ជនជាតិចិនម្នាក់បាញ់សម្លាប់ខ្លួននៅឆ្នេរសមុទ្រអូឈើទាល

សាកសពបុរសជនជាតិចិនម្នាក់ត្រូវបានប្រជាពលរដ្ឋប្រទះឃើញអង្គុយស្លាប់ដោយមានស្នាមឈាមក្រហមច្រាលពេញដីខ្សាច់នៅក្រោមដើមស្ងាវមួយកន្លែងនៅចំនុចឆ្នេរអូរឈើទាល។

ហេតុការណ៍នេះបានកើតមានឡើងនៅម៉ោងប្រហែល៨និង២០នាទីព្រឹក ថ្ងៃទី៥ ខែសីហា ឆ្នាំ២០២២ នៅចំនុចឆ្នេរអូរឈើទាល ស្ថិតនៅក្រុម១៦ ភូមិ៤ សង្កាត់លេខ៤ ក្រុង-ខេត្តព្រះសីហនុ។

សមត្ថកិច្ចបានឲ្យដឹងថា សពបុរសជនជាតិចិនស្លាប់ដោយមានស្នាមគ្រាប់កំភ្លើងត្រូវចំសៀតផ្កា ដោយនៅលើ​ដីខ្សាច់មានស្នាមឈាមកកដុំៗក្រហមច្រាល។ សមត្ថកិច្ចបានឲ្យដឹងទៀតថា ករណីនេះបើតាមការសន្និដ្ឋានបឋមបានឲ្យដឹងថា បុរសរងគ្រោះអាចធ្វើអត្តឃាតបាញ់សម្លាប់ខ្លួនឯង។ សភាពសាកសពជនរងគ្រោះអង្គុយផ្អែកគល់ដើមស្ងាវស្លាប់រឹងក្រញ៉ង់ និងមានអាវុធខ្លី១ដើមនៅក្រោមភ្លៅ។

សពមាន ឈ្មោះ  SU. XIANG  ភេទប្រុស អាយុ២៩ឆ្នាំ ជនជាតិចិន EH4725788។ នៅកន្លែងកើតហេតុសមត្ថកិច្ចបានរកឃើញ អាវុធខ្លី១ដើម ម៉ាក CF98  គ្រាប់ ៨ គ្រាប់។ សំបកគ្រាប់ចំនួន១គ្រាប់។ កាបូបស្ពាយ ១ និងស្បោងថងអាហាគ្រៀម ដបស្រា១ ដប។

បច្ចុប្បន្នសពបញ្ចូនទៅមន្ទីរពេទ្យបង្អែកខេត្តរង់ចាំធ្វើកោសល្យវិច័យ មុននឹងប្រគល់អោយសាច់ញាតិ។ ករណីក្រុមសមត្ថកិច្ចកងរាជអាវុធហត្ថក្រុង កំពុងសហការណ៍ជាមួយកម្លាំងអធិការ និងជំនាញស្នងការនគរបាលខេត្តព្រះសីហនុ ស្រាវជ្រាវបន្ត៕

អត្ថបទ៖ ស៊ុយ ចាន់ធា