សមត្ថកិច្ចចុះ​បង្ក្រាប​ ទីតាំង​លក់ម៉ូតូ​អត់ពន្ធ​ ជាច្រើនកន្លែង

កម្លាំងការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តស្ទឹងត្រែង សហការជាមួយអធិការក្រុងស្ទឹងត្រែងដឹកនាំដោយព្រះរាជអាជ្ញាអមសាលាដំបូងខេត្តលោក ជា សុភ័ក្រ្តបានចុះបង្រ្កាបទីតាំងលក់ម៉ូតូអត់ពន្ធជិត ១០ កន្លែងនៅក្រុងស្ទឹងត្រែង។

ករណីបង្ក្រាបម៉ូតូអត់ពន្ធខាងលើនេះ បានធ្វើឡើងកាលពីវេលាម៉ោង ៨៖៣០ ព្រឹកថ្ងៃទី ៦ ខែមករាឆ្នាំ ២០២២ នៅចំណុចសួនច្បារក្រុងស្ទឹងត្រែង ស្ថិតក្នុងភូមិព្រែក សង្កាត់ក្រុងខេត្តស្ទឹងត្រែង។

សមត្ថកិច្ចបានឲ្យដឹងថា ទីតាំងម៉ូតូលក់អត់ពន្ធខាងលើនេះ ត្រូវបានសមត្ថកិច្ចចុះត្រួតពិនិត្យ នៅទីតាំងមួយកន្លែងៗរកឃើញម៉ូតូអត់ពន្ធចាប់ពី ៣ គ្រឿងទៅជិត ១០ គ្រឿង។

សមត្ថកិច្ចបានបន្តឲ្យដឹងទៀតថា​ ពេលនេះសមត្ថកិច្ចកំពុងតែចុះបន្តនីតិវិធីទៅតាមទីតាំងផ្សេងទៀតនៅក្នុងក្រុងស្ទឹងត្រែងដែលលក់ម៉ូតូអត់ពន្ធ។

បច្ចុប្បន្នម៉ូតូដែលពិនិត្យទៅឃើញថាពន្ធសមត្ថកិច្ចមិនទាន់បញ្ជាក់ថាមានចំនួនប៉ុន្មានគ្រឿងនោះទេ។ ម៉ូតូដែលបង្ក្រាបត្រូវបានធ្វើការដឹកជញ្ជូនតាមរថយន្តយកទៅរក្សាទុកនៅស្នងការដ្ឋាននគរបាលខេត្តស្ទឹងត្រែងដើម្បីចាត់ការបន្តតាមនីតិវិធី៕

អត្ថបទ៖ ងិន លីម