លោក Samuel Paparo ថាអាមេរិកចង់ឃើញកម្ពុជាពង្រីកកិច្ចសហប្រតិបត្តិការយោធាជាមួយខ្លួន

មេបញ្ជាការដ្ឋានឥណ្ឌូប៉ាស៊ីហ្វិកសហរដ្ឋអាមេរិកលោកនាយឧត្តមនាវី Samuel Paparo បានប្រាប់តំណាងការពារជាតិកម្ពុជាថា អាមេរិកចង់ឃើញកម្ពុជាបន្តរក្សាអធិបតេយ្យភាព បន្តពង្រីកកិច្ចសហប្រតិបត្តិការយោធាជាមួយអាមេរិក។

ការថ្លែងនេះក្នុងពេលដែលោក Samuel ជួបជាមួយរដ្ឋលេខាធិការការពារជាតិកម្ពុជាលោក រ៉ាត់ ដារ៉ារ័ត្ន នៅក្រសួងការពារជាតិកម្ពុជាកាលពីថ្ងៃទី១៨ ខែធ្នូ ឆ្នាំ២០២៤ ដោយបានគូសបញ្ជាក់ថា ទស្សនកិច្ចនាវាយោធាលើកទី១របស់អាមេរិក បន្ទាប់ពីខកខាន៨ឆ្នាំមកនេះ ជាចំណុចចាប់ផ្ដើម និងអាចឈានដល់សកម្មភាពរួមគ្នាឡើងវិញនូវលំហាត់ឆ្មាំអង្គរ និងបណ្ដុះបណ្ដាលធនធានមនុស្សកម្ពុជាផងដែរ។

លោកបានបញ្ជាក់បន្ថែមទៀតថាឧត្តមសេនីយ៍ទោរបស់លោកគឺលោក Kyle Saltman នឹងពិភាក្សា ជាមួយកម្ពុជាបន្ថែមទៀតនូវលទ្ធភាពបង្កើតឡើងវិញនូវលំហាត់ឆ្មាំអង្គរ (Angkor Sentinel) ព្រមទាំងសកម្មភាពជាច្រើនផ្សេងទៀត។

ទីភ្នាក់ងារសារព័ត៌មានជាតិបានដកស្រង់ប្រសាសន៍លោក Samuel បញ្ជាក់ថា៖ «អាមេរិកនឹងជំរុញការងានេះដើម្បីបង្កើតឡើងវិញ»។

លំហាត់ឆ្មាំអង្គរ និងការបណ្ដុះបណ្ដាលធនធានមនុស្សទាក់ទងនឹងសន្តិសុខ APCSS ដែលកម្ពុជាធ្លាប់ធ្វើជាមួយអាមេរិកបានផ្អាកតាំងពីឆ្នាំ២០១៧មក។

ក្នុងជំនួបនោះតំណាងកម្ពុជាលោកឧត្តមសេនីយ៍ឯក រ៉ាត់ ដារ៉ារ័ត្ន បានលើកឡើងថាទស្សនកិច្ចរបស់ឧត្តមនាវីអាមេរិកមកកម្ពុជាលើកនេះបានបង្ហាញអំពីការពង្រឹងពង្រីកចំណងទំនាក់ទំនង កិច្ចសហប្រតិបត្តិការ នៃការផ្សារភ្ជាប់ចំណងសាមគ្គីភាពមិត្តភាពរវាងកងទ័ពទាំងពីរកម្ពុជា-អាមេរិក។

លោកថា៖ « គឺជាបង្ហាញនូវទំព័រថ្មីនៃការធ្វើទំនាក់ទំនងរវាងកម្ពុជា និងអាមេរិកឱ្យកាន់តែល្អបន្ថែមទៀត»។

ជាមួយគ្នានោះភាគីកម្ពុជាក៏បានស្នើសុំឱ្យមានការផ្លាស់ប្ដូរទស្សនកិច្ចនាយទាហានជាន់ខ្ពស់អាមេរិកដូចពេលនេះផងដែរ ដែលត្រូវបានលោក Samuel យល់ស្រប។

គួរឱ្យដឹងដែរថាលោក Samuel Paparo បានដឹកនាំនាវាចម្បាំងអាមេរិក USS SAVANNAH ដែលមានផ្ទុកនាវិកចំនួន១០២នាក់ចូលចតនៅកំពង់ផែស្វយ័តក្រុងព្រះសីហនុ៥ថ្ងៃចាប់ពីថ្ងៃទី១៦ ដល់ថ្ងៃទី២០ ខែធ្នូ ឆ្នាំ២០២៤ ដែលជាការចូលមកដល់នៃនាវាទ័ពជើងទឹកមហាអំណាចមួយនេះជាលើដំបូងក្នុងរយៈ៨ឆ្នាំចុងក្រោយ។

អ្នកវិភាគសង្គម និងជាអគ្គលេខាធិការរាជបណ្ឌិតសភាកម្ពុជាលោក យង់ ពៅ យល់ថានេះជាការបង្ហាញនូវសុឆន្ទៈកិច្ចសហប្រតិបត្តិការវាងគ្នានឹងគ្នា ហើយលោកបណ្ឌិតសង្ឃឹមថា កម្ពុជា និងសហរដ្ឋអាមេរិកនឹងមានកិច្ចសហប្រតិបត្តិការល្អឡើងវិញទៅលើវិស័យការពារជាតិ និងវិស័យផ្សេងៗ។

លោកថា៖ «ខ្ញុំរំពឹងថាកម្ពុជា-អាមេរិកនឹងមានកិច្ចសហប្រតិបត្តិការល្អឡើងវិញលើវិស័យការពារជាតិ ក៏ដូចជាវិស័យផ្សេងៗដែរ»។

ទំនាក់ទំនងកម្ពុជា-អាមរិក មួយរយៈចុងក្រោយនេះត្រូវបានមើលឃើញថាមានភាពវិជ្ជមានច្រើនឡើងតាមរយៈដំណើរទស្សនកិច្ចជាបន្តបន្ទាប់នៃមន្ត្រីជាន់ខ្ពស់អាមេរិកមកកាន់កម្ពុជា។ កាលពីថ្ងៃទី១៧ ខែធ្នូ ឆ្នាំ២០២៤ ក្នុងពេលអនុញ្ញាតឱ្យភារធារីស្ដីទីនៃស្ថានទូតអាមេរិកនៅកម្ពុជាលោកស្រី Bridgette L. Walker ជួបសំដែងការគួរសមប្រធានព្រឹទ្ធសភាកម្ពុជា សម្ដេចតេជោ ហ៊ុន សែន បានលើកឡើងថារឿងចាស់គឺជាបទពិសោធន៍សម្រាប់ឱ្យប្រទេសទាំងពីររៀបចំឥរិយាបថនៃទំនាក់ទំនងនៅពេលអនាគត ជាពិសេសគឺការកសាងទំនុកចិត្ត និងកិច្ចសហការផ្សេងទៀត៕

ដោយ ហ៊ុន សិរីវឌ្ឍន៍