ជនសង្ស័យវាយទូរលក់មាសនៅផ្សារលើធំថ្មី ក្រុងសៀមរាប ត្រូវបានកម្លាំងជំនាញ កសាងសំណុំរឿងបញ្ជូនទៅតុលាការ

ចោរចិត្តសឿងម្នាក់ ដែលបានចូលវាយទូរលក់មាស ប្លន់យកគ្រឿងអលង្ការ នៅក្នុងផ្សារលើធំថ្មី ស្ថិតក្នុងភូមិ ដកពោធិ សង្កាត់ស្លាក្រាម ក្រុង ខេត្តសៀមរាប ត្រូវបានកម្លាំងជំនាញ កសាងសំណុំរឿងបញ្ជូនទៅកាន់ សាលាដំបូង ចាត់ការទៅតាមនីតិវិធីនៃច្បាប់។

ករណីខាងលើនេះ កើតឡើងកាលពីវេលាម៉ោង ១៤៖៥២នាទី ថ្ងៃទី១៥ ខែកុម្ភះ ឆ្នាំ២០២៦ ដោយមានបុរសម្នាក់បានចូលវាយទូរលក់មាស ប្លន់យកគ្រឿងអលង្ការ ដែលមានយីហោ វេត ចាន់តាក់ តូបលេខ ៥៩ នៅក្នុងផ្សារលើធំថ្មី ស្ថិតក្នុងភូមិ ដកពោធិ សង្កាត់ស្លាក្រាម ក្រុង ខេត្តសៀមរាប នៅទាំងកណ្តាលថ្ងៃ ហើយត្រូវបានកម្លាំងសមត្ថកិច្ចកងរាជអាវុធហត្ថខេត្ត សហការជា មួយអាជីវករក្នុងផ្សារ ចាប់ឃាត់ខ្លួនបានទាន់ពេលវេលាភ្លាមៗ។

តាមការបញ្ជាក់របស់សមត្ថកិច្ចរាជអាវុធហត្ថខេត្ត បានឱ្យដឹងថា បន្ទាប់ពីទទួលបានព័ត៌មាន កម្លាំងអាវុធហត្ថក្រុងសៀមរាប និងកម្លាំអការិយាល័យជំនាញ ចេញអន្តរាគមន៍ ឃាត់ខ្លួនជនសង័្សយបាន ១នាក់ និងដកហូតវត្ថុតាង មានម៉ូតូស្គប់ពី ១គ្រឿង,ទូរស័ព្ទដៃ ១គ្រឿង , ញញួរ ១ដើម , កាំបិតតាំងតោ ១ដើម , លោកហធាតុពណ៌លឿង ៣ខ្សែ បានបញ្ជូនទៅទីបញ្ជាការកងរាជអាវុធហត្ថខេត្តសៀមរាប ដើមី្បអនុវត្ថនីតិវិធីបន្ត ព្រមទាំងបានប្រគល់ ខែ្សដៃផ្លាក់ទីន ទាំង ៣ខែ្ស ដល់ជនរងគ្រោះវិញផងដែរ។

បើតាមសមត្ថកិច្ច ជនសង័្សយ ខាងលើមានឈ្មោះ ឡេ សុភ័ក្រ  ភេទប្រុស អាយុ ៤០ឆ្នាំ ត្រូវបានកម្លាំងជំនាញធ្វើតេស្ត៍ ទឹកនោម រកឃើញមានសាធារធាតុញៀនក្នុងខ្លួន៕

ដោយ៖ គឿន វេត