លោក សោម សូរីដា ៖ ការវាយតម្លៃទុកមុនថា ការបោះឆ្នោតមិនសេរី និងយុត្តិធម៌នោះ ជាការវាយតម្លៃមានចរិតនយោបាយសុទ្ធសាធ

មន្ត្រីជាន់ខ្ពស គ.ជ.ប បានលើកឡើងថា ការវាយតម្លៃទុកជាមុនថា ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ ឆ្នាំ ២០២៣ មិនមានភាពសេរី និងយុត្តិធម៌នោះ គឺជាការវាយតម្លៃមានចរិតនយោបាយសុទ្ធសាធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ បន្ទាប់ពីអង្គការឃ្លាំមើលការបោះឆ្នោតក្នុងតំបន់មួយ ឈ្មោះថា ANFREL កាលពីថ្ងៃទី ៥ ខែកក្កដា ឆ្នាំ ២០២៣ បានចេញផ្សាយរបាយការណ៍វាយតម្លៃជាមុន អំពីការបោះឆ្នោតជ្រើសតាំង តំណាងរាស្ត្រ នីតិកាលទី ៧ ថា គ្មានឡើយភាពសេរី និងយុត្តិធម៌។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប បានបញ្ជាក់ថា ការវាយតម្លៃនេះ គឺជាការវាយតម្លៃបែបនយោបាយសុទ្ធសាធ ដោយមិនបានពិនិត្យមើលទៅលើទិដ្ឋភាពបច្ចេកទេស និងទិដ្ឋភាពច្បាប់ឡើយ។

លោកថា «ការវាយតម្លៃទុកជាមុនថា ការបោះឆ្នោត ពុំមានភាពសេរី និងយុត្តិធម៌នេះ គឺជាការវាយតម្លៃមួយ ដែលមានចរិតនយោបាយសុទ្ធសាធ ការវាយតម្លៃនេះពុំបានថ្លឹងថ្លែងទៅលើទិដ្ឋភាពបច្ចេកទេស និងទិដ្ឋភាពច្បាប់ រួមជាមួយនឹងកិច្ចដំណើរការទូទៅ នៃដំណើរការរៀបចំការបោះឆ្នោតឡើយ»។

អ្នកនាំពាក្យ គ.ជ.ប រូបនេះ បានបញ្ជាក់ថា គ.ជ.ប អនុវត្តការងាររបស់ខ្លួន ស្របទៅតាមរដ្ឋធម្មនុញ្ញ, ច្បាប់ ស្ដីពី ការបោះឆ្នោតជ្រើសតាំង តំណាងរាស្រ្ដ និងបទបញ្ជា និងនីតិវិធី ដែលមានការផ្ដល់យោបល់ពីគ្រប់ភាគីពាក់ព័ន្ធ ជាគោលនៅក្នុងការអនុវត្ត។

លោក សោម សូរីដា បានបន្ថែមថា «អញ្ចឹងពីដំណាក់កាលមួយ ទៅដំណាក់កាលមួយ កិច្ចការទាំងអស់ត្រូវបានកំណត់ដំណើរការប្រតិបត្តិ ដូចមានចែងនៅក្នុងច្បាប់ បទបញ្ជា និងនីតិវិធីរបស់ គ.ជ.ប ហើយ គ.ជ.ប មិនអាចធ្វើអ្វីលើសអំពីកិច្ចការ ដែលកំណត់ដោយច្បាប់នោះទេ»។

បើតាមមន្ត្រីជាន់ខ្ពស់ គ.ជ.ប រូបនេះ សេរី និងយុត្តិធម៌ វាត្រូវឆ្លុះបញ្ចាំងអំពីដំណើរការអនុវត្តរបស់ គ.ជ.ប ថាតើកិច្ចការដែល គ.ជ.បនេះ ស្របតាមបញ្ញាត្តិដែលកំណត់ដោយរដ្ឋធម្មនុញ្ញ, ច្បាប់ ស្ដីពី ការបោះឆ្នោតជ្រើសតាំង តំណាងរាស្រ្ដ, បទបញ្ជា និងនីតិវិធី សម្រាប់ការបោះឆ្នោតដែរឬទេ?

ម្យ៉ាងទៀត ថាតើមន្ត្រីអនុវត្តច្បាប់គោរពក្រមសីលធម៌សម្រាប់មន្ត្រីបោះឆ្នោត បានដែរឬទេ? ចំណុចទាំងនេះ គឺជាអ្វីដែល គ.ជ.ប ខិតខំប្រឹងប្រែងអនុវត្ត និងតម្រង់ទិសមន្ត្រីអនុវត្តច្បាប់របស់ខ្លួន ឲ្យអនុវត្តប្រកបដោយភាពត្រឹមត្រូវ ប្រកបដោយឯករាជ្យ និងអព្យាក្រឹត្យ៕