ព័ត៌មានជាតិ

នាយករដ្ឋមន្ត្រីអញ្ជើញទៅចូលរួមកិច្ចប្រជុំកំពូលមួយនៅប្រទេសចិន

បានផុស

១០ ខែ មុន

នៅ

ថ្ងៃសៅរ៍ ៣០ សីហា ២០២៥

ដោយ

នាយករដ្ឋមន្ត្រីកម្ពុជាសម្ដេចធិបតី ហ៊ុន ម៉ាណែត បានចេញដំណើរចាកចេញពីព្រះរាជាណាចក្រកម្ពុជាឆ្ពោះទៅសាធារណរដ្ឋប្រជាមានិតចិននៅព្រឹកថ្ងៃទី៣០ ខែសីហា ឆ្នាំ២០២៥នេះ ដើម្បីចូលរួមកិច្ចប្រជុំកំពូលមួយឈ្មោះ កិច្ចប្រជុំកំពូលអង្គការសហប្រតិបត្តិការសៀងហៃ (SCO)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យន្តហោះពិសេសនៃរាជរដ្ឋាភិបាលកម្ពុជាបានជូនដំណើរសម្ដេចនិងគណៈប្រតិភូហោះចេញពីព្រលានយន្តហោះអន្តរជាតិពោធិ៍ចិនតុននៅម៉ោង៨ព្រឹកថ្ងៃសៅរ៍នេះ។

យោងតាមសេចក្ដីប្រកាសព័ត៌មានរបស់ក្រសួងការបរទេសក្នុងឱកាសនៃកិច្ចប្រជុំខាងមុខសម្ដេចក៏នឹងឡើងថ្លែងសុន្ទរកថាមួយផងដែរ ហើយក្រៅពីនោះសម្ដេចក៏នឹងមានជំនួបជាមួយប្រធានាធិបតី ស៊ី ជីនពីង ដើម្បីពង្រឹង និងធ្វើឱ្យស៊ីជម្រៅបន្ថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយ និងកិច្ចសហប្រតិបត្តិការឈ្នះ-ឈ្នះរវាងប្រទេសទាំងពីរផងដែរ។

កិច្ចប្រជុំកំពូលអង្គការសហប្រតិបត្តិការសៀងហៃ (SCO) ឆ្នាំ២០២៥នេះ រៀបចំនៅទីក្រុង Tianjin ចាប់បីថ្ងៃទី៣១ ខែសីហា ដល់ថ្ងៃទី១ ខែកញ្ញាខាងមុខ ដោយមានមេដឹកនាំចូលរួមពី២០ប្រទេស និងប្រធានអង្គការចំនួន១០ ក្រោមប្រធានបទ វិបុលភាពរួមគ្នាតាមរយៈកិច្ចសហប្រតិបត្តិការ បានបន្តវិវឌ្ឍជាវេទិកាថាមវន្ត សម្រាប់កិច្ចសហប្រតិបត្តិការលើវិស័យសេដ្ឋកិច្ច ដោយផ្តោតលើកិច្ចសហប្រតិបត្តិការ២ធំៗ រួមមានកិច្ចសហប្រតិបត្តិការឌីជីថល និងយុទ្ធសាស្រ្តសន្តិសុខសៀងនិងថាមពល។

អង្គការកិច្ចសហប្រតិបត្តិការសៀងហៃ គឺជាសម្ព័ន្ធភាពនយោបាយ សេដ្ឋកិច្ច និង សន្តិសុខតំបន់អាស៊ី-អឺរ៉ុប ដែលវិវត្តចេញពី «ក្រុមប្រទេស៥សៀងហៃ (S5G)» ដែលបង្កើតឡើងនៅថ្ងៃ២៦ ខែមេសា ឆ្នាំ១៩៩៦ ដែលមានសមាជិកចំនួន៥ ប្រទេសគឺចិន កាហ្សាក់ស្ថាន កៀកហ្គីស្ថាន រុស្សី និង តាហ្ស៊ីគីស្ថាន ក្នុងគោលបំណងបង្កើតកិច្ចសហប្រតិបត្តិការក្នុងតំបន់ និងគាំទ្របំពេញឱ្យគ្នាទៅវិញទៅមក ក្នុងចំណោមរដ្ឋជាសមាជិក ជាពិសេសលើវិស័យពាណិជ្ជកម្ម ការវិនិយោគ ការដឹកជញ្ជូន និងសន្តិសុខ។

អង្គការតំបន់នេះ ត្រូវបានប្រកាសឡើងនៅថ្ងៃទី១៥ ខែមិថុនា ឆ្នាំ២០០១ នៅទីក្រុងសៀងហៃ ប្រទេសចិន ដោយមេដឹកនាំ៦ប្រទេសគឺ ចិន កាហ្សាក់ស្ថាន កៀកហ្គីស្ថាន រុស្សី តាហ្ស៊ីគីស្ថាន និង អ៊ុចបេគីស្ថាន។ ការបង្កើតអង្គការនេះ ជាផ្លូវការតាមរយៈធម្មនុញ្ញនៃអង្គការសហប្រតិបត្តិការសៀងហៃ បានចុះហត្ថលេខានៅ ខែ មិថុនា ឆ្នាំ២០០២ និង ចូលជាធរមាននៅថ្ងៃទី១៩ ខែកញ្ញា ឆ្នាំ២០០៣៕

អត្ថបទដោយ ហ៊ុន សិរីវឌ្ឍន៍