កម្ពុជាប្តេជ្ញាចិត្តមុតមាំចំពោះចំណង«មិត្តភាពដែកថែប»ជាមួយចិន តាមរយៈការពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយបន្ថែមទៀត

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បញ្ជាក់ប្រាប់នាយករដ្ឋមន្ត្រីចិនលោក លី ឈាង ថា ទំនាក់ទំនងរវាងកម្ពុជា-ចិន គឺជាចំណងមិត្តភាពដែកថែប ហើយកម្ពុជា បន្តប្ដេជ្ញាចិត្តយ៉ាងមុតមាំចំពោះចំណងមិត្តភាពដែលឆ្លងកាត់ដំណាក់កាលប្រវត្តិសាស្ត្រជាច្រើន តាមរយៈការពង្រឹងបន្ថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយ។

ក្នុងឱកាសខួបលើកទី ៧៦ នៃការបង្កើតសាធារណរដ្ឋប្រជាមានិតចិន សម្ដេច ហ៊ុន ម៉ាណែត សរសេរលិខិតបញ្ជាក់ទៅកាន់នាយករដ្ឋមន្ត្រីចិនដូច្នេះ៖«កម្ពុជាបន្តប្តេជ្ញាចិត្តយ៉ាងមុតមាំចំពោះចំណងមិត្តភាពដែកថែប ដែលកម្ពុជាមានជាមួយចិន។ ក្នុងស្មារតីនេះ យើងប្តេជ្ញាពង្រឹងបន្ថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយ ជំរុញឱ្យសម្រេច បានគោលដៅ នៃក្របខ័ណ្ឌកិច្ចសហប្រតិបត្តិការត្បូងពេជ្រ និងការកសាងសហគមន៍វាសនារួមកម្ពុជា-ចិន គ្រប់រដូវកាល ក្នុងយុគសម័យថ្មី ដែលនាំមកនូវវិបុលភាពយូរអង្វែងដល់ប្រជាជនរបស់យើង និងរួមចំណែក ដល់សន្តិភាព ស្ថិរភាព និងការអភិវឌ្ឍប្រកបដោយចីរភាពក្នុងតំបន់ និងពិភពលោក។»។

កម្ពុជា និង​ចិន​បាន​បង្កើត​ទំនាក់ទំនង​ការទូត​ជា​ផ្លូវការ​នៅ​ថ្ងៃ​ទី១៩ ខែកក្កដា ឆ្នាំ១៩៥៨ ប៉ុន្តែទំនាក់​ទំន​ង​​រវាងប្រទេសទាំងពីរមានតាំងពីសតវត្សរ៍ទី១៣មកម្ល៉េះ។ ទំនាក់ទំនងនេះបាន​ឆ្លង​កាត់​ការ​សាកល្បង និង​ការ​លំបាក​ជា​ប្រវត្តិសាស្ត្រ​ជាច្រើន​ ហើយទំនាក់ទំនងដ៏យូរអង្វែងរវាងប្រទេសទាំងពីរ បានផ្ដល់ប្រយោជន៍រួមឱ្យគ្នាទៅវិញទៅមកជាច្រើន។

ថ្នាក់ដឹកនាំនៃប្រទេសទាំងពីរបានផ្លាស់ប្ដូរដំណើរទស្សនកិច្ច និងមានជំនួបជាមួយគ្នា ដើម្បីគូសបញ្ជាក់ពីភាពរឹងមាំនៃទំនាក់ទំនាក់ទំនង និងកិច្ចសហប្រតិបត្តិការរវាងប្រទេសគ្នា ដែលជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែប។

ក្នុងនាមជាមិត្តដែកថែបរបស់កម្ពុជា ក្នុងពេលបំពេញទស្សនកិច្ចផ្លូវរដ្ឋនៅកម្ពុជា កាលពីពាក់កណ្ដាលខែមេសា ឆ្នាំ២០២៥ ប្រធានាធិបតីចិន ស៊ីជីនពីង បានឯកភាពកសាងសហគមន៍វាសនារួមកម្ពុជា-ចិន ក្នុងយុគសម័យថ្មីគ្រប់រដូវកាល  ព្រមទាំងអះអាងថា  ចិននឹងបន្តពង្រឹង និងពង្រីកកិច្ចសហប្រតិបត្តិការគ្រប់វិស័យជាមួយកម្ពុជា និងប្តេជ្ញាចិត្តគាំទ្រកម្ពុជាយ៉ាងមុតមាំនៅគ្រប់កាលៈទេសៈ ដើម្បីជួយកម្ពុជាសម្រេចបាននូវចក្ខុវិស័យឆ្នាំ២០៥០ ក្លាយជាប្រទេសមានចំណូលខ្ពស់៕

ដោយ៖ ង៉ិល ណារ៉ាត់