នយោបាយ

ប្រធានសភាសង្ឃឹមថាចិននឹងជួយពង្រឹងសន្តិសុខ និងស្ដារសណ្ដាប់ធ្នាប់ពិភពលោកឡើងវិញ

បានផុស

៣ ខែ មុន

នៅ

ថ្ងៃអង្គារ ៣១ មីនា ២០២៦

ដោយ

ប្រធានសភាសម្ដេចសភាធិបតី ឃួន សុដារី បានបង្ហាញពីក្ដីសង្ឃឹមរបស់សម្ដេចចំពោះប្រទេសចិន ដោយជឿថាប្រទេសនេះនឹងបន្តចូលរួមចំណែកក្នុងការពង្រឹងសុខសន្ដិភាពពិភពលោក និងស្ដារសណ្ដាប់ធ្នាប់ពិភពលោកឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបជាមួយឯកអគ្គរដ្ឋទូតចិនប្រចាំកម្ពុជាលោក វ៉ាន វិនពីន នៅវិមានសភាជាតិព្រឹកថ្ងៃទី៣១ ខែមីនា ឆ្នាំ២០២៦នេះ សម្ដេចសភាធិបតី ឃួន សុដារី បានអបអរសាទរចំពោះជោគជ័យនៃមហាសន្និបាតពិគ្រោះយោបល់នយោបាយប្រជាជនចិន និងមហាសន្និបាតសភាតំណាងប្រជាជនទូទាំងប្រទេសចិនកាលពីពេលថ្មីនេះ ដោយបង្ហាញពីភាពរឹងមាំ និងទិសដៅវិបុលភាពរបស់ចិនទាំងពេលនេះ និងពេលខាងមុខ។

សម្ដេចបានបង្ហាញក្ដីសង្ឃឹមថាប្រទេសចិន និងបន្តចូលរួមចំណែកយ៉ាងសំខាន់ ក្នុងការពង្រឹងសុខសន្តិភាពពិភពលោក និងស្តារសណ្តាប់ធ្នាប់ពិភពលោកឡើងវិញ លើកកម្ពស់យន្តការពហុភាគីនិយម ដែលជាខែលសម្រាប់ប្រទេសតូចៗ និងកំពុងអភិវឌ្ឍន៍ ក្នុងកិច្ចការពារអធិបតេយ្យនិងជំរុញការអភិវឌ្ឍរបស់ខ្លួន។

សម្ដេចក៏បានថ្លែងអំណរគុណចំពោះជំនួយនានារបស់ប្រទេសចិនដែលបានជួយកម្ពុជាឱ្យមានការអភិវឌ្ឍ និងរីកចម្រើនដូចបច្ចុប្បន្ន។ ក្រៅពីនេះប្រទេសចិនក៏ជាភាគីមួយដ៏សំខាន់ក្នុងការសម្របសម្រួលដោះស្រាយវិវាទព្រំដែនកម្ពុជា-ថៃផងដែរ។

ឯកអគ្គរដ្ឋទូតចិនប្រចាំកម្ពុជាលោក វ៉ាន វិនពីន បានលើកឡើងថា ប្រទេសចិននឹងបន្តគាំទ្រដល់បុព្វហេតុអភិវឌ្ឍន៍នៅកម្ពុជា ហើយចំណងមិត្តភាពកម្ពុជា-ចិន «មិនប្រែប្រួល» ឡើយ និងមិនត្រឹងតែជាពាក្យនិយាយប៉ុណ្ណោះទេ ប៉ុន្ដែបានបង្ហាញជាលទ្ធផលជាក់ស្ដែង។

សម្រាប់ជម្លោះកម្ពុជា-ថៃវិញ លោក វ៉ាង វិនពីន បានគូសបញ្ជាក់ថាចិននឹងជំរុញឱ្យភាគីទាំងពីរបន្តកិច្ចសន្ទនា ដើម្បីដោះស្រាយបញ្ហាដោយសន្តិវិធី ឆ្ពោះទៅរកភាពប្រក្រតីឡើងវិញ។

ប្រទេសចិនជាមហាអំណាចពិភពលោកមួយដែលកំពុងរីកចម្រើនបន្តបន្ទាប់ ប្រទេសនេះបានរួមចំណែកយ៉ាងសំខាន់ក្នុងការថែរក្សាសណ្ដាប់ធ្នាប់ពិភពលោកតាមរយៈអំណាចសេដ្ឋកិច្ច យោថា ការទូត និងភាពជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ៕

អត្ថបទដោយ ហ៊ុន សិរីវឌ្ឍន៍