ស្តេចសៀករហ័សកម្មខ្មែរលោកគ្រូ ចៅ ហ្វា ទទួលមរណភាពព្រឹកមិញនេះហើយ ក្នុងជន្មាយុ ៩១ឆ្នាំ

មហាជនដែលជាអ្នកគាំទ្រ បង្ហាញការសោកស្តាយ បន្ទាប់ពីទទួលដំណឹងនៃមរណភាព របស់ស្តេចសៀករហ័សកម្មស្រុកខ្មែរ លោកគ្រូ ចៅ ហ្វា ក្រោយបាត់ដំណឹងមួយរយ:ធំ ស្រាប់តែពេលនេះមានដំណឹងថា លោកទទួលមរណភាពហើយ ក្នុងវ័យ ៩១ឆ្នាំ ។

បើតាមការបញ្ជាក់ឲ្យដឹងពីសំណាក់តារាចម្រៀងជើងចាស់លោក សុះ ម៉ាច បានឲ្យដឹងថា លោកតាចៅ ហ្វា អាយុ៩១ឆ្នាំបិតាសៀករហ័សកម្មស្រុកខ្មែរ ពេលនេះ លោកតាបានលាចាកលោកនេះ នៅព្រឹកថ្ងៃទី៩ ខែតុលា ឆ្នាំ២០២៤ ក្រោយពេលដែលលោកតាធ្លាក់ខ្លួនឈឺធ្ងន់មិនអាចជួយសង្គ្រោះជីវិត បូករួមនិងវ័យជរាផង។

បើតាមការបញ្ជាក់ពីលោក សុះ ម៉ាច ស្តេចសៀករហ័សកម្មខ្មែរ លោកគ្រូ ចៅ ហ្វា គឺទទួលមរណភាពក្រោយពីក្រុមគ្រួសារព្យាយាមយកលោកតា ទៅព្យាបាលកន្លងមករហូតអស់លទ្ធភាពនៃការចំណាយដ៏ច្រើន បើទោះជាមានប័ណ្ណប.ស.សក៏ដោយ។ យ៉ាងណាមិញ លោកក្នុងនាមជាអ្នកស្ថិតក្នុងវិស័យសិល្បៈមួយរូបដែរ ក៏បង្ហាញការសោកស្តាយ និងបួងសួងឱ្យវិញ្ញាណក្ខន្ឌលោកតា បានដល់ឋានសុគតិភពកុំបីខានឡើយ។

ជាមួយដំណឹងមរណ:ទុក្ខដ៏ក្រៀមក្រំនិងសោកសៅនេះដែរ ក៏មានមហាជនមួយចំនួន បង្ហាញការសោកស្តាយព្រមទាំងផ្ញើរសារចូលរួមរំលែកទុក្ខ ជាមួយក្រុមគ្រួសារលោកតា ខណ:ដែលត្រូវបានបាត់បង់ធន់ធានដ៏សំខាន់ និងមានទេពកោសល្យរូបនេះ។

គួររម្លឹកថា​ លោក​តា ចៅ​ ហ្វា នាពេលកន្លងមក ក្រៅតែពីអាជីពសម្តែងសៀកដ៏ល្បីលោកក៏ ជា​គ្រូខ្មែរ​ទទួល​ព្យាបាល​ជំងឺផ្សេង​ៗផងដែរ។លោក​ ចៅ​ហ្វា​ ត្រូវបានគេចាត់ទុកថាជា​ស្តេច​សៀ​ក​ប្រចាំ​ប្រទេស​កម្ពុជាដ៏មានសមត្ថភាពនិងទេពកោសល្យខ្ពស់៕ អត្ថបទ៖ ចាន់រ៉ា