ស្ថានភាពជំនន់ទឹកភ្លៀងបង្កឱ្យលិចលង់ភូមិឋានឃុំចំនួន៣ ក្នុងស្រុកពួក ខេត្តសៀមរាប

តាមការបញ្ជាក់របស់លោក ស៊ិន ចាន់ថុល អភិបាលនៃគណៈអភិបាលស្រុកពួក ខេត្តសៀមរាប នៅថ្ងៃទី៣១ ខែ សីហា ឆ្នាំ២០២៥ បានឱ្យដឹងថា ក្នុងរយៈពេលដែលប្រទេសកម្ពុជាទទួលរងនូវសម្ពាធអាកាសទាប បានបណ្តាលឱ្យមានភ្លៀងធ្លាក់ជាបន្តបន្ទាប់ជាប់ៗគ្នាប៉ុន្មានថ្ងៃ ធ្វើឱ្យឃុំចំនួន៣ នៅបែកខាងលើរបស់ស្រុកពួក ខេត្តសៀមរាប ទទួលរងការលិចលង់ដោយទឹកភ្លៀង រួមមានឃុំ ត្រីញ័រ ឃុំរើល និងឃុំកែវពណ៌។

លោកអភិបាលស្រុក បានបញ្ជាក់ថា ឃុំទាំង៣ ដែលរងការលិចលង់ជំនន់ទឹកភ្លៀងនេះ ធ្វើឱ្យប៉ះពាល់ភូមិចំនួន១៩ ប៉ះពាល់ផ្ទះប្រជាពលរដ្ឋ ចំនួន ២ ៥៥គ្រួសារ ,មណ្ឌលសុខភាព ២កន្លែង ,សាលារៀន ២ខ្នង ស្នាក់ការបក្ស ១កន្លែង ,ប៉ុស្តិនគរបាលរដ្ឋបាល ១កន្លែង ,វត្ត ១កន្លែង ,ទឹកលិចហូរកាត់ផ្លូវកៅស៊ូ ២ខែ្ស ប្រវែង ១១០ម៉ែត្រ និងផ្លូវលំចំនួន ៣០ខ្សែ មានប្រវែង ១៥ពាន់ ៨៣០ម៉ែត្រ និងលិចដំណាំស្រូវ ១៧៦ហិចតា ។

ក្នុងការចុះពិនិត្យស្ថានភាពជំនន់ទឹកភ្លៀង លោក ស៊ិន ចាន់ថុល ក៏បានធ្វើការណែនាំដល់អាជ្ញាធរឃុំ និងនគរបាលប៉ុស្តិ៍រដ្ឋបាល ត្រូវធ្វើការពិនិត្យ នូវផ្លូវចរន្តទឹកហូរដែលប្រជាពលរដ្ឋ បានធ្វើការបិទ ឬក៏ដាក់លូមិនបានត្រឹមត្រូវ ដែលរង្វង់មុខលូតូច ដែលធ្វើឱ្យចរន្តទឹកហូរមិនទាន់។ ម៉្យាងទៀតនៅតាមប្រព័ន្ធប្រឡាយមួយចំនួន ដែលពលរដ្ឋបានបិទកាត់តាមប្រឡាយ ក៏ជាបញ្ហាដែលធ្វើឱ្យចរន្តទឹកហូរមិនទាន់ ចុះទៅផ្នែកខាងក្រោមផងដែរ។

ក្នុងនោះដែរ លោកអភិបាលស្រុក ក៏បានណែនាំដល់ប្រធានមណ្ឌលសុខភាព និងនាយប៉ុស្តិ៍នគរបាល ត្រូវធ្វើការទុកដាក់នូវ សម្ភារៈបរិក្ខាពេទ្យឱ្យបានល្អ និងរាល់ឯកសារឱ្យបានត្រឹមត្រូវ ក្នុងពេលកំពុងលិចទឹកនេះ។ ព្រមទាំងសូមឱ្យគ្រូពេទ្យ សហការជាមួយភូមិ ឃុំ ធ្វើការផ្សព្វផ្សាយជូនប្រជាពលរដ្ឋ អំពីអនាម័យ សុខភាព ក្នុងពេលដែលជួបគ្រោះមហន្តរាយនេះ៕

ដោយ៖ គឿនវេត