិបតីភាព លោក ហេងសួរ ប្រធានក្រុមប្រឹក្សាជាតិប្រាក់ឈ្នួលអប្បបរមានិងជារដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈនៅទីស្តីការក្រសួងដោយមានការចូលរួមពីសមាជិកក្រុមប្រឹក្សាជាតិប្រាក់ឈ្នួលអប្បបរមា សរុបចំនួន ៥១ រូប ដែលមានសមាសភាពស្មើៗ គ្នាមក ពីតំណាងភាគីរាជរដ្ឋាភិបាល តំណាងភាគីកម្មករ-និយោជិត និងតំណាងភាគីនិយោជក។

លោកសំសឿនបានបញ្ជាក់ថា« ដើម្បីជួយសម្រួលដល់ជីវភាពរស់នៅរបស់កម្មករនិយោជិតពិសេសបងប្អូនពលករទើបវិលត្រឡប់មកពីប្រទេសថៃឱ្យបានកាន់តែប្រសើរអាចបំពេញការងាររួមចំណែកបង្កើនផលិតភាពក្នុងការនាំចេញរបស់យើងសម្រាប់ឆ្នាំ២០២៦នេះ គួរតែតម្លើងប្រាក់ឈ្នួលឱ្យបានល្អប្រសើរជាងកន្លងទៅនេះ។

ឆ្នាំ២០២៥នេះរាជរដ្ឋាភិបាលបាន ដំឡើងប្រាក់ឈ្នួលអប្បបរមាចំនួន ២០៨ ដុល្លារ ក្នុងមួយខែបើបូកនឹងប្រាក់អត្ថប្រយោជន៍ផ្សេងៗ បន្ថែម កម្មករ-និយោជិត ម្នាក់ អាចទទួលបានប្រាក់ឈ្នួល ចន្លោះពី ២២៥ ទៅ ២៣៦ ដុល្លារ ដោយមិនទាន់ពីគិតពីអត្ថប្រយោជន៍ផ្សេងទៀត ដែលទទួលបានពី ប.ស.សនោះទេ។

លោកសំសឿនបានបន្តទៀតថាការប្រជុំលើកដំបូងនេះនៅមិនទាន់មានការដាក់តួលេខនៅឡើយទេគ្រាន់តែធ្វើការពិភាក្សាគ្នាសិន។លោកបានបន្ថែមថា«សម្រាប់កិច្ចប្រជុំនេះយើងនឹងជួបជុំគ្នាដើម្បីរៀបចំធ្វើពង្រៀងតួលេខមួយសម្រាប់ភាគីសហជីពដើម្បីដាក់ជូនកិច្ចប្រជុំបន្តទៀតខណៈយើងមានតួលេខមួយហើយតែនៅមិនទាន់អាចដាក់ជូនបានព្រោះថាភាគីនិយោជកក៏មិនទាន់បានដាក់តួលេខដែរ»។

យ៉ាងណាក៏ដោយ លោករំពឹងថាដំណើរការចចារប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតផលស្បែកជើងនិងផលិតផលធ្វើដំណើរនិងកាបូប សម្រាប់ឆ្នាំ២០២៦នេះប្រព្រឹត្តិទៅដោយរលូននិងទទួលបានលទ្ធផលល្អប្រសើរ។ដោយមានការយកចិត្តទុកដាក់ពីរាជរដ្ឋាភិបាលដែលមានក្រសួងការងារនិងបណ្តុះបណ្តាលវិជ្ជាជីវៈជាសេនាធិការ។ម្យ៉ាងវិញទៀតទាំងភាគីនិយោជកនិងភាគីសហជីពសុទ្ធតែមានភាពចាស់ទុំក្នុងការប្រាស្រ័យទាក់ទងគ្នាក្នុងផ្នែកទំនាក់ទំនងវិជ្ជាជីវៈកាន់តែល្អប្រសើរថែមទៀតផង។

គួរបញ្ជាក់ថា កិច្ចប្រជុំចរចាកំណត់ប្រាក់ឈ្នួលអប្បបរមា ផ្នែកវាយនភណ្ឌ កាត់ដេរ ផលិត ស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ ២០២៦ នៅឆ្នាំនេះ នឹងពិភាក្សាផ្តោតទៅលើ បម្រែបម្រួល នៃលក្ខណវិនិច្ឆ័យបែបសង្គម (ស្ថានភាពគ្រួសារ អត្រាអតិផរណា និងការចំណាយក្នុងការរស់នៅ) និងលក្ខណវិនិច្ឆ័យបែបសេដ្ឋកិច្ច (ផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យ) ដោយប្រើប្រាស់មូលដ្ឋានទិន្នន័យផ្លូវការស្របច្បាប់ និងការស្រាវជ្រាវបែបវិទ្យាសាស្ត្រ ដូចមានកំណត់ក្នុងមាត្រា ៥ នៃច្បាប់ ស្ដីពីប្រាក់ឈ្នួលអប្បបរមា៕

អត្ថបទ ៖ សំអឿន