មេសិទ្ធិមនុស្សកម្ពុជា ប្រាប់មេដឹកនាំថៃឱ្យចេះគិត កុំចង់មានជម្លោះតពូជ កុំយកកម្ពុជា-ថៃ ជាកន្លែងសាកអាវុធរបស់មហាអំណាច

លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជានៅថ្ងៃទី០៦ ខែតុលា ឆ្នាំ២០២៥នេះ បានចេញសារជាចំហរមួយទៅកាន់មេដឹកនាំនៅប្រទេសថៃ ដោយប្រាប់ឱ្យចេះគិត កុំចេះតែចង់មានជម្លោះជាមួយកម្ពុជារហូតតពូជ និងកុំយកប្រទេសទាំង២ធ្វើជាទីលានសាកអាវុធរបស់ប្រទេសមហាអំណាច។ សារដាស់តឿនរបស់ប្រធានគណៈកម្មាធិការសិទ្ធិមនុស្សកម្ពុជានៅពេលនេះ គឺស្របពេលដែលជម្លោះព្រំដែនកម្ពុជា-ថៃ នៅតែមិនទាន់អាចដោះស្រាយបាន ដោយសារតែភាគីថៃហាក់ដូចជាគ្មានភាពស្មោះត្រង់ក្នុងការដោះស្រាយបញ្ហាដោយសន្តិវិធី។

តាមរយៈទំពរហ្វេសប៊ុក លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានសរសេរថា៖ «អ្នកកាន់អំណាចថៃ ត្រូវគិតពិចារណាឲ្យបានស៊ីជម្រៅទៅដល់ជីវិតប្រជាជន និងសេដ្ឋកិច្ច។ កុំវង្វេងប្រវត្តិសាស្ត្រ និងក្លែងផែនទីធ្វើឲ្យប្រទេសទាំង២ មានជម្លោះនឹងគ្នាតពូជ។ ជាពិសេស ជៀសវាងកុំយកប្រទេសយើងទាំង២ជាកន្លែងសាកអាវុធដែលផលិតនៅចិន និងអាមេរិក»។ ជាមួយគ្នានេះ លោក កែវ រ៉េមី ក៏ទាញការចាប់អារម្មណ៍ថា ប្រទេសរុស្ស៊ី និងអ៊ុយក្រែនជាកន្លែងដែលបាន និងកំពុងសាកអាវុធរបស់មហាអំណាចលោកសេរី និងរុស្ស៊ី រួចហើយ ពោល គឺនៅតែអាវុធរបស់ចិនតែប៉ុណ្ណោះ។ ដូច្នេះហើយ លោកប្រាប់ទៅមេដឹកនាំថៃថា បើឈប់បាន ក៏ឈប់ទៅ។

សាររបស់លោក កែវ រ៉េមី នាពេលនេះ មិនមែនជារឿងចៃដន្យឡើយ។ មិនចៃដន្យ ដោយសារតែមេដឹកនាំថ្មីរបស់ថៃ ក៏ដូចជា មេទ័ពថ្មីថៃដែលទើបចូលកាន់តំណែង តែងតែបានបញ្ចេញសារមិនផ្តល់ផលវិជ្ជមានដល់ដំណើរការបញ្ចប់ជម្លោះព្រំដែនកម្ពុជា-ថៃដោយសន្តិវិធីសោះ។ រាប់ចាប់ពីនាយករដ្ឋមន្រ្តី រដ្ឋមន្រ្តីការពារជាតិ រដ្ឋមន្រ្តីការបរទេស រួមទាំង មេបញ្ជាការថ្មីនៃយោធាភូមិភាគ១ និងភូមិភាគ២របស់ថៃ សុទ្ធតែបានបញ្ចេញសម្តីមិនស្របនឹងស្ថានការ ហើយសម្តីខ្លះទៀតនោះ គឺក្នុងន័យបំផ្លាញកិច្ចខិតខំប្រឹងប្រែងដែលភាគីទាំង២កម្ពុជា-ថៃ បានសម្រេចរួមគ្នាកន្លងមក ដូចជា បទឈប់បាញ់ និងលទ្ធផលនៃកិច្ចប្រជុំពិសេសគណៈកម្មាធិការព្រំដែនទូទៅ(GBC) ជាដើម។ រាជរដ្ឋាភិបាល និងកងទ័ពកម្ពុជា បាន និងកំពុងអនុវត្តយ៉ាងខ្ជាប់ខ្ជូននូវបទឈប់បាញ់ តែភាគីថៃវិញ តែងតែរកលេសបង្កហេតុបំពានបទឈប់បាញ់ជាបន្តបន្ទាប់។

ក្រៅពីបញ្ហានេះ កងទ័ពថៃ នៅតែមិនព្រមដោះលែងទាហានកម្ពុជាចំនួន១៨នាក់ដែលទាហានថៃបានប្រើល្បិចចាប់ខ្លួនដោយខុសច្បាប់នៅក្រោយបទឈប់បាញ់ចូលធរមាន។ គិតមកដល់ថ្ងៃទី០៦ ខែតុលានេះ គឺមានរយៈពេល៦៩ថ្ងៃហើយ ដែលវីរកងទ័ពកម្ពុជាចំនួន១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ។ កម្ពុជា អំពាវនាវឱ្យភាគីថៃដោះលែងពួកគាត់ត្រឡប់មកវិញឱ្យបានឆាប់រហ័សជាទីបំផុត ដើម្បីឱ្យពួកគាត់អាចវិលត្រឡប់មកជួបជុំក្រុមគ្រួសាររបស់ពួកគាត់ និងប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ។

សូមគូសបញ្ជាក់ថា  រាជរដ្ឋាភិបាលកម្ពុជា បាន និងកំពុងធ្វើការយ៉ាងសស្រាក់សស្រាំឥតឈប់ឈរនូវគ្រប់យន្តការដោះស្រាយទាំងអស់លើករណីនេះ ដើម្បីឱ្យភាគីថៃដោះលែងកងកម្លាំងកម្ពុជាទាំង១៨នាក់នោះ វិលត្រឡប់មកវិញឱ្យបានឆាប់រហ័សជាទីបំផុត និងដោយសុខសុវត្ថិភាព។ រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ មិនដែលបោះបង់កងកម្លាំងណាម្នាក់ចោលនោះឡើយ ទោះក្នុងកាលៈទេសៈណាក៏ដោយ៕