រដ្ឋមន្ត្រីការបរទេសអាស៊ាន ចូលរួមរំលែកទុក្ខ មរណភាពលោក SHINZO ABE

រដ្ឋមន្ត្រីការបរទេសអាស៊ាន នៅព្រឹកថ្ងៃទី០៩ ខែកក្កដា ឆ្នាំ២០២២ បានសេចក្តីថ្លែងការណ៍ ស្តីពីការបាញ់ សម្លាប់អតីតនាយករដ្ឋមន្ត្រីជប៉ុនលោក SHINZO ABE កាលពីថ្ងៃទី០៨ ខែកក្កដា ឆ្នាំ២០២២។

សេចក្តីថ្លែងការណ៍បានលើកឡើងថា “យើងជារដ្ឋមន្ត្រីការបរទេសអាស៊ានមានក្តីរន្ធត់ និងសោកសៅ ចំពោះការបាញ់ សម្លាប់ឯកឧត្តម   ស៊ីនហ្សូ អាបេ អតីតនាយករដ្ឋមន្ត្រីជប៉ុន នៅទីក្រុងណារ៉ា កាលពីថ្ងៃទី៨ កក្កដា ឆ្នាំ២០២២ ដែលនេះជាទង្វើមិនអាចមានទឡ្ហីករណ៍ត្រឹមត្រូវឡើយ។ យើងទាំងអស់គ្នាសូមចូលរួមរំលែកទុក្ខយ៉ាងក្រៀមក្រំបំផុតចំពោះរដ្ឋាភិបាល និងប្រជាជនជប៉ុន ព្រមទាំងក្រុមគ្រួសាររបស់ឯកឧត្តមអតីតនាយករដ្ឋមន្ត្រី ស៊ីនហ្សូ អាបេ ដែលជាមិត្តជាទីស្រឡាញ់រាប់អានដ៏ប្រពៃរបស់អាស៊ាន”។

សូមបញ្ជាក់ថា កាលពីថ្ងៃទី០៨ ខែកក្កដា ឆ្នាំ២០២២ លោក ស៊ីនហ្សូ អាបេ (Shinzo Abe) អតីតនាយករដ្ឋមន្ត្រីជប៉ុន ត្រូវបានឃាតករបាញ់ប្រហារនៅអំឡុងពេលធ្វើយុទ្ធនាការឃោសនាបោះ ឆ្នោតថ្នាក់ជាតិ នៅភាគខាងលិចទីក្រុង Nara ប្រទេសជប៉ុន ហើយលោកបានស្លាប់ក្រោយពីបញ្ជូនដល់មន្ទីរពេទ្យ៕ កោះកែវ