Connect with us

នយោបាយ

សម្ដេចតេជោ ហ៊ុន សែន នឹងអញ្ជើញបើកយុទ្ធនាការឃោសនាបោះឆ្នោតជ្រើសតាំង តំណាងរាស្រ្ដ

បានផុស

នៅ

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានថ្លែងបញ្ជាក់ថា សម្ដេច នឹងអញ្ជើញជាអធិបតី ក្នុងពិធីបើកយុទ្ធនាការឃោសនាបោះឆ្នោតជ្រើសតាំង តំណាងរាស្រ្ដ នីតិកាលទី ៧ នៅថ្ងៃបើកយុទ្ធនាការឃោសនាបោះឆ្នោត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់របស់សម្ដេចតេជោ ហ៊ុន សែន បានធ្វើឡើងក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-បាវិត និងបើកការដ្ឋានសាងសង់​ស្ពាន​ឆ្លងកាត់ទន្លេមេគង្គ និងផ្លូវតភ្ជាប់ក្បាលស្ពាន នៅព្រឹកថ្ងៃទី ៧ ខែមិថុនា ឆ្នាំ ២០២៣ នេះ។

សម្ដេចតេជោ ហ៊ុន សែន បានថ្លែងថា ក្នុងរយៈពេលចុងក្រោយនេះ កម្មវិធីរបស់សម្ដេចប្រចាំសប្ដាហ៍ មានការមមារញឹកខ្លាំង តែនៅពេលចាប់ផ្ដើមការឃោសនាបោះឆ្នោត សម្ដេចនឹងមានពេលទំនេរខ្លះវិញ។

ជាមួយគ្នានេះ សម្ដេចតេជោ ហ៊ុន សែន បានបញ្ជាក់ថា សម្ដេច នឹងអញ្ជើញជាអធិបតីក្នុងពិធីបើកយុទ្ធនាការឃោសនាបោះឆ្នោត នៅថ្ងៃទីមួយនៃការឃោសនា ហើយថ្ងៃបន្តបន្ទាប់ទៀត សម្ដេច នឹងតាមដានមើលសភាពការណ៍ឃោសនាវិញម្ដង។

សម្ដេចតេជោ ហ៊ុន សែន ថ្លែងបែបនេះថា «ដល់តែពេលឃោសនាបោះឆ្នោត អាហ្នឹងខ្ញុំទំនេរវិញហើយ ព្រោះខ្ញុំអត់ចេញរកសន្លឹកឆ្នោតទេ ខ្ញុំគ្រាន់តែបើកយុទ្ធនាការឃោសនាបោះឆ្នោត រួចហើយខ្ញុំសម្រាកនៅផ្ទះហើយ តាមមើលសភាពការណ៍ៗ»។

ការឃោសនាបោះឆ្នោតជ្រើសតាំង តំណាងរាស្រ្ដ នីតិកាលទី ៧ នឹងចាប់ផ្ដើមពីថ្ងៃទី ១ ខែកក្កដា ដល់ថ្ងៃទី ២១ ខែកក្កដា ឆ្នាំ ២០២៣។ ចំណែកឯការបោះឆ្នោត នឹងប្រព្រឹត្តទៅនៅថ្ងៃទី ២៣ ខែកក្កដា ឆ្នាំ ២០២៣​។

កាលពីថ្ងៃទី ២ ខែមិថុនា ឆ្នាំ ២០២៣ គណៈអចិន្ត្រៃយ៍នៃគណៈកម្មាធិការកណ្ដាល គណបក្សប្រជាជនកម្ពុជា បានចេញសេចក្ដីជូនដំណឹងថា ថ្នាក់កណ្តាល និងគណបក្សរាជធានីភ្នំពេញ នឹងរៀបចំពិធីរំលឹកខួបលើកទី ៧២ នៃថ្ងៃកំណើតគណបក្សគួបជាមួយនឹងពិធីបើកយុទ្ធនាការឃោសនាបោះឆ្នោត ជ្រើសតាំងតំណាងរាស្ត្រ នីតិកាលទី ៧ នៅថ្ងៃសៅរ៍ ទី១ ខែកក្កដា ឆ្នាំ២០២៣ នៅមជ្ឈមណ្ឌលសន្និបាត និងពិពណ៌កោះពេជ្រ។

នៅថ្ងៃនោះ គណបក្សប្រជាជនកម្ពុជា នឹងជួលប្រព័ន្ធវិទ្យុ ទូរទស្សន៍ឯកជននានា ដើម្បីធ្វើការផ្សាយ បន្តផ្ទាល់ចាប់ពីម៉ោង ៦ និង ៥០នាទី ដល់ម៉ោង ៩ និង០០នាទីព្រឹក។ ផ្អែកលើនេះ ប្រធានគណៈកម្មាធិការគណបក្សរាជធានី ខេត្តនីមួយៗ យកចិត្តទុកដាក់ចាត់ចែងរៀបចំដូចតទៅ ៖

១- ត្រូវចាត់ចែងឲ្យមានការផ្សាយបន្តផ្ទាល់ តាមគ្រប់មធ្យោបាយពីវិទ្យុ និងទូរទស្សន៍ឯកជននានា នូវ ការថ្លែងសុន្ទរកថា នយោបាយរបស់សម្តេចតេជោ ហ៊ុនសែន ប្រធានគណបក្សឲ្យបានទៅដល់គ្រប់ទីតាំងរបស់គ្រប់ថ្នាក់ (ថ្នាក់ខេត្ត ក្រុង ស្រុក ខណ្ឌ ឃុំ សង្កាត់…) ដែលមានការជួបជុំ ប្រារព្ធពិធីមុនការហែក្បួនឃោសនា ដោយធ្វើយ៉ាងណាឲ្យគ្រប់គ្នាបានឃើញរូបភាព ឬ/និងបានឮសំឡេង ផ្ទាល់របស់សម្តេចប្រធានគណបក្សរបស់យើង។

២- ពេលស្តាប់ចប់សុន្ទរកថា នយោបាយរបស់សម្តេចប្រធានគណបក្សរួចហើយ ក្បួនឃោសនា របស់គ្រប់ថ្នាក់ គ្រប់ផ្នែក អាចចេញហែ ឬឃោសនាតាមគោលដៅនានា ដែលបានគ្រោងទុក។

៣- ត្រូវមានការផ្គត់ផ្គង់អាហារ ទឹកសុទ្ធ ការថែរក្សាសុខភាព និងសុវត្ថិភាពជូនបងប្អូនដែលបាន ចូលរួមឲ្យបានល្អបំផុត៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម