អ្នកនាំពាក្យ​ក្រសួងព័ត៌មាន​រម្លឹក​អ្នក​កាសែតពីព្រំដែន​នៃ​សិទ្ធិ និងកិច្ច​ការពារសន្ដិសុខជាតិ

អនុរដ្ឋលេខាធិការ​ និង​ជាអ្នកនាំពាក្យ​ក្រសួងព័ត៌មានលោក ទេព អស្នារិទ្ធ បាន​រម្លឹកដល់​អ្នក​កាសែត​កម្ពុជា​ទាំង​អស់​ពី​ការ​អនុវត្តនូវ​សិទ្ធិ​សេរីភាព​សារព័ត៌មាន និង​មនសិការការពារ​​សន្ដិសុខ​ជាតិ។ ការ​រម្លឹក​នេះ​ក្នុងពេល​ដែល​កម្ពុជា​កំពុង​បន្ត​ដោះស្រាយ​បញ្ហា​វិវាទ​ព្រំដែន​ជា​ថៃដោយ​សន្ដិភាព​និយម និង​គោលការណ៍​ច្បាប់។

ប្រាប់កម្ពុជា​ថ្មី​នៅ​រសៀល​ថ្ងៃទី​៩ ខែ​កញ្ញានេះ​ លោក​ ទេព អស្នារិទ្ធ បានលើក​ឡើង​ថា ក្នុង​ពេល​ដែល​មាន​ការ​បន្ត​ដោះស្រាយ​វិវាទ​ព្រំដែនជាមួយ​ថៃ អ្នក​សារព័ត៌មាន​បាន​ដើរ​តួរយ៉ាង​សំខាន់ក្នុង​ការ​រាយការណ៍​ព័ត៌មាន​ពី​ជម្លោះព្រំដែន និង​ព្រឹត្តិការណ៍​ជុំវិញ ដែល​ត្រូវ​អនុវត្តន៍​ដោយ «វិជ្ជាជីវៈ និងក្រមសីលធម៌ សំដៅធានាការផ្តល់ព័ត៌មានសុក្រឹតត្រឹមត្រូវជូនដល់សហគមន៍ជាតិ និងអន្តរជាតិ ដោយមិនបង្កមហន្តរាយដល់សន្តិសុខជាតិ»។

លោកបាន​បន្ថែម​ថា សិទ្ធិ​របស់​អ្នក​កាសែតត្រូវ​ផ្សាភ្ជាប់​ជាមួយកាតព្វកិច្ច និងការទទួលខុសត្រូវក្នុងក្របខណ្ឌច្បាប់ និងដោយមនសិការជាតិ។ 

លោកថា៖ «ដូច្នេះទាំងសម្រាប់ស្ថានភាពបច្ចុប្បន្ន និងតទៅមុខ សូមអំពាវនាវជារួម ថា អ្នកសារព័ត៌មាន អង្គភាពសារព័ត៌មាន ទាំងប្រពៃណី និងទំនើប ត្រូវស្វែងយល់ឱ្យច្បាស់ពីច្បាប់ និងព្រំដែននៃសេរីភាព ហើយត្រូវអនុវត្ត​សិទ្ធិចុះយកព័ត៌មាន ផលិត និង រាយការណ៍ព័ត៌មានដោយ អនុលោមតាមក្របខណ្ឌច្បាប់កំណត់»។  

 លោកថា ជាមួយគ្នានេះ អ្នកសារព័ត៌មាន ត្រូវមានមនសិការ និងចូលរួមតម្កល់ លើកតម្កើងឧត្តមប្រយោជន៍របស់ជាតិ និងត្រូវប្រតិបត្តិតាមក្រមសីលធម៌ និងនិយាមវិជ្ជាជីវៈឱ្យបានត្រឹមត្រូវ មិនត្រូវផ្សាយព័ត៌មាន ដែលបង្កមហន្តរាយដល់សន្តិសុខជាតិ ឬប៉ះពាល់ដល់ស្ថិរភាពនយោបាយសង្គម។ 

លោកបន្ថែម​ថា៖ «អ្នកសារព័ត៌មានចាំបាច់ត្រូវស្វែងយល់ឱ្យបានច្បាស់ជាមុនពីគោលការណ៍គ្រឹះ និងវិធាននៃការរក្សាសុវត្ថិភាពផ្ទាល់ខ្លួន និងចូលរួមរក្សាសុវត្ថិភាព របស់ប្រជាជនរស់នៅក្នុងសហគមន៍ដែលខ្លួនចុះទៅយកព័ត៌មាន នៅពេលរាយការណ៍ព័ត៌មានអំពីស្ថានភាពជម្លោះព្រំដែន ឬស្ថានភាពវិបត្តិ»។

កាលពីថ្ងៃទី ១ ខែសីហា ក្រសួងព័ត៌មានបានចេញសេចក្ដីណែនាំមួយដោយបានហាម​ឃាត់រាល់ការផ្សាយព័ត៌មានទាក់ទងនឹងទីតាំងកងទ័ព ការចល័តទ័ព ទីតាំងលេណដ្ឋាន គ្រឿងសព្វាវុធ និងយុទ្ធសាស្ត្រសម្ងាត់នានា ដែលអាចបង្កគ្រោះថ្នាក់ដល់កងទ័ព និងសន្តិសុខជាតិ។ ជាពិសេសរាល់ការផ្សព្វផ្សាយត្រូវធានាថាមិនប៉ះពាល់ដល់សន្តិសុខជាតិ ឯកភាពជាតិ ការបាក់ទឹកចិត្តកងទ័ព និងទំនាក់ទំនងអន្តរជាតិ។ ក្នុង​នោះក្រសួងក៏ព្រមានចាត់វិធានការផ្លូវច្បាប់ចំពោះអ្នកដែលមិនគោរពតាមសេចក្ដីណែនាំផងដែរ៕ 

អត្ថបទដោយ ហ៊ុន សិរីវឌ្ឍន៍