នាយករដ្ឋមន្ត្រីហៅអ្នកតាំងខ្លួនស្នេហាជាតិចូលប្រទេសទៅយាមព្រំដែន

នាយករដ្ឋមន្ត្រី សម្ដេចធិបតី ហ៊ុន ម៉ាណែត ប្រកាសហៅអ្នកតាំងខ្លួនជាអ្នកស្នេហាជាតិដែលស្រែកក្ដែងៗពីក្រៅប្រទេសឱ្យត្រលប់មកកម្ពុជា ព្រមទាំងឱ្យកាន់ទ័ពមួយកងអនុសេនាតូចជាមួយនឹងអាវុធទំនើបៗឱ្យថែមទៀតទៅយាមព្រំដែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសហៅនេះគឺឆ្លើយតបនឹងក្រុមប្រឆាំងដែលរិះគន់លើរដ្ឋាភិបាលលើបញ្ហាព្រំដែនជាមួយថៃកាលពីកន្លងនិងរហូតមកដល់ពេលនេះ ដោយសម្ដេចថាប្រសិនពួកគេមកកម្ពុជាសម្ដេចធានាថានឹងគ្មានការចាប់ខ្លួននោះទេ ហើយឱ្យក្របខណ្ឌកងទ័ពថែមទៀត។

សម្ដេចថា៖ «ក្រែងថាមិនទាន់ធ្វើអ្នកស្នេហាជាតិ នៅស្ដាយឥឡូវបើចង់ចូលមកខ្ញុំធានាអត់មានចាប់ខ្លួនទេ ចូលមកខ្ញុំឱ្យមួយកងអនុសេនាតូចឱ្យ ខ្ញុំឱ្យក្របខណ្ឌកងទ័ពទៅខ្ញុំបំពាក់អាវុធចង់បានអីក៏បានដែរ! ហើយខ្ញុំរុញទៅមុខឈរនៅតាមាន់ធំ៦ខែនៅហ្នឹងតែម្ដង ទៅឈរនៅហ្នឹងទើបដឹងថាអារម្មណ៍កងទ័ពពួកគាត់យ៉ាងមិច? សួរថាគាត់មិនមែនស្នេហាជាតិទេអី? ប៉ុន្ដែហេតុអីបានជាកងទ័ពនៅទីនោះមិនប្រយុទ្ធគ្នាម្ដងទៀត? មិនមែនយើងខ្លាចនោះទេប៉ុន្ដែគេមើលឃើញថាវ៉ៃគ្នាមិនមែនជាឱកាសដោះស្រាយរឿងព្រំដែនទេ តែវាធ្វើឱ្យភាពតានតឹងកាន់តែលំបាក»។

សម្ដេចថាការបង្កើតសង្គ្រាមវាពិបាកណាស់ក្នុងការស្វែងរកសន្ដិភាពវិញ។ សម្ដេចបានផ្ដាំទៅមេដឹកនាំប្រឆាំងសូមកុំរុញពលរដ្ឋឱ្យធ្លាក់ក្នុងភាពគ្រោះថ្នាក់។

សម្ដេចបានរម្លឹកដល់ក្នុងពេលដែលកម្ពុជាផ្ទុះសង្គ្រាមជាមួយថៃក្នុងឆ្នាំ២០០៨ ចលនាប្រជាពលរដ្ឋបាននាំគ្នាគាំទ្រដល់កងទ័ពជាតិ ខណៈបក្សប្រឆាំងនៅពេលនោះមិនត្រឹមតែមិនចូលរួមទេ ថែមទាំងវាយប្រហារថាសង្គ្រាមនៅពេលនោះជាការសម្ដែងរបស់រដ្ឋាភិបាលថែមទៀត៕

អត្ថបទដោយ ហ៊ុន សិរីវឌ្ឍន៍