៩ខែឆ្នាំនេះ ខ្យល់កន្ត្រាក់កើតឡើងជាង២៦០​លើក​ ស្លាប់-របួសមនុស្សជាង៤០នាក់ និងបំផ្លាញផ្ទះជិត៧ពាន់ខ្នង

នៅក្នុងរយៈពេល៩ខែ ឆ្នាំ២០២៥នេះ ខ្យល់កន្ត្រាក់បានកើតឡើងជាង២៦០លើក បណ្តាលឱ្យមនុស្សស្លាប់ និង របួស៤០នាក់ និងបំផ្លាញផ្ទះសម្បែងប្រជាពលរដ្ឋជិត៧ពាន់ខ្នង ព្រមទាំងហេដ្ឋារចនាសម្ព័ន្ធមួយចំនួនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅរសៀលថ្ងៃទី៧តុលានេះថា ខ្យល់កន្ត្រាក់ក្នុងរយៈពេល៩ខែ ឆ្នាំ២០២៥នេះ បានកើតឡើងចំនួន ២៦៦ លើកបណ្ដាលឱ្យរលំផ្ទះចំនួន៤៤៣ខ្នង របើកដំបូលផ្ទះចំនួន៦៤៥៤ ខ្នង តូបផ្សារ២៦តូប សាលារៀន៤១ ខ្នង អគាររដ្ឋបាល ១៨ កន្លែង ស្លាប់មនុស្ស៩នាក់ និងរបួស ៣១នាក់។

លោកបានបន្តថា ក្នុងចំណោមអ្នកស្លាប់ទាំង៩នាក់ក្នុងនោះនៅខេត្តកំពង់ស្ពឺ១នាក់ ព្រៃវែង១នាក់ កំពង់ចាម៤នាក់បាត់ដំបង១នាក់ សៀមរាប១នាក់ និងខេត្តកំពត១នាក់។

លោកបានបន្ថែមទៀតថា តួលេខនេះបើធៀបទៅនឹង៩ខែ ឆ្នាំ២០២៤កន្លងទៅឃើញថា មានការថយចុះបន្តិច ខណៈរយៈ​ពេល ៩ខែ ឆ្នាំមុនខ្យល់កន្ត្រាក់ បានកើតឡើងចំនួន ២៦៩ លើក បណ្តាលឱ្យរលំផ្ទះចំនួន៤៩០ខ្នង របើកដំបូលផ្ទះចំនួន ៣ ៩៣៥ ខ្នង សាលារៀន ៥២ ខ្នង តូប ផ្សារ ៣៩ តូប អគាររដ្ឋបាល ២៣ កន្លែង ស្លាប់មនុស្ស ៥ នាក់ និងរបួស ៣៩ នាក់។ក្នុងចំណោមអ្នកស្លាប់ចំនួន ៥ នាក់ ក្នុងនោះមាន ១ នាក់ ស្លាប់ នៅខេត្តរតនគីរី ពោធិ៍សាត់ ១ នាក់ បាត់ដំបង ១ នាក់ សៀមរាប ១ នាក់ និងខេត្តព្រះវិហារ ១នាក់៕

អត្ថបទ៖ សំអឿន