ព័ត៌មានជាតិ

រដ្ឋាភិបាលសម្រេចផ្អាកបុណ្យអុំទូកដើម្បីផ្តោតការដោះស្រាយបញ្ហាពលរដ្ឋ និងពង្រឹងសេដ្ឋកិច្ចក្នុងពេលដែលប្រឈមនឹងថៃ

បានផុស

៨ ខែ មុន

នៅ

ថ្ងៃពុធ ៣ កញ្ញា ២០២៥

ដោយ

រដ្ឋាភិបាលកម្ពុជាបានសម្រេចផ្អាកព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកឆ្នាំ២០២៥ នៅរាជធានីភ្នំពេញ ដើម្បីយកចិត្តទុកដាក់ចំពោះមុខនៅតាមព្រំដែនកម្ពុជា-ថៃ ជាពិសេសការដោះស្រាយបញ្ហាជូនប្រជាពលរដ្ឋភៀសសឹក និងពលករខ្មែរដែលធ្វើការនៅថៃដែលវិលត្រលប់មកកម្ពុជាវិញ។ ទោះជាយ៉ាងណាការរៀបចំពិធីនេះនៅតាមបណ្ដាខេត្តនានាអាចប្រព្រឹត្តិទៅជាធម្មតា។

យោងតាមសារាចរចុះថ្ងៃទី២៧ ខែសីហា ដែលទើបនឹងផ្សព្វផ្សាយជាសាធារណៈនៅថ្ងៃទី៣ ខែកញ្ញានេះ សម្ដេចធិបតី ហ៊ុន ម៉ាណែត បន្ទាប់ពីសម្រេចផ្អាកនេះបានបញ្ជាឱ្យក្រុមការងាររាជរដ្ឋាភិបាលផ្ដោតការយកចិត្តទុកដាក់ដោះស្រាយបញ្ជាជូនជនភៀសសឹក សម្របសម្រួលដល់ពលករខ្មែរដែលត្រលប់ពីថៃ ផ្សព្វផ្សាយពីឱកាសការងារជូនដល់ពលរដ្ឋខ្មែរនៅតាមមូលដ្ឋាន។ បន្ថែមលើនេះទៀតអាជ្ញាធរពាក់ព័ន្ធទាំងអស់ត្រូវពង្រឹងនិងជំរុញសេដ្ឋកិច្ចមូលដ្ឋាន ធានាស្ថិរភាពថ្លៃ គាំទ្រការផលិតក្នុងស្រុក ដោះស្រាយនូវបញ្ហាដែលរាំងស្ទះដល់សកម្មភាពផលិតកម្មអាជីវកម្ម ធុរកិច្ច និងវិនិយោគ។

ក្នុងស្ថានភាពប្រឈមនឹងគ្រោះទឹកជំនន់ក្នុងរដូវវស្សានេះនាយករដ្ឋមន្ត្រីក៏បញ្ជាទៅមន្ត្រីថ្នាក់ក្រោមឱ្យបន្តការងារត្រៀមបង្កា សង្គ្រោះពលរដ្ឋពីគ្រោះធម្មជាតិ ព្រមទាំងបន្តអនុវត្តនូវគោលនយោបាយភូមិ ឃុំ សង្កាត់មានសុវត្ថិភាព។

អ្នកស្រាវជ្រាវ និងជាអ្នកជំនាញផ្នែកទស្សនវិជ្ជានៃរាជបណ្ឌិតសភាកម្ពុជាលោកបណ្ឌិត ឈត ប៊ុនថង យល់ឃើញថាការប្រារព្ធពិធីបុណ្យអុំទូកអាចផ្ដល់ប្រយោជន៍សេដ្ឋកិច្ច ផ្ដល់ភាពរីករាយដល់ពលរដ្ឋ ក៏ដូចជារក្សា និងបង្ហាញប្រពៃណីដល់បរទេសឱ្យបានឃើញផងដែរ តែទោះជាយ៉ាងណាក្នុងស្ថានភាពដែលប្រទេសកំពុងមានការលំបាក និងប្រឈមនឹងការឈ្លានពានពីបរទេស ការសម្រេចផ្អាកនេះគឺជារឿងសមហេតុផល។

លោកថា៖ «ការឈប់បណ្ដោះអាសន្នមិនមែនមានន័យថាឈប់ពិធីហ្នឹងរហូតទេ! អ៊ីចឹងវាមិនជាប៉ះពាល់ទេ វាបង្ហាញឱ្យឃើញថាជាការគិតត្រឹមត្រូវដែលកម្ពុជាកំពុងមានការលំបាកមានទុក្ខព្រួយដោយសារការឈ្លានពានរបស់ថៃដែលនេះជារឿងត្រឹមត្រូវ។ សុំកុំបងប្អូនការច្រលំ ឬបកស្រាយថារដ្ឋាភិបាលលុបលំបាត់បុណ្យជាតិអីជាហូរហែនេះជាការយល់មិនត្រឹមត្រូវទេ។ ខ្ញុំគាំទ្រការសម្រេចរបស់រដ្ឋាភិបាល ហើយនៅពេលណាស្ថានការមានភាពប្រក្រតីសេដ្ឋកិច្ចនឹងនរ ការប្រព្រឹត្តិទៅនៃបុណ្យអុំទូកនឹងប្រព្រឹត្តិទៅជាប្រក្រតីវិញហើយ»។

ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក គឺជាព្រះរាជពិធីមួយក្នុងបុណ្យទ្វាទសមាស ដែលតែងតែប្រារព្ធរៀងរាល់ឆ្នាំនៅថ្ងៃទី១៤កើត ១៥កើត និង១រោច ខែកត្តិក នៅតាមដងទន្លេសាបមុខព្រះបរមរាជវាំង ភ្នំពេញ។ ក្នុងឆ្នាំ២០២៥នេះ ព្រះរាជពិធីបុណ្យនេះនឹងត្រូវរៀបចំនៅថ្ងៃទី៤ ទី៥ និងទី៦ ខែវិច្ឆិកា ឆ្នាំ២០២៥ ទោះបីជាមានការផ្អាកយ៉ាងណាក្ដីការឈប់សម្រាកគឺនៅដដែល ខណៈរដ្ឋាភិបាលអនុញ្ញាតដល់បណ្ដាខេត្តនានាអាចរៀបចំបានតាមលទ្ធភាពជាក់ស្ដែងរបស់ខ្លួន៕