នារដូវភ្ជុំបិណ្ឌនេះ ជនជាតិដើមភាគតិចធ្វើចង្ហាន់ប្រគេនព្រះសង្ឃ និងជូនឪពុកម្តាយដូចប្រពៃណីខ្មែរ

ខេត្តរតនគិរី៖ នៅតាមបណ្តាភូមិនីមួយៗនៃសហគមន៍របស់ជនជាតិដើមភាគតិច ក្រៅតែពីប្រកាន់ភ្ជាប់នូវទំនៀមទម្លាប់របស់ខ្លួន ពួកគេក៏មានទំនៀមទម្លាប់ ធ្វើម្ហូបអាហារប្រគេនព្រះសង្ឃ និងប្រគេនជូនឪពុកម្តាយនាឱកាសបុណ្យភ្ជុំបិណ្ឌ។ ក្នុងឱកាសបុណ្យប្រពៃណីជាតិខ្មែរនេះ ប្រជាសហគមន៍ជនជាតិដើមភាគតិច បានទៅលេងឪពុកម្តាយ ជីដូនជីតា ដោយនាំយកម្ហូបអាហារ បង្អែម លុយកាក់ សម្លៀកបំពាក់ ជូនសាច់ញាតិ ដើម្បីជាការតបស្នងសងគុណ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី ថងលៀន នាង ជាជនជាតិដើមភាគតិចគ្រឹង បានលើកឡើងថា បច្ចុប្បន្នពួកគាត់នៅតែប្រកាន់ភ្ជាប់ទំនៀមទម្លាប់របស់ជនជាតិដែលបន្សល់ទុកតាំងពីដូនតាមមក។ ទន្ទឹមនឹងនោះ ពួកគេក៏បានចូលរួមក្នុងទំនៀមទម្លាប់ខ្មែរទូទៅផងដែរ ដូចជាការប្រគេនចង្ហាន់នៅវត្ត និងរៀបចំបាយសម្លជូនឪពុកម្តាយក្នុងឱកាសបុណ្យភ្ជុំបិណ្ឌ។ អ្នកស្រីបន្ថែមថា នារដូវភ្ជុំបិណ្ឌឆ្នាំនេះ ក៏មិនខុសពីបណ្តាឆ្នាំមុនៗដែរ គឺបានរៀបចំបាយសម្លមួយស្រាក់ លុយកាក់ និងភេសជ្ជៈជូនឪពុកម្តាយ។ លើសពីនេះ អ្នកស្រីមានបំណងនិមន្តព្រះសង្ឃមកសូត្រមន្តរំដោះគ្រោះនៅផ្ទះផងដែរ។

ចំណែកអ្នកស្រី គី ជាជនជាតិដើមភាគតិចគ្រឹង បាននិយាយថា​ នារដូវភ្ជុំបិណ្ឌ តែងតែទៅលេងផ្ទះឪពុកម្តាយខាងខ្លួន និងខាងប្តី មិនដែលអាក់ខាននោះទេ។ បើទោះបីជាមានប្រាក់កាសតិចឬច្រើន ក៏ឆ្លៀតធ្វើបាយម្ហូបអាហារ បង្អែមចំអាបនិងភេសជ្ជៈ ទៅជូនពួកគាត់ និងធ្វើចង្ហាន់ប្រគេនព្រះសង្ឃនៅវត្តអារាម ដើម្បីឧទ្ទិសបុណ្យកុសលជូនម្តាយ ដែលបានស្លាប់បាត់បង់ជីវិត ជាការដឹងគុណផង និងទទួលពរសព្ទសាធុការ ពីឪពុកម្តាយឲ្យរកស៊ីមានបាន ជៀសផុតពីគ្រោះថ្នាក់ផ្សេងៗ។ បើតាមជនជាតិដើមភាគតិចរូបនេះ អ្នកស្រីធ្វើចង្ហាន់ប្រគេនព្រះសង្ឃ និងបាយសម្លជូនឪពុកម្តាយនារដូវភ្ជុំបិណ្ឌតាំងពីធំដឹងក្តីមក ហើយទំនៀមទម្លាប់ប្រពៃណីជនជាតិដើមភាគតិចក៏នៅតែប្រតិបត្តិយ៉ាងខ្ជាប់ខ្ជួនផងដែរ។

ជនជាតិដើមភាគតិចទំពួនមួយរូបទៀត លោក ថងលៀន ប្រាប់កម្ពុជាថ្មីដែរថា នៅក្នុងឱកាសរដូវភ្ជុំបិណ្ឌ កូនៗដែលមានប្តីប្រពន្ធ បែកផ្ទះទៅនៅផ្ទះផ្សេងៗគ្នា តែងតែមកលេង និងយកម្ហូប នំចំណីជូនពិសារ។ លោកបន្តទៀតថា៖« កូនៗជូនបាយម្ហូបអាហារ បង្អែម លុយកាក់ ខោអាវ សម្លៀកបំពាក់ជារៀងរាល់ឆ្នាំ មិនថា បុណ្យភ្ជុំបិណ្ឌ ឬបុណ្យចូលឆ្នាំខ្មែរ ដែលនេះជាទឹកចិត្តកូនហើយជាការដឹងគុណរបស់ពួកគេ»៕

អត្ថបទ៖ ខៀវ ចាប