ព័ត៌មានជាតិ

ចៅសង្កាត់ឫស្សីកែវ ដាក់គ្រឿងចក្រស្ដារប្រព័ន្ធលូកកស្ទះបណ្ដាលឲ្យទឹកជន់លិច នៅភូមិសាមគ្គី

បានផុស

១០ ខែ មុន

នៅ

ថ្ងៃសុក្រ ៥ កញ្ញា ២០២៥

ដោយ

កាលពីថ្ងៃទី ៤ ខែកញ្ញា ឆ្នាំ ២០២៥ លោក មូល វីរៈ ចៅសង្កាត់ឫស្សីកែវ បានដឹកនាំក្រុមការងារសង្កាត់ និងក្រុមការងារភូមិសាមគ្គី រួមជាមួយកម្លាំងប្រជាការពារសង្កាត់ ចុះពិនិត្យ និងស្វែងរកចំណុចដែលកកស្ទះប្រព័ន្ធលូបណ្ដាលឲ្យទឹកហូរយឺត និងបង្កភាពជន់លិចក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមជម្រាបថា ត្រង់ចំណុចផ្លូវកែងបុរីមហាសេដ្ឋី ជាកន្លែងទឹកលិចញឹកញាប់ ហើយដើម្បីដោះស្រាយបញ្ហា លោកចៅសង្កាត់ បានជួលម៉ាស៊ីនអេស្កាវ៉ាទ័រមកកាយបារសំរាម និងភក់តាមប្រឡាយ និងគាស់គម្របលូមួយចំនួនបង្ហើបរកប្រភពលូដែលមិនអាចបញ្ចេញទឹកបាន។ ប្រតិបត្តិការនេះ ចំណាយពេលមួយថ្ងៃពេញ ហើយបានស្តារប្រព័ន្ធលូចំនួនមួយទៀត ដើម្បីឲ្យទឹកហូរបានរហ័សជាងមុន។

លោក សុខ ធឿន ប្រជាពលរដ្ឋនៅភូមិសាមគ្គី បានបញ្ជាក់ថា ពីមុនទឹកជន់លិចជារឿយៗ ពេលភ្លៀងធ្លាក់ធំៗ ធ្វើឲ្យដំណើរការនៅផ្ទះ និងការធ្វើអាជីវកម្មមានការលំបាក។ ឥឡូវនេះ ពេលអាជ្ញាធរចុះមកសម្អាត និងជួយកាយប្រឡាយ លោកមានសង្ឃឹមថា ទឹកនឹងមិននៅលិចយូរដូចមុនទៀតឡើយ។

ដូចគ្នានេះ អ្នកស្រី ចិន សុភាព លក់ដូរតាមផ្លូវកែងបុរីមហាសេដ្ឋី ក៏បាននិយាយថា ការធ្វើរបស់អាជ្ញាធរបែបនេះមានប្រយោជន៍ច្រើន ព្រោះទឹកនៅលិចពេលមុន បង្កបញ្ហាសម្រាប់កូនៗ ទៅសាលា ហើយក៏ព្រួយបារម្ភពីជំងឺផងដែរ៕

អត្ថបទ ៖ សំណាង