ព័ត៌មានអន្ដរជាតិ

ថ្ងៃនេះខួប ១ ឆ្នាំការធ្វើឃាតលោក Abe ខណៈសវនាការកាត់ទោសជនសង្ស័យមិនទាន់បើកនៅឡើយទេ

បានផុស

៣ years មុន

នៅ

ថ្ងៃសៅរ៍ ៨ កក្កដា ២០២៣

ដោយ

ថ្ងៃសៅរ៍ ទី៨ ខែកក្កដានេះ គឺជាខួប ១ ឆ្នាំហើយ ចាប់តាំងពីលោក Shinzo Abe ដែលជានាយករដ្ឋមន្ត្រីកាន់អំណាចយូរបំផុតរបស់ប្រទេសជប៉ុន ត្រូវបានធ្វើឃាត ខណៈសំណុំរឿងក្ដីកាត់ទោសជនសង្ស័យក៏នៅមិនទាន់ត្រូវបានបើកសវនាការនៅឡើយផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Abe ត្រូវបានជនសង្ស័យឈ្មោះ Yamagami Tetsuya បាញ់សម្លាប់ទាំងថ្ងៃ ខណៈកំពុងធ្វើយុទ្ធនាការនៅទីក្រុង Nara ភាគខាងលិចប្រទេសជប៉ុន ខណៈការស្លាប់របស់លោកបានធ្វើឲ្យមានភាពតក់ស្លុតយ៉ាងខ្លាំងពេញប្រទេស ។

មិនបានប៉ុន្មានផង ជនសង្ស័យឈ្មោះ Yamagami ត្រូវបានចាប់ខ្លួនភ្លាមៗ បន្ទាប់ពីមានការចោទប្រកាន់ថាបានបើកការបាញ់ប្រហារលើលោក Abe កាលពីថ្ងៃទី៨ ខែកក្កដា ឆ្នាំ២០២២ ខណៈជនសង្ស័យរូបនេះត្រូវបានចោទប្រកាន់ពីបទមនុស្សឃាត រួមជាមួយការចោទប្រកាន់ផ្សេងទៀតកាលពីខែមករាឆ្នាំនេះ ប៉ុន្តែទោះជាយ៉ាងណា សំណុំរឿងប្រឆាំងនឹង Yamagami នៅមិនទាន់ត្រូវបានបើកសវនាការនៅឡើយទេ ។

ពាក់ព័ន្ធនឹងបញ្ហានេះដែរ Yamagami បានប្រាប់អាជ្ញាធរថា គាត់បានប្រព្រឹត្តទង្វើរបែបនេះ ដោយសារតែលោក Abe មានទំនាក់ទំនងជិតស្និទ្ធជាមួយក្រុមសាសនា ហើយម្តាយរបស់គាត់បានបរិច្ចាកប្រាក់យ៉ាងច្រើនដល់ក្រុមនេះ ជាហេតុធ្វើឲ្យគ្រួសាររបស់គាត់ជួបវិបត្តិហិរញ្ញវត្ថុ ។

ស្របពេលជាមួយគ្នានេះ មេធាវីរបស់ Yamagami ក៏បាននិយាយផងដែរថា សវនាការលើកដំបូងនៃការកាត់ក្តីរបស់ជនសងស្ស័យរូបនេះរំពឹងនឹងត្រូវធ្វើឡើយនៅឆ្នាំក្រោយឯណោះ ។

គួរបញ្ជាក់ថា ចាប់តាំងពីការបាញ់ប្រហារសម្លាប់លោក Shinzo Abe មក ប៉ូលិសជប៉ុនបាននឹងកំពុងរឹតបន្តឹងវិធានការសន្តិសុខខ្លាំងមែនសម្រាប់ការពារមន្ត្រីជាន់ខ្ពស់ ខណៈកាលពីខែមេសា ក៏មានហេតុការណ៍បំផ្ទុះគ្រាប់បែកប៉ុនប៉ងធ្វើឃាតលើលោកនាយករដ្ឋមន្ត្រី Fumio Kishida ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK