មណ្ឌលគិរី!មន្រ្តីជំនាញចុះពិនិត្យផ្លូវដែលរងការខូចខាតដោយទំនន់ទឹកភ្លៀង ត្រៀមជួសជុលឡើងវិញ

មន្រ្តីជំនាញនៃមន្ទីរអភិវឌ្ឍន៍ជនបទខេត្តមណ្ឌលគិរី បានចុះពិនិត្យស្ថានភាពផ្លូវដែលរងការខូចខាតដោយជំនន់ទឹកភ្លៀងនាពេលថ្មីៗនេះនៅស្រុកកោះញែក ដើម្បីត្រៀមជួសជុលឡើងវិញសម្រួលដល់ការធ្វើដំណើររបស់ប្រជាពលរដ្ឋក្នុងមូលដ្ឋាន។

គ្រោះធម្មជាតិបង្កឡើងដោយជំនន់ទឹកកភ្លៀងបានវាយប្រហារទៅលើស្រុកកោះញែក ប៉ះពាល់ដល់ឃុំចំនួន៦ បណ្ដាលឱ្យរងការខូចខាតហេដ្ឋារចនាសម្ព័ន្ធផ្លូវជាច្រើនខ្សែ ដែលបង្ខំឱ្យផ្អាកចរាចណ៍លើខ្សែផ្លូវមួយចំនួនកាលពីថ្ងៃទី២៣-២៤​ខែកញ្ញាកន្លងទៅ។ យ៉ាងណាមិញ គិតត្រឹមថ្ងៃទី ២៦ ខែកញ្ញា ទោះបីទឹកបានស្រកទៅវិញ ប៉ុន្តែបានបង្កឱ្យផ្លូវជាច្រើនខ្សែរងការខូចខាត។

លោក ធន សារី ប្រធានមន្ទីរអភិវឌ្ឍជនបទខេត្តមណ្ឌលគិរី ដែលបានដឹកននាំមន្រ្តីក្រោមឱវាទបានចុះត្រួតពិនិត្យស្ថាន​ភាពផ្លូវដែលរងផលប៉ះ បានឱ្យដឹងថា ហេតុការណ៍គ្រោះធម្មជាតិនេះ បានធ្វើឱ្យប៉ះពាល់ដល់ផ្លូវជនបទចំនួន៥ខ្សែ ស្ថិតក្នុងឃុំស្រែសង្គម ឃុំស្រែហ៊ុយ ឃុំអរបួនលើ និងឃុំសុខសាន្តស្រុកកោះញែក ដែលសរុបទាំងអស់មានផ្លូវប្រវែង ៦៤ ៦០០ម៉ែត្រ ។ លោក ធន សារី បានបញ្ជាក់ថា ៖«បន្ទាប់ពីពិនិត្យផ្លូវទាំងនោះក្នុងនាមមន្ទីរក៏បានឧបត្ថម្ភថវិកាចំនួន២ ០០០ ០០០រៀលទៅដល់រដ្ឋបាលឃុំសុខសាន្ត ដើម្បីចាក់ដីបំពេញជួសជុលផ្លូវបន្ទាន់ ធ្វើយ៉ាងណាងជួយសម្រួលដល់ការធ្វើដំណើរជូនប្រជាប្រជាពលរដ្ឋបណ្ដោះអាសន្នសិន»។

ចំណែកផ្លូវដែលរងការខូចខាតនៅបណ្ដាឃុំផ្សេងដែលស្ថិតក្នុងដែនសមត្ថកិច្ចរបស់មន្ទីរអភិវឌ្ឍជនបទ ក្នុងនាមមន្ទីរជំនាញ នឹងខិតខំស្វែងរកកញ្ចប់ថវិកាបន្ទាន់ណាមួយដើម្បី កែសម្រួលជួសជុលផ្លូវទាំងនោះដែលរងផលប៉ះពាល់ដោយជំនន់ទឹកភ្លៀង៕

អត្ថបទ៖ រៀម សុខហេង