បុរសវ័យ​ ៣៧ឆ្នាំ​ ត្រូវបាន​ប្រជា​ការ​ពារ ​ចាប់ខ្លួន​ពីបទ​បំផ្លិច​បំផ្លាញ​ទ្រព្យ​សម្បត្តិ​រដ្ឋ

បុរសវ័យ ៣៧ ឆ្នាំ ឈ្មោះ ម៉ៅ ចាន់នី រស់នៅភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញត្រូវបាន​កម្លាំងប្រជាការពារសង្កាត់ចាប់ខ្លួនបញ្ជូនមកឲ្យនគរបាលប៉ុស្តិ៍ចាត់ការតាមផ្លូវច្បាប់ពាក់ព័ន្ធបំផ្លិចបំផ្លាញទ្រព្យសម្បត្តិរបស់រដ្ឋ។

យោងតាមប្រភពពីលោក ជូ វ៉ាន់នី ជំនួយការចៅសង្កាត់ច្បារអំពៅទី២ បានប្រាប់កម្ពុជាថ្មីថា នៅវេលាម៉ោង១១ ​និង៤០​នាទីព្រឹកថ្ងៃទី ១៤ ខែមករានេះ ជនសង្ស័យបានយកដំបងទៅវាយកំទេចរបង និងស្លាកផ្សព្វផ្សាយពត័មានរបស់ស្នាក់ការភូមិកណ្តាលដោយមិនដឹងមូលហេតុដែលបង្កឲ្យមានការភ្ញាក់ផ្អើលហើយក៏ត្រូវបានកម្លាំងប្រជាការពារសង្កាត់ចាប់ខ្លួន​យក​មកឲ្យនគរបាលប៉ុស្តិចាត់ការតាមផ្លូវច្បាប់។

លោក ជូ វ៉ាន់នី បានបញ្ជាក់ថា បន្ទាប់ពីនគរបាលសាកសួរចម្លើយរបស់ជនសង្ស័យគឺជនសង្ស័យឆ្លើយមិនច្បាស់លាស់​(បែកថ្មាំ)ជាហេតុធ្វើនគរបាលសម្រេចបញ្ជូនទៅមន្ទីរសង្គមកិច្ចដើម្បីធ្វើការអប់រំទៅតាមជំនាញព្រោះបើដោះលែងឲ្យមានសេរីភាពអាចបង្កភាពហឹង្សាជាបន្ត។

ចំណែកអ្នកភូមិកណ្តាលវិញបានអះអាងថា ជនរូបនេះច្រើនតែប្រើដំបងវាយផ្ទះប្រជាពលរដ្ឋប៉ុន្តែមិនបានបង្កវាយដំដល់មនុស្សម្នាឡើយ។ប្រជាពលរដ្ឋសុំឲ្យមន្ទីរសង្គមកិច្ចជួយអប់រំតាមនិតិវិធីដល់ជននេះផង៕

អត្ថបទ៖ នរា